2 Corinthiens 6

An tó' wo Aatana kɔlénu-mɛ̀ɛ̀a kwɛi láà, àle kɛɛ le án bhàiwoii ka zì, ke ká à kɛ̂ɛ sɛ̀a ke Aatana' gɛ̀ilɛ' tóyèa ka bhà, ke ká wɩ́ɩ́yèa à-wùn bhà láà, ke òo nù tó bɔɔn bhà le.

Atoosiwo Aatana ké à pe' ebhà sɛ́ikwɛ́ gi fɔ́ɔ́lé lii ye: À bha sɛ̀' bhɔ', le án ibhà bhài wʋʋ ma' le. I la-kwèèi' bhɔ', le án taa' i pé le. Ale kɛɛ le an wɩɩ ma: kà lɛgaa. Wó nuu bha sɛ̀' à peà láà, àle ya bhɔ mai lekiniá tò é le. Wó nuu zí mɛ̂ɛ la-kwèèi' à peà poo, àle ya bhɔ tenglé é le.

Sée nle-mii' án bhàiwoii ka zì kwɛi láà, an dɔà kɔɔ' gi ke mɔɔ tó mɛnggemɛ̀ngge gò zaa gi-mɛ̀ɛ̀a, an àle-lèè guoii le. A-wùn gi, án Aatana-à bháála' à kɛɛii láà, an à kɛ̀ɛ̀ kwɛi ke àle lóó òo nù ga bhaamɛ̀ɛ̀bò zué le.

An zí dɔà kɔɔ' gi ke mɛnó- nù n dɔn Aatana-à bháála kɛɛ-mɛ̀ɛ̀ lekinilèkiniá, an táásì àle-gɛ̀ɛ̀n-a wúnnówùnnó gi le. Ale kɛɛ le an wɛ̀ilèèbò' ye oo, ni an to kpalabò' gi oo, ni an gie yáingbɔɔnbò' à-yì wɛ́ɛ́ ziàn láà oo, an à tó páipái kun n bhà le.

Wò zí n maa oo, wò n daa kààso gi oo, dààkélébò- daa n tà oo, an zí à tó kùn n bhà kwɛi' wo le. È gò' àle gi, án bháála kpókpó kɛɛ giiá, le an yii bòo yáán, le an to bòo vɔ́n-á ziàn le.

An zí dɔà kɔɔ' gi, ke wò n dɔn Aatana-à bháála kɛɛ-mɛ̀ɛ̀a kwɛi, an wúnnó kɛ̀ɛ̀ gwílé púú tà àlei, le an táási dɔn bhà, le an n zowɛ́ɛ́ saa bhaamɛ̀ɛ̀bò pé, le n kóló- sɛɛ àng bhà le. Waa Zaazaa- tó' wo n gi, ni bhaamɛ̀ɛ̀ lɔ̀ɔ̀' è n kɛɛ ke àa tó dáingɔ̀nlúá kɔɔkekɔ̀ɔ̀ke gi,

ni an mai-wùn tàpóló' wo, ni Aatana- wún kpókpóbò kɛɛ' wo ziàn n kɔ̀ɔ̀tà bòo láà oo, wò zí n tò à bhà bháála kɛɛ-mɛ̀ɛ̀a-lèè yè àle tó bhà le. An zí Aatana-à gwili' gɔn láà, an à gɔ̀n wún dɔɔyè lesósó kɛɛyè' gá le. Atoosiwo wún dɔɔyè kɛɛyè láà àle nbhà sáa ni nbhà lêenɛ́ tóá do le.

Bhaamɛ̀ɛ̀bò- n dɔn mɛ̂ɛ tiàànleá oo, ɛ́ɛ́n wò yɛ́ɛ dɔ n bhà oo, wò n tɔ́ sɛɛ oo, ɛ́ɛ́n wò n tɔ́ sie oo, yéè tó kɔɔ óó kɔɔ' gi, an n lekini giè mɛnó nɛ̀ Aatana-à bháála kɛɛ-mɛ̀ɛ̀ láà àleá kwɛi do le. Yàani wóò n gaa bhaamɛ̀ɛ̀bò wunbílí gisie-mɛ̀ɛ̀a, kɛ́ àle tó gi, mai-wùn pe-mɛ̀ɛ̀' n gá le.

