1	Ale kɛɛ le máá nuu mɔɔà yáán dɛ́ɛ ke pà ka bhà lɔ̀ɔ̀ láà à kún-á n bhà koo le. Pɔɔn- à kɛɛ ke án wɩɩ' tò n doá Atɛni zé-wùn bhà,
2	ke án n laànɛ́ Timotee bɔ ka nɛ̀, àle lɛ́ɛ. Atoosiwo ko ni àleá kó Aatana-à bháála kɛɛ kiá, le nâa sɛ̀' è zin Klisi-wùn bhà, ko à kpɔ bhaamɛ̀ɛ̀bò nɛ̀ le. Sée án à bɔ̀- ka nɛ̀ kwɛi, ke è nù ka bháa dɔ, ke è ka zʋʋ gbaan' wo táásì Aatana-à zaa tà-yè bhà,
3	é kɛ̂ɛ kwɛi ke mɛngge ka gbɔ̀i òo nù yɛn ká wɛ̀ilèè' yeii láà à-wùn gi le. Atoosiwo à gàn ké ka lekini ka yàan ka: ko wɛ̀ilèè yè Aatana-wùn gi-yè láà, à leng' ko yaayèa àle gɔ̀n le.
4	Ale kɛɛ le kó nuu ka lià tée' gi láà, le kó nuu à-wùn tóà liélé, le ko à pe ka nɛ̀ ko: kó wɛ̀ilèè yeà le. Sée kó wún do' to' liélé, ke kó à pe' kwɛi láà, àle kɛɛii lɛ́ɛ. È tò' kwɛi, ke àa ka tíibhà-wùn-a.
5	Kɛ́ máá nuu mɔɔ' woà n zowɛ́ɛ́ kún-á n bhà ka-wùn gi koo láà, àle kɛɛ le án Timotee bɔ', ke kaà táásì Aatana-à zaa tà-wùn' bhɔyèa naa' lé, è nù à-tùlé dɔn le. Atoosiwo án nuu súóà ke kao tó daayèa gɔɔ̀yóo gɔ̀n sóólé, ke kó gii' si' ka bhà láà, òo nù tó bɔɔn bhà.
6	Kɛ́ Timotee' go' ka lià láà, ya waa n lià tò, le ya ka tà-wùn sɛ̀sɛ̀bò pe n nɛ̀ le. E wɩɩ ye: ka kɔɔ ké Aatana-wùn bhà kelekelele, le ko-wùn' ka gɔ̀n kpókpóá le. E wɩɩ zí ye: ka zʋʋ ké n-wùn-a lɛ́ile, le yáán dɛ́ɛ pà n bhà lɔ̀ɔ̀- ka kɛɛ, ye ka leng ka lɔ̀ɔ̀- n kɛɛ kɔɔ' gi láà à nɛ̀ le.
7	N laànɛ́bò, án bo' àle maá kwɛi laá, yàani n wɛ̀ilèè ké tuàn góà, ke án kúnyèa n leng kwenglé laá, n zowɛ́ɛ́' kpáá ka-wùn gi tò.
8	Án à ma' wo' wo: ka gɛɛn ké sɛ́ɛ́ kúnyèa Gwilinɛ Kpáa-à zaa tà láà, àle n zowɛ́ɛ́ kpááyèa, le má tó ye mɛ̂ɛ' góyèa gɔɔ̀le dɛ́ɛá à nɛ̀ le.
9	Ká n zowɛ́ɛ́ nii miniminiyè' daayèa láà, an dɔà ko nɛ Aatana zué, ke án à wánglegó ka-wùn gi kɔɔ' gi, à-kɔ̀ɔ̀ lefienɛ́ àa n yàànlé koo.
10	Kɛ́ án bhàiwo à zì yáán gi ni gbɛi gi tó bhà, le an pai dɔ à gi, ke án nù yáán dɛ́ɛ pá ka wɛí-lèè bhà, é kɛ̂ɛ kwɛi ke kaà táásì kpɔ̀ Aatana lé-zàà tà-yè láà, án nù ka tàkún, ke à wun- nù ban péng, ke òo tó tu tà.
11	A-wùn gi, Aatana lekini' é ko nɛá láà, àle ni koà Gwilinɛ Yesu wò dɔ gbáágbààa ke wò zaa lépóló n gɔ̀n, ke án lò zin-i ka lià-lèè ye.
12	È gò' àle gi, Gwilinɛ Kpáa- dɔ gbáágbààa ke è zí ka leng' bhe ka tàkún, ke ka lɔ̀ɔ̀' è ka ké kɛɛ láà è daa kpáa gi, ke è wɛin gbùnng zì mɛ̂ɛ bhɛ́ibò lefienɛ́bò tó nɛ̀, ke è tó ye ka lɔ̀ɔ̀- ko kɛɛ kɔɔ' gi láà à nɛ̀.
13	È zí dɔ gbáágbààa ke è ka zʋʋ gbaan, é kɛ̂ɛ kwɛi ke koà Gwilinɛ Yesu-à yáán- yaaà lɔng bhà kwee' gi, ke à leni à zòà-mɛ̀ɛ̀bò tó páipái wò nuà kiá láà, à-kwèèi- nù pe é bhɔ, ke wúnyóo tó' gó ka zowɛ́ɛ́ pé fɩ́fɩ́lé, ke pe àa ka bhà ko nɛ Aatana zué koo.