Actes 2

Pantikɔte-kwèèi' bhɔ', àng tó páipái ké nuu banyèa ké tà lɛngdo gi.

Wóò wo káá' wo, ke pɔngge viin ké góii lɔngwɛ́ɛ́ gi kpókpóá ye wàà kpáa ke nɛ̀, ke kwíi' wó nuu à gi láà, ya à pa.

Wóò zí wo káá' wo, ke pɔnggoò zán ké bhɔii àng tà tɛ́nglà ye painɛ̂ɛbò nɛ̀, ke e káán-ii ké bhà, ke e lóii yaaá àng tó gwenglé dolodolo.

É kɛɛ' kwɛi, le Waa Zaazaa' daa' àng gi, le é àng tó páipái pa', le é lùu bhɛ́i gi-wʋ̀ʋ̀bò daa' àng gwílé, le wó sɔɔ' à peà le. Wó nuu kɔi dolodolo láà, Waa Zaazaa' nuu wʋʋbò' daaà àng zʋʋ pé, àng tó' nùù gieà àle gbóló gi le.

Ale' kɛɛii kwɛi láà, ke Zuifu-bò' wó nuu sùò Aatana gɔ̀n-mɛ̀ɛ̀a, ke wo góyèa lùu ye óó ye' àle' lúyáán tà à tó páipái gi, ke wo nuyèa yaai Zelizalɛm.

Lábhili' daa' láà, bhaamɛ̀ɛ̀ ting ké gbùlù kaan', le wó nu' à viin bhà le. Wó waa' bhi, à-mài ké àng ni' miniminiyèa, atoosiwo mɛnó ké nuu mɛ̂ɛbò láà àng wʋʋ maà wo lekini pe wʋʋ gi.

Wo nuu màiwoà, le wò kábhawo, le wò à pe wo ké nɛ̀ wo: Élaò, mɛ̂ɛ' wó wɩ́ɩ́ii é, àng tó wàa Galilee-mɛ̀ɛ̀bòa è?

Le à-kɔ̀ɔ̀- lɔ, le kó kɔi dolodolo é, mɛnó kó àng wʋʋ maii ko lekinilèkini pe wʋʋ gi le?

Sée mɛ̂ɛ' kó nuyèa zé é, Pate-bò ké bhi, Mɛde-bò ké bhi, Elamite-bò ké bhi, Mezopotami-mɛ̀ɛ̀bò ké bhi, Zudee lùu gi-mɛ̀ɛ̀bò ké bhi, Kapadosi-mɛ̀ɛ̀bò ké bhi, Pɔnti-mɛ̀ɛ̀bò ké bhi, Azi-mɛ̀ɛ̀bò ké bhi,

Filizi-mɛ̀ɛ̀bò ké bhi, Panfili-mɛ̀ɛ̀bò ké bhi, Ezite-mɛ̀ɛ̀bò ké bhi, Libi lùu pɛ́ɛ́n ye' é Silɛni-pɛ̀ɛ̀ maabhà za láà à gi-mɛ̀ɛ̀bò ké bhi, le mɛ̂ɛ' wó go' Wɔlɔm, wó zí bhi le. Ko kemò ké Zuifu lengá, le ko kemò-le ko daayè' gá Zuifu-bòà sée gi le.

Kɛlɛti-mɛ̀ɛ̀bò ké bhi, le Lalabu-bò' zí bhi le. A-kɔ̀ɔ̀- lɔ, le mɛnó kó mɛ̂ɛbò é àng yeii, ke wo Aatana kɛɛ-wùn kpákpaabò gɛingóii ko lekinilèkini ko pe wʋʋbò láà à gi kwɛi le?

A-mài àng tó niyè láà à gi, ke wóò wʋʋ' pe àa bhe, le wó sɔɔ' à peà wo ké nɛ̀ wo: Mɔ̀ng-wùn' kwɛi le?

