1	Línaa láà é bo' yɛn-á, Pɔli ké Yesu pe gi-mɛ̀ɛ̀bò ban' ké tà, le é àng zʋʋ gbaan' le. É bo', le é yué daa' àng nɛ̀, le é wala', le é lo' Masedoni lùu gi le.
2	E gie' lùu láà à pé, ke e liangzɛii Yesu pe gi-mɛ̀ɛ̀bò' nuu bhi láà àng nɛ̀ kpáaá, ke àng zʋʋ- nù gbaan. É go' bhi, le é lo' Gɛlɛki lùu gi,
3	le é mɛ̂ɛ yaka kɛɛ' bhi le. Kɛ́ yéè woo yítà-gɔ̀ɔ̀ sí tée' gi, ke è ló Sili lùu gi láà, le é to' le é à ma' wo: Zuifu-bò ké kpɔ́yèa à gɔ̀n gbá gi le. É à yàà e zʋʋ pé àle gi ye: é sɛí e gbólóá, ke é bɔ dɛ́ɛ wo Masedoni lùu gi le.
4	Belee-mii Sopatɛli' é nuu Pilu gbeá, ni Alisitaki ni Sekɔɔn' wó nuu Tesaloni-mɛ̀ɛ̀bòa, ni Gayu' é nuu góà Dɛlibu, ni Tisiki ni Tolofimu' wó nuu góà Azi lùu gi, leni Timotee, àngle wó nuu Pɔli táá yóóbòa le.
5	Kɛ́ mɛ̂ɛbò láà àngle tó ké daa' liélé, le wó dɔ' ko gɔ̀n Toloa le.
6	Búlù' sɛ́kɛ àa à bhà, wò à bhɛlɛ fɛ́ɛti' tà láà, é bo' gieá, le kole kó nuu yítà-gɔ̀ɔ̀ síà Filipe, le yáángɛɛn solu' gie', le kó mɛ̂ɛbò láà àng ta' Toloa, le kó yáángɛɛn saapiilɛ kɛɛ' bhi le. Etiku zana-kɔ̀ɔ̀
7	Kó nuu banyèa ké tà lóówun zigó-kwèèi yáánpa, ke kó Gwilinɛ Kpáa-à liɛ̀ kɛ̂ɛ, Pɔli ké nuu gieà wún pé mɛ̂ɛ' wó nuu bhi láà àng nɛ̀. À ló-wùn' nuu' wo' bhe à tàalà láà, e to' liangzɛà flúúlé, le gbɛi zué' bhɔ' le.
8	Kó nuu banyèa ké tà táázi-kwìì gélé-lèè' gi tɛ́nglà láà, làngbha ké nuu bhi bɛ́ɛ́á.
9	Zuànnɛ́ do ke' nuu bhi, wo nuu à leeà Etiku. E nuu yaláyèa kwíi bháng tà fɛnɛtɛlɛ lé. Pɔli ké to' liangzɛà àng nɛ̀, le yi' gie' zuànnɛ́ láà à gá filingle, le é go' tɛ́nglà laí, le é dala' sáaá, le wó à léwala' geeá le. Atoosiwo é gò- kwíi láà à dɔ̀ ké tà-lèè yakanàà' gi tɛ́nglà, le é dala' kwɛi le.
10	Kɛ́ é bo' kɛɛá kwɛi, le Pɔli' zinna', le é dun' à tà, le é à si', le é à kpɔ' e gban gi, le é wɩɩ' ye: Síka òo tóà ka gi. À níi ké tuàn à gi.
11	-12 É à pe' kwɛi, le wó lo' nàa zuànnɛ́ láà à gá, ke e yáányèa, le é to' mɛnó páipái zowɛ́ɛ́ niidàà à gi-wùn kpáaá le. Pɔli' tɔnng dɛ́ɛ wo', le é búlù tutu kaan', le wó à bhɛlɛ' le. Wó bo', le é zí mɔ́ dɛ́ɛ ke wo' liangzɛà àng nɛ̀ flúúlé, le yué' bhɔ', le é nuu lóà le. Pɔli gò Toloa ke è ló Milɛti-kɔ̀ɔ̀
13	Kɛ́ kole kó daa' Pɔli liélé yítà-gɔ̀ɔ̀ gi, le kó lo' Aso le. Atoosiwo táásì gɛɛn tà-wùn ké nuu à zʋʋ pé. É wɩ̀ɩ̀ ko nɛ̀ àle gi ye: Kó nù ké ta Aso, ke koà yítà-gɔ̀ɔ̀- nuu à síà bhi le.
