1	À tée do láà à gi, mɛnggoò ké go' Zudee lùu gi, le wó nu' Antiɔsi, le wó sɔɔ' wo kɔɛ́ɛ́ gieà ko laànɛ́bò nɛ̀ sɛ́ɛ́ gi wo: Káó ló-le woà gbùé bhe, ye Moizi' à-wùn yaa' wúluá kɔɔ' gi à nɛ̀ laá, ke káó la bhe.
2	Wó nuu à pe' woà kwɛi láà, e to' wún gbègó kpáaá àngle ni Pɔli ni Banaba-nù finibhà. Le wó à pe', le wó à pe', le àng tó biín fou' yaa' le. A-wùn gi, legilizi-bò ké yààkébhà kɛɛ', le wó wɩɩ' wo: Pɔli ni Banaba ninà àngbhà legilizi gi-mɛ̀ɛ̀ bhɛ́i kemò- tɔn'ng kiá Zelizalɛm, ke wò wún láà à gó kéi Yesu-à táá-mɛ̀ɛ̀bò ni legilizi liélé sí-mɛ̀ɛ̀bò zué.
3	Legilizi' bo' wʋʋ kpɔ́á àng bhà ke wò àng dɔ zaá kwɛi, àng lóyè ké bɔ' Fenisi lùu ni Samali lùu gi. Mɛ̂ɛ lefienɛ́' wàa Zuifu-a, àng tó zowɛ́ɛ́' seela' Aatana pé kɔɔ' gi, wo nuu lóà à gɛingóá dɔ́ɔ̀nle, le à gi-wùn' sɛɛ lekinilèkini wo' ko laànɛ́bò tó páipái nɛ̀ le.
4	Pɔli-nù' waa' Zelizalɛm, legilizi gi-mɛ̀ɛ̀bò ni àng liélé sí-mɛ̀ɛ̀bò ninà Yesu-à táá-mɛ̀ɛ̀bò ké àng-tɔ̀ɔ̀ kun'. Wó bo', le Pɔli ni Banaba' wún páipái' Aatana' à kɛɛ' àng kɔ̀ɔ̀tà, wó à tó gɛingo' àng nɛ̀ le.
5	Faliziɛn-bò pe gi-mɛ̀ɛ̀ kemò' nuu wɩ́ɩ́yèa Yesu-wùn bhà láà, wó walà- àle gi, le wó wɩɩ' wo: A-lèè ké à bhà ke mɛ̂ɛ' wàa Zuifu-a, ke wó daayèa Yesu pe gi láà, àng tó- ló gbùé, ke wò Moizi-à tɔ́ng kún.
6	Yesu-à táá-mɛ̀ɛ̀bò ni legilizi liélé sí-mɛ̀ɛ̀bò' bàn- ké tà àle gi, ke wò wún láà à gó kéi le.
7	Wó bo' wɩ́ɩ́á à gi pingpingle, ke àng tó biin- kpɔ́ kpókpó bhà, le Piɛli' wala', le é wɩɩ' àng nɛ̀ ye: N laànɛ́bò, à gàn ké ka yàan ka: Aatana' n lefɔ́ɔ́lé' n si' ka kpe gi à zigó gi, ke wúnsɛ̀' è go à pé láà, nle án à-nàà kpɔ́ mɛ̂ɛ' wàa Zuifu-a àng nɛ̀, ke wò à ma, ke wò kpɔ́ Yesu-wùn lé le.
8	Aatana' è bhaamɛ̀ɛ̀ tó zowɛ́ɛ́ dɔn láà, e Waa Zaazaa nuyèa àng lekini nɛ̀, ye é à nu' mɛ̂ɛ' kó Zuifu-a ko nɛ̀ fɔ́ɔ́lé kɔi láà à nɛ̀. Ale tóyèa àng dàà Yesu pe gi-yè sée-lèèa le.
