2 Jean 1

Aatana Gwilinɛ-à sɛ̀ɛ̀bhà, nle-mii' án legilizi liélé sí-mɛ̀ɛ̀ kpáèa, nle án sɛ́ikwɛ́ é à bɔii ka ni ibhà náò ka nɛ̀ le. Atoosiwo ka lɔ̀ɔ̀ ké n kɛɛ mai lekiniá. Kɛ́ òo tóà ka gi ye: ka lɔ̀ɔ̀- n lengdo' kɛɛ le. Àa n lengdoá, kɛ́ mɛ̂ɛ páipái' wó mai-zàà dɔnyè-leá, ka lɔ̀ɔ̀ ké àngle tó kɛɛ.

Sée mai-wùn' yàlèè kúnyè' gá ko nà kanù ko zowɛ́ɛ́ pé, ke àa gó ko yàànlé gbonggbongle koo láà, ka lɔ̀ɔ̀- ko kɛ̀ɛ̀ àle pé le.

A-wùn gi, ko nɛ Aatana ni à gbe Yesu Klisi wò dɔ gbáágbààa ke wò gɛ̀ilɛ tó ko bhà, ke wò zí ko gaa wɛ̀i bhà, ke wò zízí ko zowɛ́ɛ́ niidaa. Ko tó' wo mai-zàà tà, ke ko lɔ̀ɔ̀- ko ké kɛɛ láà, wò gɛ̀ilɛ tóà ko bhà kwɛi àle-wùn gi le. Mai-wùn ni lɔ̀mɛkɛ zìnkébhà-kɔ̀ɔ̀

Án ibhà náò kemò ta' wo', ke wo táásí-ii mai-zàà tà láà, e sɛɛ' n nɛ̀ miniminiyèa. Ko nɛ Aatana' liè dɔ' ko tà ye: kó táásí kɔɔ' bhà láà, wò táásí-ii àle-kɔ̀ɔ̀ bhà lɛ́ɛ.

À kɛ̀ɛ̀ kwɛiyè láà à gi, koà Gwilinɛ-à sɛ̀ɛ̀bhà, ká dɔ' wo gbáágbààa ke ko ni kanù ko lɔ̀ɔ̀- nù ko ké kɛɛ le. Án wún' à bɛɛnzɛii kwɛi é, àa liè wʋʋ dɛ́ɛá, kɛ́ liè do' wó à dɔ' ko tà à zigó gi láà, àle à gá le.

Sée ko Aatana-à liè mà', ke kó à gi-tààsí laá, ke Aatana ni bhaamɛ̀ɛ̀bò lɔ̀ɔ̀ ké ko kɛɛ mai lengá. Liè' wó à dɔ' ka tà à zigó gi, ke à-lèè' à bhà ke ká à gi-tààsí lɛ́ile, àle lɛ́ɛ.

Atoosiwo mɛ̂ɛ gò zaa gi-mɛ̀ɛ̀ kpe ké waláyèa lúyáán tà. Angle wó Yesu Klisi-wùn gbègo ziàn, le wàa wɩ́ɩ́ à bhà ke wò à dɔn maiá wo: àle mɛ̂ɛ la-mɛ̀ɛ̀' é go' Aatana pé, ke é nu' tói bhaamɛ̀ɛ̀a ye ko nɛ̀ láà à gá le. Wò mɛ̂ɛ gò zaa gi-mɛ̀ɛ̀ ni Klisi liélé sie-mɛ̀ɛ̀bò' àng pe ziàn láà, àngle wó lɛ́ɛ.

A-wùn gi, ká ka leng kún sɛ̀a, ke ká bháála' kɛɛ' láà, òo nù tó bɔɔn bhà, kɛ́ ke ka ka pe tɔnɔ' yeà láà, è nù tó' wo lémɔɔyèa, ke à ke òo nù káán à lé le.

Mai-wùn' è zin Klisi-wùn bhà láà, mɛ̂ɛ óó mɛ̂ɛ' òo tó àle tà, kɛ́ ke è gieà à tà, ke è e saa yaaà à lé, ke Aatana àa àle-mɛ̀ɛ̀ pé. Kɛ́ Klisi-wùn láà, mɛ̂ɛ ye' è tóà à-zàà tà, ke òo gó à tà laá, ke ko nɛ Aatana ké à-mɛ̀ɛ̀ pé, ke à gbe leng ké zí à pé.

A-wùn gi, mɛ̂ɛ óó mɛ̂ɛ' è nuà ka pé, ke è bhaamɛ̀ɛ̀bò dɔɔà wúnbò' gá, òo tó Klisi-wùn leng' kó à peii láà àleá laá, kao à-mɛ̀ɛ̀ sɛ́ɛ́nma lefienɛ́ góà, ke è nù bhɔ à yagò kaá kwíle-wùn' bhà le.

Atoosiwo mɛ̂ɛ' è à sɛ́ɛ́nma góà, ke à-mɛ̀ɛ̀ leng' daa' wo àbhà kɛɛ-kɔ̀ɔ̀ yóyoobò láà à pié lɛ́ɛ. Sɛ́ikwɛ́ é à léyàà à tà-wʋ̀ʋ̀

Wún' à bɛɛnzɛ̀ ka nɛ̀-wùn' nuu n bhà, e woo tuàn kpeá. Kɛ́ máá wɩ́ɩ́yè' gá à bhà ke án àle tó yaa sɛ́ikwɛ́ gi, ke án à bɔ ka nɛ̀ le. Kɛ́ n zʋʋ ké à gi ma: n lekini yáányè' lóà ka lià, le an liangzɛ ka nɛ̀ le. É kɛ̂ɛ kwɛi ke ko nà kaá-nù ko zowɛ́ɛ́ nii- nù daa' wo kiá tɔ̀kpɛ́tɔ̀kpɛ́lé le.

Ka laànɛ́ sɛ̀ɛ̀bhà-à náò' wó Aatana-à zaa tà ko pé láà, woó wɩ́ɩ́ ka bhà.