Kɛ́ le mɛnggoò-le wó nuu sóósíà Yesu-à táá-mɛ̀ɛ̀bò bhà wo: Wɩ̂ɩ' àng kúnyèa sɛ̀a lɛ́ɛ. Liang' Piɛli' à zɛ' Waa Zaazaa nu-kwèèi

Wó nuu à peà kwɛi, le Piɛli ninà à bhámò Yesu-à táá-mɛ̀ɛ̀ buu-ni-wɛ́ɛ́-do láà wó dɔ' gɛɛn bhà le. Piɛli' e wʋʋ léwalà- àle gi, le é wɩɩ' bhaamɛ̀ɛ̀' nuu bhi láà àng nɛ̀ ye: Zuifu-bò tiàànle' ká zé é, ni mɛ̂ɛ páipái' ká nuyèa Zelizalɛm, ko faiwo ka nɛ̀! À gàn- tó ka yàànlé ka:

Mɛ̂ɛbò é, wɩ̂ɩ àa àng kúnyèa ye é ka zʋʋ pé kɔɔ' gi láà à nɛ̀. Pɔɔn- à kɛɛ ke an àle pe kwɛi, àle ye: lee ké kpɔɔ' dɛ́ɛá, le à lɛ́ɛ́lɛ́ɛ́ yakanàà' tuàn é le.

Kɛ́ Aatana wʋʋ léban-mɛ̀ɛ̀ Zoɛli' wún' pe' lii láà, àle gi-wùn' kɛɛyèa é le.

Ale bɛɛn' zɛyèa Zoɛli-à sɛ́ikwɛ́ gi wo: Aatana ké wɩɩ ye: Lúyáán léyaalé- bhɔ̀' kúlúá, án nbhà Waa Zaazaa ke gúlúà bhaamɛ̀ɛ̀ tó páipái tà. Ka gbebò ni ka lúbò ké n wʋʋ léban-à. Kaà zuànnɛ́bò yáin ké daaà, le kaà mɛ̂ɛkpáò yánbhà- dɔ le.

Mai lekinilèkini' à gá le. À bha láà è bhɔ̀', án nbhà Waa Zaazaa gúlúà nbhà gùábò' wó miɔnbò ni nɔ́ngbòa àng tó tà, le wò n wʋʋ léban le.

Án lábhili daaà tɛ́nglà lɔngwɛ́ɛ́ gi, le an wún súnmagò à bhà-pɔ̀ɔ̀nbò kɛɛ sɛ́ɛ́ tà sáaá le. Yuɛn ké káán-à à gi, pai ké doloà à gi, le à gbúu-gbɛ̀ɛ̀n- yaa bìlìbìlìle le.

Gwilinɛ Kpáa nù à bhà lóó ké tóà liélé, le yáán- tala tíiá, le mɛ̂ɛ- taan tɛ́ɛ́n-á ye yuɛn nɛ̀ le. È bò' kɛɛá kwɛi, le lábhili-wùn kpáa' è Aatana tɔ́ bhɔà láà, à kɛɛ-kwèèi' è tóà Gwilinɛ Kpáa nù à bhà lóó lengá, è nuu bhɔà le.

Kɛ́ wúnbò láà é kɛɛà kwɛi tée' gi, mɛ̂ɛ óó mɛ̂ɛ' è bhàiwoà Gwilinɛ Kpáa zì ke è táá e pé, à-mɛ̀ɛ̀ ké laà.

Piɛli' bo' gieá Zoɛli wʋʋ gbóló gi kwɛi, le é wɩɩ' ye: Izalae-bò, kà ka tóló dɔ wʋʋ é à bhà. Yesu Nazalɛti-mii láà, Aatana lekini' yɛnɛ yaa' à wʋʋ lé, le é sɔ́n-wùnbò ni lábhili-wùnbò ni wún súnmagò à bhà-wùnbò kɛɛ' ka yàànlé le. Ale to' Aatana kɛ́ɛ kpɔ̀ à bhà-kɔ̀ɔ̀a ka finibhà le. Ka lekini ká àle gànnu kwɛi.

Sée é nuu Aatana yàànlé ye: wò Yesu lédɔ ka nɛ̀ kɔɔ' gi, ke à lekini' nuu à-wùn yaayèa e zʋʋ pé fɔ́ɔ́lé lii láà, wó nù- à kɛɛi àle-kɔ̀ɔ̀ bhà le. É go' bhi, le ká bɔ' wúnyóo kɛɛ-mɛ̀ɛ̀bò' wàa súó Aatana gɔ̀n àng tà, le ká pɔ́ngti gbaan' à kɔɔ ni à gɛɛnbò tà yílí bhà, le ká à zɛ' le.