14	Kó bo' lóá, ke à leng- nu ke è ko ta Aso, le yítà-gɔ̀ɔ̀' à si', le kó lo' kià Mitilɛni le.
15	Kó zí go' bhi, le kó lo' ko liélé, le kó waa' à tàalà yí zué-sɛ̀ɛ̀' wò à lee Kio láà à maabhà le. À pe tàalà' bhɔ', le kó lo', le kó zí waa' yí zué-sɛ̀ɛ̀ bhɛ́i ke' wò à lee Samosi à gi, le à pe tàalà, le kó nuu waaà Milɛti le.
16	Pɔɔn' à kɛɛ' ke kó lo' tɩnggbɩɩle do láà, àle ye: Pɔli ké nuu à yaayèa e zʋʋ pé ye: é gieà Efɛzi-lèè tà e gɛɛn-á, yáá dɔlɔ́ii bhi, é kɛ̂ɛ kwɛi ke bha òo nù gie e tà Azi sɛ́ɛ́ gi. Atoosiwo e nuu lóà váánlé, ke è tò' mɔɔ-wùn-a, é nù waa Zelizalɛm, ke Pantikɔte-fɛ̀ɛ̀ti kɛɛ-kwèèi- bhɔ e bhà bhi. Pɔli' liang' zɛ' Efɛzi-lègilizi liélé sí-mɛ̀ɛ̀bò nɛ̀
17	Kɛ́ kó bo' waaá Milɛti, le Pɔli' mɛ̂ɛ bɔ' legilizi liélé sí-mɛ̀ɛ̀ yemò' wó nuu Efɛzi láà àng lee lià le.
18	Wó bo' waaá à lià, le é wɩɩ' àng nɛ̀ ye: Án mɔ́ páipái' wo' ka pé zé é, n táá-kɔ̀ɔ̀ ye' nuu ka finibhà, é si' n gɛɛn dàà Azi sɛ́ɛ́ gi-kwèèi fɔ́ɔ́lé bhà, ke è zin nàa à gá tenglé bhà, ká à tó dɔn.
19	Án n wunlé kpaa' Gwilinɛ Kpáa nɛ̀ kɔɔtókɔ̀ɔ̀tó gi, ke máá n leng sí kpáaá wúnggewùngge gi. Án àbhà bháála kɛ̀ɛ̀ kwɛi' wo yáingbɔɔn gi, ke án kúnyèa n leng kwenglé, Zuifu-bò' n yàngbhabò' waa', ke wó kpɔ' nà à gá n gɔ̀n gbá gi láà à tó finibhà le.
20	Ka leng ká à gànnu ka: wún ye' àle dɔnyè tɔnɔ' ka bhà, mɔ́ɔ́ àle kekekèke bànàkpɔ́ ka bhà. Wánglafila án à tó pe' ka nɛ̀ tàpúúá, le án ka dɔɔ' à gá téng-lé-lèè ni kwíle-lèèbò gi dɔ́ɔ̀nle le.
21	Án n kɔɛ́ɛ́ gie' Zuifu-bò ni mɛ̂ɛ' wàa Zuifu-a àng tó nɛ̀ sɛ́ɛ́ gi ma: wò wo kɔɔ gó wo sɔng lé, ke wò solong kún Aatana nɛ̀, ke wò kpɔ́ koà Gwilinɛ Yesu lé.
22	Kɛ́ tenglele lé, an kpalayè' gá Waa Zaazaa gɔ̀n, le án lóii Zelizalɛm é le. Wún' è n sɔlɔà bhi, mɔ́ɔ́ àle dɔn bhe.
23	Kɛ́ sée an gie pɛ́ɛ óó pɛ́ɛ' gi, Waa Zaazaa ké à pe n nɛ̀ ye: n kààso kɛɛ-wùn ni n wɛ̀ikɛ̀ɛ̀wo-wùn ké bhe n liélé.
24	Sée n lekini pe mɔ́-wùn-le àa n gɔ̀n kpókpó dokedòkeá, ke án nù yaa àle-zʋ̀ʋ̀gɔ̀ɔ̀n tà. Kɛ́ án táá' sí-ii é oo, ni Gwilinɛ Yesu' ebhà bháála' dɔyèa n kɔ̀ɔ̀lé é oo, an dɔà kɔɔ' gi ke àle wun- ban péele sɛ̀a laá, an àle-lèè guoii le. Sée àbhà bháála' é à dɔyèa n kɔ̀ɔ̀lé kwɛi láà, àle Aatana- gɛ̀ilɛ' to mɛ̂ɛ bhà láà à-wùn-nàà sɛ̀ kpɔ́yèa le.
25	Sée kó dɔɔ' wo é, à gàn' daa n yàan ma: mɛ̂ɛ páipái ye' án gie' Aatana-à gwilinɛ-wùn-nàà kpɔ́á ka kpe gi láà, kale ka ke àa tuàn n wɛí-lèè yeà koo.