9	À kɛ̀ɛ̀ kwɛiyè láà à gi, Aatana' bò' bɔ́n-le góá àng bhà, wó kpɔ́' wo' à lé láà à-wùn gi, òo nàà dokedòke daa ko nà àng gá-nù ko finibhà koo.
10	È tò' kwɛi la ò, mɛɛ kɛɛ le ká Aatana gidan-ii kwɛi, le ká tuàn tɔ́ng-gbà bháibhài yaaà Yesu pe gi-mɛ̀ɛ̀bò gwenglé, sée ke ko bhɛ́mabò ni ko lekini lefienɛ́ ko ke òo nù mɔɔ gbá láà à síá le.
11	Kɛ́ à gàn ké ko yàan ko: Gwilinɛ Yesu' gɛ̀ilɛ to' Zuifu-bò ko bhà kɔɔ' gi, ke kó layèa à-wùn gi láà, è zí gɛ̀ilɛ tóyèa àng lekini bhà à-kɔ̀ɔ̀ do láà àle gi le.
12	Piɛli' bo' àle peá kwɛi, lɛlé' dɔ' wo' mɛnó tà do zilingle, le wó wo tóló dɔ' Banaba ni Pɔli wʋʋ bhà le. Ang tà' bo' gaá kwɛi, le Aatana' sɔ́n-wùn páipái' kɛɛ', ni é lábhilibò' daa' àng kɔ̀ɔ̀tà lùu bhɛ́ibò gi láà, wó à tó gɛingo' àng nɛ̀ le.
13	Wó bo' à tó gɛingóá, le Zaki' liang yílí si', le é wɩɩ' ye:
14	N laànɛ́bò, ko faiwo ka nɛ̀. Mɛ̂ɛ' wàa Zuifu-a, Aatana zʋʋ' zana' àng-wùn-a fɔ́ɔ́lé kɔɔ' gi, ke è àng kemò sí àng finibhà, ke wò tó e zòà-lùuá láà, Simon' giè- àle pé lɛ́ɛ.
15	Sée Aatana wʋʋ léban-mɛ̀ɛ̀bò' nuu lii láà, àng tó wʋʋ ké àle gi do, atoosiwo à bɛɛn ké zɛyèa sɛ́ikwɛ́ gi wo:
16	Aatana ké wɩɩ ye: án tuàn sɛíà leekpɔ̀ɔ̀tili gi, le Davi-à kwíi' wíyèa láà, an à dɔ dɛ́ɛ wo le. Án à kpùlùbò wóóà, le an à yaa dɛ́ɛ wo kélé, le an à dɔ zué le.
17	Sée an àle kɛɛà kwɛi, ke bhaamɛ̀ɛ̀ paánbò' wò tóà bhi láà, wò nù nle Gwilinɛ Kpáa n-zàà guo' wo le. È gò' bhi, ke lùu bhɛ́i gi-mɛ̀ɛ̀bò' n tɔ́' àng bhà láà, àngle tó páipái- nù zí n-zàà guo le.
18	Nle Gwilinɛ Kpáa do' an wúnbò láà à tó kɛɛ, ke à tó páipái-nàà' zí n yàan fɔ́ɔ́lé liilììlii, ke án à tàpólóyèa bhaamɛ̀ɛ̀bò nɛ̀ láà, nle án wɩɩ lɛ́ɛ.
19	À kɛ̀ɛ̀ kwɛiyè láà à gi, mɛ̂ɛ' wàa Zuifu-a ke àng zowɛ́ɛ́' seeláii Aatana pé láà, e nle n gi sɛ̀a ke mɛngge òo zaa léta àng gɔ̀n Moizi-à tɔ́ng-wùn gi.
20	Kɛ́ kwàa sɛ́ikwɛ́ bɔ' wo àng nɛ̀, ke kó à pe ko: wò wo gban kpɔ́ pɔɔnbò' wa à zɛ yo bhà à gá, ke wò wo leng kún sɛ̀a zùàkɛɛyè gɔ̀n. È gò' bhi, ke wòo yífáa bhɛlɛ, sée ke wòo zí wii yuɛn mi.