Kɛ́ Aatana ké ga bhɛɛ kaan' à bhà, le é à zana' le. Atoosiwo ga kɔɔ àa woo mɔɔii à bhà, ke à wunbílí- tó à gi.

Pɔɔn- àle kɛɛ kwɛi, àle ye: gwilinɛ Davi ké à pe' à-wùn gi lii ye: N yáán ké nuu Gwilinɛ Kpáa bhà n liélé lɛ́ile, atoosiwo àle yaayèa n maagɛ̀n n kɔɔ sɛ̀ tà, ke n bhà òo nù viin le.

A-wùn gi, n zowɛ́ɛ́ nii ké daayèa, le án n liágóii le. Yàa ni n-gèè lefienɛ́ yéè kpáá, n zʋʋ- n zanayè' gi le.

Atoosiwo Aatana, yáá n níi tóii gɔɔ̀le, sée yáá wɩ́ɩ́ii à bhà zí, ke i zòà-mɛ̀ɛ̀-gèè- búú.

Sii' àa yɛn, í à sɔ̀lɔ̀ à tà-zàà gieyèa n nɛ̀. N yáán ké páà i bhà, le n zowɛ́ɛ́ nii- daa tɔ̀kpɛ́tɔ̀kpɛ́lé le.

Piɛli' bo' gieá zí Davi wʋʋ láà à gbóló gi kwɛi, le é wɩɩ' ye: N nɛànɛ́bò, kwàa faiwo ka nɛ̀! Án à pe ka nɛ̀ tàpúúá ma: ko bâa Davi-le' ga' wo', le wó à kpɔ̀lèè go', le ko yáán' tuàn à bu bhà tenglé-yààn é à gi pée zé le.

-31 Kɛ́ Davi' nuu' wo' Aatana wʋʋ léban-mɛ̀ɛ̀a láà, à gàn ké nuu à yàan ye: Aatana ké píníwoyèa e nɛ̀, le é sele kpɔ́yèa e leng lé ye: é ebhà gwilinɛnɛ̀ lébhɔà à ginɛ́ do ke nɛ̀, le è yaa à yàà-lià le. À kɛ̀ɛ̀ kwɛiyè láà à gi, Davi' à pe' wo' ye: Aatana òo à tó gɔɔ̀le, ke à-gèè- búú láà, é Klisi gò gɔɔ̀le-wùn láà àle to' dɔ́ɔ́n-á, le é à-lèè ye', le é à pe' kwɛi lɛ́ɛ.

Yesu láà, Aatana- àle zanayèa, le à pe gi-mɛ̀ɛ̀ páipái' kó zé é, konó kó à séeá le.

É bo' tɔnng-á lɔngwɛ́ɛ́ gi e nɛ Aatana bháa bhà, le Aatana' ebhà Waa Zaazaa' à-wùn pe' fɔ́ɔ́lé láà, é à nu' à nɛ̀ le. À leng- zí àle bɔyèa ko nɛ̀, le ka lekini ka yánwɛ́ɛ́' à-lèè bhà, le ka tólókwɛ́' à-wùn gi é le.

Atoosiwo Davi-le òo ló lɔngwɛ́ɛ́ gi, kɛ́ à lekini ké wɩɩ' Yesu-wùn gi ye: Aatana Gwilinɛ Kpáa ké à pe' n nɛ gwilinɛ nɛ̀ ye: Bhè yalá n kɔɔ sɛ̀ gi zé,

ke í tó bhi kwɛi flúúlé, ke án i yáòbò tó tó i gɛin-sàbháá.

À kɛ̀ɛ̀ kwɛiyè láà à gi, Izalae-bò páipái' ká zé é, à gàn- tó ka yàan ka: Yesu do' ká à zɛ' yílí bhà láà, Aatana- àle tóyèa koà Gwilinɛ Kpáa-á, le é zí à yaayèa ebhà yaa-mɛ̀ɛ̀' wò à lee Klisi láà à gá le.

Mɛ̂ɛ' wó nuu bhi, wó bo' wʋʋ láà à maá, e lo' àng tó gɔ̀n dɔ́ɔ́n-á, le pai' kaan' àng zʋʋ bhà, le wó à pe' Piɛli ni Yesu-à táá-mɛ̀ɛ̀ paánbò láà àng nɛ̀ wo: N nɛànɛ́bò, ko à-kɔ̀ɔ̀ keeà lɔ àlei le?

