{
    "livre": "2-corinthiens",
    "chapitre": 3,
    "versets": [
        {
            "numero": 1,
            "texte": "An à pè' kwɛi, ká à pe dɛ́ɛ ke woà zí ka: an n lekini gɔɔn' woii le. Sée ke àa kwɛi-le bhà. Tààn e ka gi ye: n-tɔ̀ɔ̀ kɔ́nɔ́wo-sɛ̀ikwɛ́' wò à bɛɛnzɛà ke an nuà nàa ka nɛ̀, ɛ́ɛ́n ke ka leng ka zí à bɛɛnzɛà, ke an lóà nàa mɛ̂ɛbò nɛ̀ láà, an àle guoii kwɛi láà la è?"
        },
        {
            "numero": 2,
            "texte": "Ááo. N bhàwùn àa àle bhà. Wánglafila, ka lekini yáányè' ká n-tɔ̀ɔ̀ kɔ́nɔ́wo-sɛ̀ikwɛ́á le. Kɛ́ ká sɛ́ikwɛ́' à gá kwɛi láà, wún' é à gi, à tó ké bɛɛnzɛyèa n zowɛ́ɛ́ pé, le mɛ̂ɛ óó mɛ̂ɛ' è ka yeà, ká Aatana-à zaawɛ́ɛ́ tà kɔɔ' gi, à-mɛ̀ɛ̀- à dɔn le. Ale tóà sɛ́ikwɛ́ láà à-wʋ̀ʋ̀ pe-kɔ̀ɔ̀a bhaamɛ̀ɛ̀ tó yàànlé le."
        },
        {
            "numero": 3,
            "texte": "Atoosiwo mɛnómɛ̀nó ké à gànnu kpákpálé wo: Klisi' sɛ́ikwɛ́ bɛɛn' zɛyèa n kɔ̀ɔ̀tà, àle kaá le. Òo bɛɛn láà à zɛ lánggele yí-leá. É à zɛ̀- Aatana yáányè lekinià Waa Zaazaa' gá le. Àa zí bɛɛnzɛyèa gwɛɛ pɛ́ɛ́nbò-le tà ye Moizi-à tɔ́ng nɛ̀. È à bɛɛnzɛyèa bhaamɛ̀ɛ̀ yáányèbò kale ka zowɛ́ɛ́ pé le."
        },
        {
            "numero": 4,
            "texte": "Wún láà, Klisi lekini' à tàpólóyèa n zowɛ́ɛ́ pé, le án à peii n kɔɔ ni n gɛɛn tóá Aatana zué le."
        },
        {
            "numero": 5,
            "texte": "Kɛ́ òo tóà ka gi ye: má mɔɔ' wo wún bhà n lekini tà, le án à peii kwɛi le. Wánglafila, nle n pe mɔ̀ɔ̀ wún bhà-bhàà- gò Aatana' pé le."
        },
        {
            "numero": 6,
            "texte": "Atoosiwo àle n tóyèa à ká, le é mɛ̀ɛ̀nɛ̀ dɛ́ɛ' à daayèa à lekini ni bhaamɛ̀ɛ̀bò ko finibhà láà, án bhɔyèa à-wùn létáásí-mɛ̀ɛ̀ gi le. Sée mɛ̀ɛ̀nɛ̀ dɛ́ɛ láà à zi- gbààn Aatana- mɛ̂ɛ gba ebhà Waa Zaazaa' gá láà àle gi le. À zigbààngi àa Aatana-à tɔ́ng bɛɛn' é nuu gwɛɛ pɛ́ɛ́nbò tà láà àleá koo. Atoosiwo Aatana-à tɔ́ng láà e mɛ̂ɛ légo ga nɛ̀. Kɛ́ Waa Zaazaa-le- mɛ̂ɛ káán' wo ga gɔ̀n bhɛɛlé, le è mɛ̂ɛ la le."
        },
        {
            "numero": 7,
            "texte": "Sée ga-wùn láà à bɛɛn ké nuu zɛyèa gwɛɛ pɛ́ɛ́nbò tà, le Aatana zán' nuu dɔà à-nàà kpɔ́-mɛ̀ɛ̀ Moizi wɛí, le à wɛí-lèè zán' nuu bhɔà ye yáán zán nɛ̀ le. È nù pe é yɔ́n bhi, ke Izalae-bò wàa mɔɔ à wɛí-lèè gaa lefienɛ́ woá koo, à zán' nuu bhɔ' woà láà à-wùn gi. Kɛ́ sée Moizi wɛí-lèè zán' nuu bhɔà kwɛi láà, àle àa nuu mɔ́-pɔ̀ɔ̀n lefienɛ́ keá."
        },
        {
            "numero": 8,
            "texte": "È tò' ke Aatana zán ké nuu bhɔà ga-wùn-nàà kpɔ́-mɛ̀ɛ̀ láà àle tà kwɛi la ò, mɛɛ kɛɛ le à zán- kwii bhɔá Waa Zaazaa kɔlénu-mɛ̀ɛ̀bò' kó tenglé-yààn é à gi é kole ko tà kpáaá, ke à lé- gie àle pe tà le?"
