1 Thessaloniciens 1
1
Legilizi gi-mɛ̀ɛ̀bò' ká Tesaloni, ke ká ko nɛ Aatana ni koà Gwilinɛ Yesu Klisi-à zaa tà láà, nle Pɔli ko ni Silivɛn ni Timotee, kole kó sɛ́ikwɛ́ é à bɔii ka nɛ̀ le. Kó wɩɩ ko: Aatana- dɔ gbáágbààa ke è gɛ̀ilɛ tó ka bhà, ke è zí ka zowɛ́ɛ́ niidaa. Tesaloni-mɛ̀ɛ̀bò kpɔ̀ Yesu lé-kɔ̀ɔ̀
2
Kó Aatana wánglego lɛ́ile kanó páipái ka-wùn gi, le kó bhàiwoà ziàn kɔi dolodolo, ko zʋʋ àa gó ka-wùn-a le.
3
Ká kpɔ́yè' gá Aatana lé, ke ká à gi-wùn kɛɛii, ni à lɔ̀ɔ̀' è ka kɛɛ, ke ká gii sí-ii à-wùn gi láà, ko zʋʋ àa gó à ke-wùn-a. Ká zí yáán tó' woii koà Gwilinɛ Yesu Klisi nuyè gɔ̀n kelekelele láà, ko zʋʋ ké à-wùn-a lɛ́nólɛ̀nó bhà Aatana zué, le ko à wánglego à tó-wùn gi le.
4
Ko laànɛ́bò' ká Aatana-à wùndɔ̀yóoáá láà, à gàn ké ko yàan ko: è ka yaayè' gá e zòà-mɛ̀ɛ̀a le.
5
Sée kó àle-lèè ye' wún' bhà, àle ye: wúnsɛ̀' è go Aatana pé, ke kó lóii à-nàà kpɔ́á ziàn bhaamɛ̀ɛ̀bò nɛ̀ láà, kó nuu à peà ka nɛ̀ tée' gi, kwáá nuu à peà ko biinlé lengdo-le bhà. Kɛ́ kó nuu zí à gi-wùnbò tó kɛɛà Aatana-à Waa Zaazaa' bháa' daayèa ko gi láà à gá, le ká à-lèè ye' à bhà kpákpálé ka: kó wʋʋ' peii láà, mai lekinilèkini' à gá le. Kó nuu táásíà sɛ̀a kɔɔ' gi ka finibhà, ke à tɔnɔ' tóyèa ka bhà láà, à tó-nàà ké zí ka yàànlé.
6
Táá-kɔ̀ɔ̀' ká à ye' ko gɔ̀n láà, ka lekini ka zí àle síyèa le. È tò' kwɛi, ke ka Gwilinɛ Kpáa leng' à táá-kɔ̀ɔ̀ síyèa lɛ́ɛ. Atoosiwo Waa Zaazaa' nuu ka zowɛ́ɛ́ niidaaà, le ká wɩɩ' Aatana wʋʋ bhà sóósíá, sée ke wo ka wɛ̀ikɛ̀ɛ̀ sínma láà à woii le.
7
Ale kɛɛ le ká tóyèa Yesu pe gi-mɛ̀ɛ̀bò' wó Masedoni lùu ni Akai lùu gi àng tóà kpo sì à bhà-kpòa le.
8
Pɔɔn- à kɛɛ ke an àle pe kwɛi, àle ye: Gwilinɛ Kpáa wʋʋ' é go' ka pé bhi láà, e maanáyèa Masedoni lùu ni Akai lùu tó gi. Kɛ́ àa tóyèa àle lengdo bhà. Atoosiwo kaà kpɔ̀ Aatana lé-yè láà à-wʋ̀ʋ̀ ké maanáyèa lɛnólɛ̀nó gi, le ko bhàwùn àa tuàn à gɛingó-wùn bhà koo le.
9
Pɔɔn- àle kɛɛ kwɛi, àle ye: ko wʋʋ' ka zʋʋ kun' kɔɔ' gi, ke ká ka kɔɔ go' yowɛ́ɛ́bò zì, ke ka zowɛ́ɛ́' seela', ke ká daa' Aatana leng' é Aatana yáányèa à pe gi, ke ká nù à zòàwùn kɛ̂ɛ láà, mɛnómɛ̀nó ké à gɛingo.
10
Aatana' e gbe Yesu' à go' gɔɔ̀le ke é à zana' láà, ká ka yáán tóii à gɔ̀n kɔɔ' gi, wo zí à tó gɛingo. Sée ká ka yáán tóii à gɔ̀n kwɛi wún' gi, àle ye: Aatana- wún' kpɔ́à lúyáán tà leekpɔ̀ɔ̀tili gi, Yesu do láà àle góà lɔngwɛ́ɛ́ gi, le è yɔɔ, le è ka la à tó gɔ̀n le.