Le Piɛli' à yoobɔ' àng gɔ̀n ye: Kà ka kɔɔ gó' wo ka sɔng lé, ke ká wɩ́ɩ́ à bhà, ke wò ka dàà Yesu Klisi pe gi-zùlù wo dolodolo, ke Aatana- nù ka bhàwùn tó le.

Ka à kɛ̀ɛ̀' kwɛi, e ka gbaà Waa Zaazaa-a. Atoosiwo ko nɛ Aatana Gwilinɛ' Waa Zaazaa nu-wùn píní' wo' láà, é à wo leng wò- kale ka nɛ̀ le. Sée é zí à wò- kwɛi ka ni kaà náò ni mɛ̂ɛ páipái' àng-lèè' dɔ́ɔ́n-á, ke àng lee-wùn' tuàn à bhà, ke wò daa à pe gi gbanggbaale láà àngle tó nɛ̀ le.

Piɛli ké mɔ' gieà àng nɛ̀ wún pé dɔ́ɔ̀nle, ke e àng bháa dɔii ye: Kà káán kɛɛ-kɔ̀ɔ̀ yóo-mɛ̀ɛ̀bò' wó tenglé-yààn é à gi é àng bhà, ke wún' è kpɔ́à àng tà láà, ká nù la à gɔ̀n.

Piɛli' wʋʋ' pe' láà, mɛ̂ɛ' wó wɩɩ' à bhà, wo àng dàà Yesu pe gi-zùlù wo', le kwɛngdo láà à gi, Yesu pe gi-mɛ̀ɛ̀bò dààpé' daa' bhaamɛ̀ɛ̀ wáá yaka sínmáá le.

Yesu-à táá-mɛ̀ɛ̀bò' nuu àng dɔɔà táásì àbhà zaa tà-yè' gá lɛ́ile láà, àng leng ké nuu à-wùn kún-à kpókpóá kelekelele. Angbhà laànɛ́nɛ̀ ké nuu yɔ́ɔ́n-à, le àng kɔɔ àa nuu góà wo ké kwenglé le. Wo nuu liɛ̀ kɛɛà kiá, le wó nuu bhàiwoà kiá lɛ́ile le. Wó nùù à kɛɛà kwɛi' wo flúúlé, le wàa nuu káán-à ké bhà le. Yesu pe gi-mɛ̀ɛ̀bò lɔ̀ɔ̀ ké nuu wo ké kɛɛà lenglèngwo

Yesu-à táá-mɛ̀ɛ̀bò ké nuu lábhili-wùn ni sɔ́n-wùnbò kɛɛà kpeá, le núnú àa nuu à bhà le. A-wùn gi, mɛnómɛ̀nó ké nuu súóà Aatana gɔ̀n.

Sée kpɔ̀ Yesu lé-mɛ̀ɛ̀bò láà àng tó ké nuu lɛngdo gi, le àngbhà pɔnópɔ̀nó' nuu ké tà do le.

Wo nuu woà sɛ́ɛ́bò ni wo ye-pɔ̀ɔ̀nbò lóódɔà, le wò à sɔ̀ɔ́n gulu wo ké tà, le mɛ̂ɛ' bhe, à pe- bhɔ à pe kpala gò à bhà-pɔ̀ɔ̀n gi le.

Lee' nuu kpɔɔà kɔi dolodolo, wàa nuu sɛíà Aatana-kwìle. Ang tó zowɛ́ɛ́ ké nuu ké tà do. Wo nuu lóà liɛ̀ kɛɛá ké bhà ziàn kwíi bhɛɛ tà dɔ́ɔ̀nle, le wò à gi-pɔ̀ɔ̀n bhɛlɛ sóósíá, ke àng gwílé ké pólóyèa wo ké nɛ̀ le.

Wo nuu Aatana wánglegóà, le àng liá' nuu waaà pɛ́ɛ-mɛ̀ɛ̀bò tó gi le. Lee' nuu kpɔɔà kɔi dolodolo, Gwilinɛ Kpáa ké nuu bhaamɛ̀ɛ̀ dɛ́dɛɛbò laà, le è àng daa legilizi gi-mɛ̀ɛ̀bò pé le.