21	Pɔɔn- à kɛɛ ke an àle pe kwɛi, àle ye: Moizi pe gi-mɛ̀ɛ̀bò ké pɛ́ɛ kpákpaabò-le tó gi, le àng zìn àbhà tɔ́ng dɔà lɔ̀ɔ́' mɔ́ le. È gò' àle gi, wo àbhà tɔ́ng-sɛ̀ikwɛ́-wʋ̀ʋ̀ pe ziàn golo-kwèèi-le tó páipái bhà Aatana-kwììbò gi. Yesu-à táá-mɛ̀ɛ̀bò' sɛ́ikwɛ́' bɔ' Antiɔsi
22	Zaki' à pe' kwɛi, le Yesu-à táá-mɛ̀ɛ̀bò ni legilizi liélé sí-mɛ̀ɛ̀bò ninà legilizi gi-mɛ̀ɛ̀ paánbò páipái' nuu bhi láà, àng tó wʋʋ' mɔɔ' à gi wo: wò mɛnggoò sí wo kpe gi, ke wò ló Pɔli ni Banaba dɔi Antiɔsi le. Zude' wó nuu à leeà Balasaba láà wó à leni Sila àng bɔ̀- àle gi le. Ang tó piilɛyè ké nuu bhaamɛ̀ɛ̀ tiàànleá, le bhɛɛ' nuu àng bhà ko laànɛ́bò finibhà le.
23	Wó lɛ́ɛtɛlɛ' à dɔ' àng gɔ̀n ke wò ló nàa láà, wo nuu à peyèa à gi wo: Yesu-à táá-mɛ̀ɛ̀bò ni legilizi liélé sí-mɛ̀ɛ̀bò' kó ka laànɛ́bòa Zelizalɛm zé é, kole kó lɛ́ɛtɛlɛ é à bɔii le. Kó à bɔ mɛ̂ɛ' ká ko laànɛ́á Yesu-à zaa tà, kɛ́ ke káá Zuifu-a, ke ká yaayèa Antiɔsi-pɛ̀ɛ̀ yáànbhà leni Sili ni Silisi lùubò gi láà ka nɛ̀. Kwéé wɩ́ɩ́ ka bhà, kwéé wɩ́ɩ́ ka bhà sɛ̀a.
24	Kó à mayèa wo: mɛnggoò' go' koó zíà, wo súó daayèa ka gi wo wʋʋá, le ka zowɛ́ɛ́ àa kpááyèa Aatana-wùn gi koo le. Kɛ́ kole kóó sée wʋʋ kekekèke kpɔ́ àng bhà.
25	-26 Ale kɛɛ le mɛnó páipái ko wʋʋ' à gi do, ke kó mɛnggoò sí ko kpe gi, ke kó àng bɔ kià nà Banaba ni Pɔli-nùa ka nɛ̀ le. Pɔɔn- àle kɛɛ kwɛi, àle ye: Banaba ni Pɔli láà àng-wùn ké ko gɔ̀n kpókpóá, atoosiwo wó wo lekini wunbílí lédɔ̀- koà Gwilinɛ Yesu Klisi-wùn' gi le.
27	Kó mɛ̂ɛ' àng bɔii àng wɛì kwɛi láà, àngle Zude ni Sila é àng gá, ke wò nù wʋʋ do' kó à bɛɛnzɛii é à léban ka bhà le.
28	Kó wɩɩ ko: àa sɛ̀a ke kó gbá bhɛ́i ke lú ka tà, ke àa à ye' à gò à bhà-lèè àa bhe àleá.
29	Atoosiwo e sia Waa Zaazaa gi, le é zí ko leng ko gi sia, ke wii ye' wa à zɛ yo bhà oo, ni wii yuɛn oo, ni yífáa oo, ke ká àle-gbàn kún le. È gò' àle gi, ke ká zí tɛ́ɛinsí zùàkɛɛyè bhà. Ka bò wúnbò láà àle tóá-yè- tóà sɛ̀a le. Kwéé wɩ́ɩ́ ka bhà sɛ̀a.
