2 Thessaloniciens 1

Legilizi gi-mɛ̀ɛ̀bò' ká Tesaloni, ke ká ko nɛ Aatana ni koà Gwilinɛ Yesu Klisi-à zaa tà láà, nle Pɔli ko ni Silivɛn ni Timotee, kole kó sɛ́ikwɛ́ é à bɔii ka nɛ̀ le.

Kó wɩɩ ko: ko nɛ Aatana ni koà Gwilinɛ Yesu Klisi wò dɔ gbáágbààa ke wò gɛ̀ilɛ tó ka bhà, ke wò zí ka zowɛ́ɛ́ niidaa. Tesaloni-mɛ̀ɛ̀bòà Aatana-wùn kùn kpókpóá-kɔ̀ɔ̀

N laànɛ́bò, à-lèè ké à bhà ke kó Aatana wánglegó ka-wùn gi lɛ́nólɛ̀nó bhà. Sée à kɛ̀ɛ̀ kwɛi-yè láà àle à-kɔ̀ɔ̀ lengá le. Atoosiwo ka kpɔ́yè' é Aatana lé láà, è ló' woii liélé do, le ká kɔi dolodolo láà kanó ka lɔ̀ɔ̀' è ka ké kɛɛ láà, à ke' daa lesósó woii à tà le.

Ale kɛɛ le ko vele' dɔ́ɔ́n-á Aatana-à legilizi-bò kpe gi ka Aatana-wùn kún' wo kpókpóá, ke ka kpɔ́yè' à lé kelekelele kwɛi láà à-wùn gi le. Ka zí wɛ̀ilèèbò' ye, ni wò ka wɛ̀ikɛ̀ɛ̀ páipái' wo, ke ka à tó kun ka bhà láà, àle tó- zí ko vele to dɔ́ɔ́n-á kwɛi le.

-6 Mɛ̂ɛ- à-tùlé yè àle bhà wo: Aatana ké dɔn wún góá kéi, le è mai dɔ mai-mɛ̀ɛ̀ gɔ̀n le. Ale kɛɛ le è kɔɔ yaaà ka bhà, ke àbhà gwilinɛnɛ̀' ka wɛ̀ilèè' góii à-wùn gi láà, ká nù bhɔ dɔ̀lèè yè à bhà-mɛ̀ɛ̀ gi le. Ale kɛɛ zí le è ka bhɔlɔ go mɛ̂ɛ' wó ka wɛ̀ikɛ̀ɛ̀woii láà àng gɔ̀n le. Sée è wún kpɔ̀' àng tà kwɛi laá, ke à-lèè' à gá le.

È gò' bhi, le è zí gwɛɛ yaa ka wɛ̀ilèè' góii láà à-nàà lé, le è loo daa ka tà ko pé le. Kɛ́ koà Gwilinɛ Yesu- góà lɔngwɛ́ɛ́ gi kwee' gi, ke è nu láà, Aatana- ka bhɔlɔ góà kwɛi àle-kwèèi le. Sée e nuà kwɛi, ke àbhà kɩ́ɩ́labò' wò àbhà mɛ̂ɛnɛ̀-yààn wolo láà, wo à wɛì,

ke painɛ̂ɛ ké mànàngmànàng góii àng tà. Kɛ́ mɛ̂ɛ' wàa Aatana dɔn, ke wàa zí wo wunlé kpáá nâa sɛ̀' kó à kpɔ́ii koà Gwilinɛ Yesu-wùn-a à nɛ̀ láà, Yesu- nuà kwɛi, ke è wún kpɔ́ àngle tà le.

A-kwèèi- bhɔ̀', mɛ̂ɛ suubò' kwɛi láà, wo wáláà kpulungkpulungle, wàa yáánpáii Gwilinɛ Kpáa' é kpókpóá ke à mɔ̀ɔ̀kiá àa bhe láà à wɛí-lèè bhà. Sée wàa zí dɔ̀lèè yeii mɛ̂ɛnɛ̀ bhà à pé gbonggbongle koo. Aatana- wún kpɔ́à àng tà kɔɔ' gi, ke è tóà kwɛi kwɛi kwɛi ke à nààlé àa tóii, àle lɛ́ɛ.

Gwilinɛ Kpáa nu-kwèèi láà è bhɔ̀', à tɔ́ ké bhɔà mɛ̂ɛ' kó wɩ́ɩ́yèa à-wùn bhà, ke kó yaayèa àbhà yaa gi láà konó páipái ko-wùn gi, le mɛnó- kɔɔ léwɩɩ à nɛ̀ le. Sée Gwilinɛ Kpáa tɔ́ ké bhɔà zí ka leng ka-wùn gi kwɛi. Atoosiwo kó lo' àbhà kɩ́ɩ́lanɛ̀' kɛɛi ka finibhà láà, ko wʋʋ ké bhɔ' ka gi mai bhà, le ká wɩɩ' à-wùn bhà le.

Ale kɛɛ le ko bhàiwo ka-wùn gi lɛ́ile, ke ko nɛ Aatana- dɔ gbáágbààa ke è ka tàkún, ke é ka lee' wúnsɛ̀' gá láà, ká nù bhɔ dɔ̀lèè yè à bhà-mɛ̀ɛ̀ gi le. Kó zí bhàiwo kwɛi, ke à leng pe bháa' é à gi láà, è àle daa ka lekini ka gi, ke wúnsɛ̀ páipái' à kɛɛ-wùn' ka zʋʋ pé, ka kɔɔ- mɔɔ à tó bhà, è gò' bhi ke ka kpɔ́yè' à lé láà, ká zí dɔn àle gi-wùn sɛ̀sɛ̀bò kɛɛá le.

È tò' kwɛi, koà Gwilinɛ Yesu tɔ́ ké bhɔà ka-wùn gi, le ka lekini pe tɔ́- zí bhɔ à sáà gi, àle ni ko nɛ Aatana wó gɛ̀ilɛ' tóyèa ka bhà láà à-wùn gi le.