2 Corinthiens 4

Kɛ́ sée án à gànnu ma: nle n wɛ̀i bhɛ́iwɛ́ɛ́' Aatana kɛɛ', le é gɛ̀ilɛ to', le é bháála sínmasìnma' kwɛi láà à dɔyèa n kɔ̀ɔ̀lé le. Pɔɔn- à kɛɛ ke n gbɔ̀i àa yɛn, àle lɛ́ɛ.

Ale kɛɛ le yɛ́ɛ-wùnbò' wò à kɛɛ ziàn bànàkpɔ́ gi láà, máá wɩ́ɩ́ à bhà ke n kɔɔ- daa à gi àng pé, ke wò mángyɛlɛbò' daa bhaamɛ̀ɛ̀bò gɔ̀n láà, án à kɛ̂ɛ, ɛ́ɛ́n ke án zí Aatana wʋʋ puolá à tà le. Wánglafila, mai-wùn' è go Aatana pé, an àle tàpolo bhaamɛ̀ɛ̀bò nɛ̀ kpanggaale, ke à leng yáán ké n bhà le. Mɛnómɛ̀nó- dɔ̀n àle bhà wo zowɛ́ɛ́ pé wo: Aatana-à bháála kɛɛ-mɛ̀ɛ̀' n gá le.

Sée wúnsɛ̀' è go Aatana pé, ke an à-nàà kpɔ láà, à gi ké tíiá mɛnggoò gi maiá. Kɛ́ à gi- tíiá kwɛi mɛ̂ɛ yemò' wó pailé-zàà tà láà àngle lengdo gɔ̀n le.

Pɔɔn- àle kɛɛ kwɛi, àle ye: lúyáán é à tà-mɛ̀ɛ̀ yemò' wàa wɩ́ɩ́ Aatana-wùn bhà láà, gɔɔ̀yóo' àngle pe áatana-á, le é àng gwílé-yànwɛ́ɛ́ wíyèa le. Sée Aatana-à nâa sɛ̀' ko à kpɔ, ke é ye làngbha nɛ̀ lɛitíi lià láà, gɔɔ̀yóo- à kɛ̀ɛ̀ kwɛi, ke wòo nù àle zán ye le. Atoosiwo ko nâa sɛ̀' kpɔ láà, àle mɛ̂ɛ tàpolo, le Klisi' é Aatana bhɔ̀ɔ̀bhà lengá láà, mɛ̂ɛ- àbhà mɛ̂ɛnɛ̀ zán-tùlé ye à bhà le.

E sée kwɛi maiá, an Aatana-à liang' zɛ ziàn láà, máá n lekini-le-wùn pe à gá. An Yesu Klisi' à-wùn pe, le an wɩɩ ma: àle Gwilinɛ Kpáa-á, le nle án kaà gùá-mii bhɛ́iwɛ́ɛ́á à kɔɔ wala le.

Pɔɔn- à kɛɛ ke an àle pe kwɛi, àle ye: Aatana do' é wɩɩ' lúyáán zigó téei lii ye: mɔ̀ng- maa lɛitíi lià láà, àle do láà àle zí lɛipólóyèa ko zowɛ́ɛ́ pé dɔ̀yáa gá, é kɛ̂ɛ kwɛi ke àbhà mɛ̂ɛnɛ̀ zán' è dɔ Klisi wɛí láà, kó à dɔn, ke è bhɔ ko bhà, ke kó nù mɔ̀ng maa bhaamɛ̀ɛ̀bò tà à gá le.

Kɛ́ Aatana' bhɔ̀ɔ̀nɛ̀ kpáalàkpàà' kwɛi à bhɔyèa nle-mii' n nɛ̀ láà, wí-pɔ̀ɔ̀n bhɛ́iwɛ́ɛ́' n gá le. Án ye sɛ́ɛ́gbɔ nɛ̀. Sée an tó' wo wí-pɔ̀ɔ̀n-a kwɛi láà, mɛnó- à gànnù àle bhà wo: wàà kpókpó' é n gi ke à mɔ̀ɔ̀kiá àa bhe láà, yàa nle n peá, kɛ́ è gò Aatana' pé le.

E sée kwɛi maiá, yáin gbɔɔn-kɔ̀ɔ̀ suu tó páipái ké woii n gɔ̀n, le ya tó ye gbá bháibhài nɛ̀ n tà le. Kɛ́ àa n vele-le yɛ́ɛ́yèa. Síka-le ké n gi kpáaá, kɛ́ n gbɔ̀i-le àa yɛnyèa.

Wo n wɛ̀ikɛ̀ɛ̀-le wo, kɛ́ Aatana-le àa kɔɔ góyèa n zì. Wo n maanáyè-leá, kɛ́ wàa n pɔ́nyè-leá.

