1 Thessaloniciens 4

È gò' àle gi, n laànɛ́bò, ka tááà kɔɔ' gi, ke à liá- waaà Aatana gi, kwéé woo à-kɔ̀ɔ̀ gie ka nɛ̀, le ká à gi-wùn kɛɛbò tó woii le. Kɛ́ àle tó gi, ko bhài' woii ka zì, le kó bhài gi-bhài woii ka zì Yesu-à wo gi le. Kó wɩɩ ko: ká ka gisie leng' wo, ke ká táá-kɔ̀ɔ̀ sɛ̀' woii láà, ká ló lesósó wo nà àleá liélé, ke ká bhɔyèa naa ye' tà láà, ká gie lefiené wo àle tà dɔ́ɔ́n-á le.

Atoosiwo kó wúnbò' à-liè dɔ' ka tà Gwilinɛ Yesu wʋʋá fɔ́ɔ́lé láà, à tó ké ka yàànlé.

Kó wɩɩ' ko: Aatana zòàwùn' bhe, àle ka yàà à lengdoà yaa gi-yèa le. A-wùn gi, ká ka gibhɔ zùàkɛɛyè bhà dɔ́ɔ́n-á,

ke mɛ̂ɛ óó mɛ̂ɛ' é ka kpe gi, ke è lê síà, à sí-kɔ̀ɔ̀- tó bhɛɛyèa Aatana ni bhaamɛ̀ɛ̀bò tó zué.

Mɛngge òo lê síà yáindɔ kàngbhà ye mɛ̂ɛbò' wàa Aatana dɔn láà àng nɛ̀.

À kɛ̀ɛ̀ kwɛiyè láà à gi, à-lèè àa à bhà ke mɛngge- e bhá bhàwùn sie, ɛ́ɛ́n ke è daa à yáin. Kwéé woo à pe ka nɛ̀ fɔ́ɔ́lé, le kwéé woo à sòlòtàsolo le. Kó wɩɩ' ko: Gwilinɛ Kpáa ké wún kpɔ́à wúnyóo suu láà à kɛɛ-mɛ̀ɛ̀bò tà.

Atoosiwo Aatana' ko dàà ke kó yaa' wo àbhà yaa gi le. Òo ko daa yáindɔ-wùn-le gi.

À kɛ̀ɛ̀ kwɛiyè láà à gi, án liè' dɔii ka tà láà, mɛ̂ɛ ye' è e pe góà à pé, ke à-mɛ̀ɛ̀ òo kpa bhaamɛ̀ɛ̀-le lengdo wʋʋ bhà, kɛ́ ke è kpayèa Aatana' è Waa Zaazaa daa ka gi láà àle wʋʋ bhà le.

Kale-mii' ká ka ké laànɛ́á kpɔ̀ Yesu lé-yè gi láà, ka lɔ̀ɔ̀- ka ké kɛɛà kɔɔ' gi, Aatana lekini' woo bo àle-kɔ̀ɔ̀ gieá ka nɛ̀. A-wùn gi, ko bhàwùn àa àle bɛɛnzɛ̀ ka nɛ̀ sɛ́ikwɛ́ gi-wùn bhà koo.

Atoosiwo ko laànɛ́bò páipái' wó Masedoni lùu tó gi láà, àng tó lɔ̀ɔ̀ ké ka kɛɛ-le wo. Kɛ́ kó wɩɩ ko: ká dɔ lenglèng' wo gbáágbààa, ke ka lɔ̀ɔ̀ ka ké kɛɛyè láà, ká ló lesósó wo nà à gá liélé, ke ká bhɔyèa naa ye' à tà láà, ká gie àle tà le.

Ká bhɛɛ tó ka leng bhà, ke ká táásí yɔ̀ɔ̀lɔ̀ɔ̀le bhaamɛ̀ɛ̀bò finibhà, ke mɛnó ká ka lekini pe gɔ̀n-wùnbò yáán bhɔ. È gò' bhi, ka lekinilèkini ká bháála kɛ̂ɛ ka kɔɔá, ke ká ka bhɛlɛ-pɔ̀ɔ̀n ye. Kó à-liè' dɔ' ka tà fɔ́ɔ́lé, àle lɛ́ɛ.

Ka à kɛ̀ɛ̀' kwɛi, mɛ̂ɛ' wàa Aatana-à zaa tà ko pé láà, wo bhɛɛ yaaà ka bhà ká táá-kɔ̀ɔ̀ sɛ̀' woii láà à-wùn gi. È gò' àle gi zí, ka-gbà àa tóii mɛnggemɛ̀ngge gwenglé. Ga-mɛ̀ɛ̀bò zanayè ni Yesu-à yáán yàà lɔng bhà-yè

N laànɛ́bò, kwáá à pé ke ká tó ka tíibhà ga-mɛ̀ɛ̀bò-wùn gi, ke wɛ̀i òo nù ban ka tà bháalé ye mɛ̂ɛ' àng zʋʋkpɔ̀i ke àa bhe leekpɔ̀ɔ̀tili gi láà àng nɛ̀.

Atoosiwo Yesu pe gi-mɛ̀ɛ̀ tó páipái ko kpɔ́yè ké à lé ko: Yesu ké ga', le é zí go' gɔɔ̀le le é zana' le. A-kɔ̀ɔ̀ do láà à gi, ko kpɔ́yè ké zí à lé ko: mɛ̂ɛ' wò ga ke àng kpɔ́yè ké Yesu lé láà, Aatana ké àng lekini naaà Yesu bhà, le è àng go gɔɔ̀le, le è àng zana à-kɔ̀i le.

A-wùn gi, Gwilinɛ Kpáa leng' wʋʋ' kpɔ' ko bhà, ke kó à tàpóló ka nɛ̀, àle ye: àbhà yáán wolo-kwèèi- bhɔ̀', mɛ̂ɛ' ko tóà yáán láà, kole kwáá daaii mɛ̂ɛ' wó gayèa láà àngle liélé.

Kɛ́ gwilinɛà kwí káán-wʋ̀ʋ̀ ké daaà mɛ̂ɛ tóló gi, le Aatana-à kɩ́ɩ́la kpáè- lòlòkpɔ kpókpóá, le Aatana-à túnú- wɩɩ, le Gwilinɛ Kpáa lekini- go lɔngwɛ́ɛ́ gi, le è yɔɔ à wʋʋ bhà le. È bò' kɛɛá kwɛi, ga-mɛ̀ɛ̀ yemò' nuu kpɔ̀ Klisi lé-mɛ̀ɛ̀a, àngle fɔ́ɔ́lé' zanaà le.

È gò' àle gi zí, yáán-mɛ̀ɛ̀ yemò' ko tóà zíà, kó waláà ye gbʋ́ʋ' mɛ̂ɛ sí, le mɛ̂ɛ yemò' wó go' gɔɔ̀le láà, ko nà àng gá ko lo dɔi kiá Gwilinɛ Kpáa gɔ̀n zaalé loo tà tɛ́nglà le. Ale- bò' kɛɛá kwɛi, kó tóà Gwilinɛ Kpáa lià kwɛi kwɛi kwɛi, kwáá góii à lià koo.

Ká kpɔ́ ka ké zʋʋ tà wʋʋbò láà àleá ziàn le.