26	Ale kɛɛ le án à peii ka nɛ̀ tenglé tàpúúá ma: mɛ̂ɛ páipái' ká zé é, ka kekekèkeà lángga àa tóii n bhà.
27	Pɔɔn- à kɛɛ ke an àle pe ka nɛ̀ kwɛi láà, àle ye: án Aatana zʋʋ pé-wùn tó páipái lébanyèa ka bhà. Mɔ́ɔ́ à dokedòke bànàkpɔ́ ka bhà.
28	À kɛ̀ɛ̀ kwɛiyè láà à gi, ká ka zʋʋ kpɔ́ ka lekini gi, ke ká zí ka zʋʋ kpɔ́ Waa Zaazaa' ka yaayèa Aatana pe gi-mɛ̀ɛ̀bò' àng wunlé láà àng tó gi, ke ká yáán tó àng bhà ye fálábò- yáán to tolo-pɔ̀ɔ̀n bhà kɔɔ' gi láà à nɛ̀. Aatana' ebhà legilizi' tàboo' e lekini gbe yuɛn-á láà, ká à légba sɛ̀a.
29	Kɛ́ à gàn ké n yàan ma: an bò' lóá, bhaamɛ̀ɛ̀ bhɔ-kɔ̀ɔ̀ yóyoobò ké waaà ka kpe gi n zíà. Wàa Aatana pe gi-mɛ̀ɛ̀bò ka bhàfɩɩ tóii. Wo gisie daaà ka gi ye lòngyokpáa- ziàn gisie daa tolo-pɔ̀ɔ̀nbò gi kɔi láà à nɛ̀.
30	Mɛnggoò ké zí waláà ka kpe gi leng bhà, le wò mɛ̂ɛ dàà wún gi-wʋ̀ʋ̀bò pe, ke wò nù Yesu pe gi-mɛ̀ɛ̀bò légbielá wo wɛì le.
31	A-wùn gi, ká yaa ka zʋʋá. Ka zʋʋ òo góà ka: án nuu ka finibhà tée' gi láà, án nuu ka síà dolodolo, le an liè dɔ ka tà le. Án àle kɛɛ' kwɛi flúúlé yáán gi ni gbɛi gi tó bhà kwee yaka tà, ke n yáín lenglèng ké bannáii ka-wùn gi le.
32	Kɛ́ dɔ̀ya é à gá, an ka-wùn tánáii Aatana Gwilinɛ lekini oo, ni è gɛ̀ilɛ' to mɛ̂ɛ bhà ziàn, wò à tàpolo mɛ̂ɛ nɛ̀ wʋʋ' gá láà oo, àngle bhà le. Atoosiwo sé- àle nɛ̀, ke è ka bháa dɔ, ke ka gɛɛn- sɛ́ɛ́ kún àbhà zaawɛ́ɛ́ tà le. Ale do láà àle zí mɔɔà leekpɔ̀ɔ̀tili-sànmá' é à yaayèa e pe gi-mɛ̀ɛ̀bò gɔ̀n láà à nuá ka leng ka nɛ̀ le.
33	Mɔ́ɔ́ nu wɛ́i ni sánng ni wélé guoi mɛngge ka lé.
34	Ka lekini ká à gànnu ka: n kɔɔ do' n lé é, àle nuu bháála kɛɛà, le é nuu ko ni n táá yóóbò konó ko góà kpala gi le.
35	Sée án àle kɛɛ' kwɛi, ke án à gie ka nɛ̀ ma: à-lèè ké à bhà ke mɛ̂ɛ- bháála kɛ̂ɛ kwɛi, ke sé àa mɛ̂ɛbò' àng nɛ̀ láà, mɛ̂ɛ- àng tàkún. A-lèè ké à bhà ke mɛ̂ɛ zʋʋ òo gó Gwilinɛ Yesu' wʋʋ' pe' à gá. Atoosiwo à lekini ké wɩɩ' ye: Mɛ̂ɛ' i i bhá-bhààmɛ̀ɛ̀ gba, i-mɛ̀ɛ̀ pe ké sɛ̀a, e gie mɛ̂ɛ ye' wò à gba láà àle pe tà.
36	Pɔli' bo' à peá kwɛi, le àle ni Efɛzi-mɛ̀ɛ̀bò láà àng tó' zinna' wo kpóng gi kiá, le é bhàiwo' Aatana zì àng-wùn gi le.
37	Wó bo', àng tó páipái ké nuu wosíà Pɔli bhà, le wó nuu yeleà à vele bhà, ke wo à kpíníbhà mi-ii, ke wo à foobhi daaii le.
38	É à pe' wo' ye: wàa tuàn yáánpáà e wɛí-lèè bhà koo láà, àle nuu wɛ̀i ban lekini woà àng tà bháalé le. Wó bo', le wó lo' à dɔi zaá yítà-gɔ̀ɔ̀ lé le.