Án ye mɛngge àa mɛ̂ɛ' àng dɔn àng nɛ̀, kɛ́ ke mɛnó ké n dɔn kpákpálé. E nuu bhaamɛ̀ɛ̀bò gi ye: má woo ga tó wo, kɛ́ wó káá' wo' ke án yáán le. Wo to wún-le kpɔ́à n tà kwɛi maiá, kɛ́ wàa mɔɔ n zɛ-le woá.

Zowɛ́ɛ́kpàin-le ké yaa n bhà, kɛ́ n nii ké to daayèa lɛ́ile. Án zí kɔifɩɩ-mɛ̀ɛ̀-leá kwɛi maiá, kɛ́ sée nle án bhaamɛ̀ɛ̀ kpe kpáalàkpàà tó kɔɔ pa le. Pɔngge àa n gɔ̀n, sée pɔnópɔ̀nó- yaa nle nbhà yaa gi le.

N dɔ́mabò' ká Kolɛnti láà, má liangzɛ ka nɛ̀ tàpúúá, má n gwílé tó póló ka nɛ̀ kpanggaale do tò!

Atoosiwo kale ka-wùn ké nle n gɔ̀n kpókpóá n zowɛ́ɛ́ pé. Kɛ́ nle n-wùn àa kale ka zowɛ́ɛ́ pé wɛ̀sɛ le.

A-wùn gi, án à pe ka nɛ̀ ye mɛ̂ɛ' wún pe mɛ̂ɛà náò nɛ̀. Án wɩɩ ma: ká dɔ gbáágbààa ke ka leng ká ka gwílé póló n nɛ̀ ye n leng án n pe polo' ka nɛ̀ kɔɔ' bhà láà à gi. Yesu pe gi-mɛ̀ɛ̀bò ni mɛ̂ɛ' wàa à pe gi láà, wo mɔɔà kɔɔ kpɔ́á wo ké gbanlé è?

Mɛ̂ɛ' ká Yesu pe gi láà, kao ka kɔɔ kpɔ́à ké gbanlé kià nà mɛ̂ɛ' wàa à pe gi àng gá. Bháá ni bhʋʋbòà nààkébhà àa yɔ́ɔ́n kɔɔ do' gi láà, mɛ̂ɛ' ká Yesu pe gi ni mɛ̂ɛ' wàa à pe gi, kaà nààkébhà-yè àa kún kaá àle-kɔ̀ɔ̀ bhà le. Tààn Aatana zòàwùn kɛɛyè ni àbhà tɔ́ng sieyè ké ké si ziàn è? Le Aatana' mɔ̀ng maayèa mɛ̂ɛ' ka tà láà, ka ni mɛ̂ɛ' wó tuàn wo yán tíibhà Aatana-wùn gi láà la ò, ka nà àng gá-nù kaà nààkébhà yɔ́ɔ́n-kɔ̀ɔ̀- keeà lɔ?

Tààn e ka gi ye: Klisi ni gɔɔ̀yóo àng wʋʋ ké to do ziàn è? Òo tò' àleá, ke mɛ̂ɛ' wó kpɔ̀ Klisi lé-mɛ̀ɛ̀a ni mɛ̂ɛ' wàa kpɔ̀ à lé-mɛ̀ɛ̀a, wò wo kɔɔ yàà wúnngdo bhà-kɔ̀ɔ̀ keeà lɔ?

Ɛ́ɛ́n Aatana-kwìì- mɔ̀ɔ̀ tóá yo-kwììa-kɔ̀ɔ̀ kèè lɔ, sée ke kole kó Aatana yáányè yàài-kwììa le? Atoosiwo e bɛɛnzɛyèa Aatana wʋʋá ye: Án yaaà n zòà-mɛ̀ɛ̀bò finibhà, le an táási àng kpe gi le. È tò' kwɛi, le wò n dɔn wo nɛ Aatana-á, le wò to n zòà-lùuá le.

Ale kɛɛ le é zí bɛɛnzɛyèa zaa bhɛ́i keá wo: Kà gó mɛ̂ɛbò láà àng kpe gi, ke ká káán àng bhà. Pɔɔn' é n gban-á, ka kɔɔ òo zin-à àle ke bhà. È tò' kwɛi, án kɔɔ kpɔ́à ka gɔ̀n,

le an to ka nɛá, le ka leng ka to n gbebò ni n lúbòa le. Nle Gwilinɛ Kpáa' n kɔɔ- mɔɔ wúnnó páipái bhà láà, nle án wɩɩ lɛ́ɛ.