        },
        {
            "numero": 9,
            "texte": "È tò' zí ke mɛ̂ɛ zɛ̀ lɩ́ɩ́á-wʋ̀ʋ̀ léban-mɛ̀ɛ̀ láà àle pe zán ké nuu bhɔà kwɛi la ò, mɛɛ kɛɛ tò le bhaamɛ̀ɛ̀bòà lɩ́ɩ́ sɛ̀ɛ̀ Aatana zué-wʋ̀ʋ̀ léban-mɛ̀ɛ̀-le pe zán- kwii bhɔá gbanggbaale, ke à lé- gie mɛ̂ɛ fɔ́ɔ́yè láà à pe tà dɔ́ɔ́n-á pánngle le?"
        },
        {
            "numero": 10,
            "texte": "A-wùn gi, Aatana-à kɩ́ɩ́la sɛ̀ dɔyè ye' è bhaamɛ̀ɛ̀bò daa àng la-zàà tà láà, àle pe zán ké tóyèa kpáaá miniminiyèa, le a tó ye pɔɔn' à fɔ́ɔ́yè pe yáán zɛ le."
        },
        {
            "numero": 11,
            "texte": "À kɛ̀ɛ̀ kwɛiyè láà à gi, wún ye' é nuu gie-wùn-a, àle zán' bhɔ' kɔɔ' gi láà, à-lèè ké à bhà ke wún ye' àa góii gbonggbongle koo láà, à leng pe zán- bhɔ, ke àle lé- gie à ye láà àle pe tà dɔ́ɔ́n-á."
        },
        {
            "numero": 12,
            "texte": "Án n zʋʋ yaayèa à ye' àa góii gbonggbongle à nɛ̀ kwɛi, le an táási zòikɛ̀ɛ̀ bhà, ke síka àa n gi le."
        },
        {
            "numero": 13,
            "texte": "Nle máá n pe kɛɛ ye Moizi nɛ̀. Atoosiwo àle ké nuu gbàà bhuoà e wɛí, é kɛ̂ɛ kwɛi ke Aatana zán' nuu à tà, ke bhaamɛ̀ɛ̀bò yáán ké à bhà, kɛ́ ke à ló-wùn ké bhe láà, Izalae-bò wòo nù à gò à bhà-lèè ye."
        },
        {
            "numero": 14,
            "texte": "Kɛ́ àng zowɛ́ɛ́ ké tóyèa tílíkpátìlìkpàa àng gwílé. Pɔɔn- à kɛɛ ke an àle pe kwɛi, àle ye: mɛ̀ɛ̀nɛ̀ fɔ́ɔ́lé' Aatana' à daa' ele ni Izalae-bò finibhà láà, wò à-sɛ̀ikwɛ́-wʋ̀ʋ̀ pè' àng nɛ̀ ziàn, e to ye gbàà do' é nuu bhuoyèa Moizi wɛí láà, àle ke' tuàn bhuoyèa àng lekini pe yákii tà, le wàa wʋʋ láà à gima le. Sánni tenglékétengléá, pɔɔn òo gó àng yákii tà bhe. Atoosiwo Klisi-wùn tà- pòlò' mɛ̂ɛ nɛ̀, le pɔɔn' kwɛi láà è nuu góà mɛ̂ɛ yákii tà le."
        },
        {
            "numero": 15,
            "texte": "À kɛ̀ɛ̀ kwɛiyè láà à gi, wò Moizi-à sɛ́ikwɛ́-wʋ̀ʋ̀ pe Izalae-bò nɛ̀ kɔi dolodolo, e to ye pɔɔn ké bhuoyèa àng zowɛ́ɛ́ tà, le wàa wʋʋ láà à gima le. Sée é nuu fɔ́ɔ́lé kɔɔ do' gi, è tuàn àle-kɔ̀ɔ̀ bhà tenglé le."
        },
        {
            "numero": 16,
            "texte": "Kɛ́ e bɛɛnzɛyèa Aatana-à sɛ́ikwɛ́ gi wo: mɛ̂ɛ zowɛ́ɛ́- seelà' Gwilinɛ Kpáa pé, le pɔɔn' nuu bhuoyèa à tà láà, è go bhi le."
        },
        {
            "numero": 17,
            "texte": "Pɔɔn- àle kɛɛ kwɛi, àle ye: Gwilinɛ Kpáa' Waa Zaazaa-a le. Sée Gwilinɛ Kpáa láà àbhà Waa Zaazaa' lee' gi, bhaamɛ̀ɛ̀- pòlò à tà bhi' wo le."
        },
        {
            "numero": 18,
            "texte": "À kɛ̀ɛ̀ kwɛiyè láà à gi, mɛ̂ɛ páipái' pɔɔn àa bhuoyèa ko wɛí koo láà, Gwilinɛ Kpáa-à mɛ̂ɛnɛ̀ zán ké dɔ ko bhà, le è ko tàpolo, le ko gala à gi, le ko to à lekini bhɔ̀ɔ̀bhàa le. A-wùn gi, àbhà mɛ̂ɛnɛ̀ zán' é dɔii ko bhà láà, à dààlé lesósó' lóii daaá le. Sée Gwilinɛ Kpáa' é Waa Zaazaa-a láà, àle gbóló' à gá ko zowɛ́ɛ́ pé le."
        }
    ]
}