30	Wó mɛ̂ɛ' àng giela' láà, wó bo' yué daaá legilizi gi, le wó lo' Antiɔsi le. Wó waa' bhi, le wó Yesu pe gi-mɛ̀ɛ̀bò tó páipái ban' ké tà, le wó sɛ́ikwɛ́ láà à sɔɔ' àng kwenglé le.
31	Wó bo' à gaaá, à lí ké sɛɛ' àng gi, é nu' nà àng zʋʋ gbaan wʋʋ' gá láà à-wùn gi.
32	Zude ni Sila-nù lekini' nuu' wo' zí Aatana wʋʋ léban-mɛ̀ɛ̀a láà, wo liangzɛ' ko laànɛ́bò' nuu bhi àng nɛ̀ gɛnyààn kpeá, le wó àng zʋʋ gbaan', le wó àng bháa dɔ' wo wʋʋá táásì Aatana-à zaa tà-yè bhà le.
33	Bhanɛ́ ke' gie', le legilizi gi-mɛ̀ɛ̀bò' wó Antiɔsi láà wó wʋʋ kpɔ' àng bhà, ke wò sɛí yáinsaa gi, ke wò ló mɛ̂ɛ' wó àng bɔ' láà àng lià le. [
34	Kɛ́ Sila-le òo wɩ́ɩ́ ló-wùn bhà, le é to' bhi le.]
35	É go' àle gi, Pɔli ni Banaba-nù ké mɔ' Antiɔsi bhi, ke wo bhaamɛ̀ɛ̀ dɔɔii, ke wʋʋ sɛ̀' é Aatana Gwilinɛ Kpáa wʋʋá láà, wo à-nàà kpɔ́ii. Sée àngle ni àng bhámò kpe' nuu Aatana-à liangzɛ-kɩ̀ɩ̀ bhà kwɛi kiá bhi le. Pɔli ni Banaba kààn ké bhà-kɔ̀ɔ̀
36	Yiiyààn kpe ke' gie', le Pɔli' wɩɩ' Banaba nɛ̀ ye: Kwà sɛí, ke kó ló zin-i ko laànɛ́bò lià, kó Gwilinɛ Kpáa-à liangzɛ' fɔ́ɔ́lé pɛ́ɛbò' gi láà à tó páipái gi, ke wó kɔɔ' gi, kó à dɔn.
37	Banaba ké nuu woo à pé ye: Záàn' wò à lee Maki láà, à leng- ló wo wɛì.
38	Kɛ́ à-wùn òo Pɔli-le zʋʋ kún, le é wɩɩ' ye: Mɛ̂ɛ' à kààn ko bhà lɔ̀ɔ́' mɔ́ Pangfili sɛ́ɛ́ gi, ke òo ló-le ke wo ko dɔi Aatana-à gàlá lé lɛnói láà, à-lèè àa à bhà koo, ke kó à sí dɛ́ɛ ke wo, ke è ló ko wɛì.
39	À-wùn láà é daa' àng gɔ̀n wún gbègó suu' gi é, à-wàà ké to' kpókpóá, le é to' mɛ̂ɛ piilɛ láà àng kààn ké bhà gɛɛn-á le. É bo' kɛɛá kwɛi, le Banaba' Maki si', le é lo' kià nà à gá, le wó daa' yítà-gɔ̀ɔ̀ gi, le wó lo' Sipɛlɛ lùu gi le.
40	Pɔli' bhe, à leng' zí Sila' si', le wó lo' kiá, ke ko laànɛ́bò' bo bhàiwoá Gwilinɛ Kpáa zì àng-wùn gi, ke è nù gɛ̀ilɛ tó àng bhà le.
41	Wo zaa gie' Sili lùu ni Silisi sɛ́ɛ́ gi, ke wo lóii legilizi-bò bháa dɔá.