Yesu lekini yáányè' wɛ̀ilèè ye' kɔɔ do' gi, ke é zin' nàa à gayè bhà láà, n lekini n pe kwîi' é n bhà, è zí wɛ̀ilèè yè àle-kɔ̀ɔ̀ bhà lɛ́ile à gbóló lé le. Sée an wɩ̀ɩ̀ wɛ̀ilèè suu láà àle sínma bhà kwɛi, ke bháa' é daa' Yesu gi, ke è gó gɔɔ̀le ke è zana láà, ke àle- nù zí lébhɔ n lekini n pe kwîi' é n bhà é à gi le.

Atoosiwo yàani n yánwɛ́ɛ́ ké tuàn à gi, ke mɔ́ɔ́ ga leng-le wo bhe laá, kɛ́ wo n lé-le dɔ ga nɛ̀ lɛ́ile Yesu-wùn gi. Sée àle- kɛ̀ɛ̀ n gá kwɛi, ke gò gɔɔ̀le ke mɛ̂ɛ- zana-bhàà' é Yesu gi láà, àle- nù zí lébhɔ n kwîi' é búú-pɔ̀ɔ̀n-a n bhà láà à gi le.

À kɛ̀ɛ̀ kwɛiyè láà à gi, ga ké gbɔɔn-ii nle n tà, le sii' daaii kale ka gi à-wùn gi le.

À bɛɛn ké zí zɛyèa Aatana-à sɛ́ikwɛ́ gi wo: N kpɔ́yè ké nuu Aatana lé, àle kɛɛ le án wɩɩ' le. N lekini' bhe, kpɔ̀ Aatana lé-zòwɛ́ɛ́- tó' wo n gwílé kwɛi láà, àle kɛɛ le n kpɔ́yè' Aatana lé kelekelele do, le máá tó n tàsáná,

ke à gàn ké n yàan ma: Aatana' é koà Gwilinɛ Yesu go' gɔɔ̀le ke é à zana' láà, àle zí n lekini naaà Yesu bhà, le è n zana, è gò' bhi le è ko nà kanù konó páipái ko ban ké tà e zué le.

Kɛ́ wúnbò láà àle tó- kɛ̀ɛ̀ ke è nù tó kaà wúnsɛ̀' gá le. Sée è tò' kwɛi, le Aatana-à gɛ̀ilɛ láà à tò à bhà-mɛ̀ɛ̀bò- pa lesósó wo le. Wò zí pà' kwɛi, le Aatana wánglegó-mɛ̀ɛ̀bò leng wò to kpeá gbanggbaale, le è to à tɔ́ bhɔyè lò liélé-kɔ̀ɔ̀a le. Zʋʋ yàà leekpɔ̀ɔ̀tili gɔ̀n-yè

Pɔɔn lekini' è kɛɛ ke n gbɔ̀i àa yɛn, àle lɛ́ɛ. Sée yàani n bu' é n bhà, àle ke ké lóii káán-á à lé ziàn sɛ̀lɛ̀sɛ̀lɛ̀le, n zowɛ́ɛ́' é n gwílé láà, lee- kpɔɔ kɔi dolodolo, Aatana bháa dɛ́ɛ- lò daa lesósó' woá àle gi le.

Kɛ́ n wɛ̀ilèènɛ́ yemò' góii tenglé-yààn é à gi láà, àle tóà nbhà mɛ̂ɛnɛ̀ zigbààngiá leekpɔ̀ɔ̀tili gi le. Ale àa kpɔ̀ ké bhà-pɔ̀ɔ̀n lefienɛ́á nà mɛ̂ɛnɛ̀ láà à gá. Atoosiwo mɛ̂ɛnɛ̀' ko à kɛɛà kwɛi láà, é kpáa suu' gá é, à mɔ̀ɔ̀kiá àa bhe, le àa zí yɛn gbonggbongle le.

Pɔɔn- à kɛɛ ke an àle pe kwɛi, àle ye: pɔɔn yemò' mɛ̂ɛ- à ye mɛ̂ɛ yánwɛ́ɛ́á láà, máá n zʋʋ yaa àle nɛ̀. Kɛ́ à yemò' mɛngge àa à ye, n zʋʋ- àle nɛ̀ lengwo le. Atoosiwo pɔɔn yemò' mɛ̂ɛ yánwɛ́ɛ́- à ye láà, gie-pɔ̀ɔ̀n' àle tóá le. Kɛ́ à yemò' mɛngge àa à ye láà, àle mɔ́-pɔ̀ɔ̀n' àa gie gbonggbongle à gá le.