1	Ko ni àng gá-nù kó bo' káán-á ko ké bhà, le kole kó yaa' yítà-gɔ̀ɔ̀ gi, le kó ko pe ló wo' tɩnggbɩɩle yí zué-sɛ̀ɛ̀' wò à lee Kɔsi láà à gi le. À pe tàalà' bhɔ', kó lo' yí zué-sɛ̀ɛ̀ bhɛ́i ke' wò à lee Wɔlɔde láà à gi. Kó go' zí bhi, le kó lo' Patala le.
2	Kó yítà-gɔ̀ɔ̀ do ye' bhi, ke à wɛ̂ɛ ké à gi Fenisi lùu gi za, le kó daa' à gi, le kó lo' le.
3	Yí zué-sɛ̀ɛ̀' wò à lee Sipɛlɛ láà, kó waa' à tée gi, ke mɛ̂ɛ ké yaa yítà-gɔ̀ɔ̀ gi, le mɛ̂ɛ- à ye, kó à to' ko kɔɔ kpáná tà za, le kó bɔ' yítà-gɔ̀ɔ̀ gi wia, ke ko wɛ̂ɛ ké à gi Sili lùu tà za le. Kó waa' Tiili, le koà yítà-gɔ̀ɔ̀' dɔlɔ' bhi le. Atoosiwo gbá' nuu á gi láà, é nùù lóà bhi' wo le.
4	Kó Yesu pe gi-mɛ̀ɛ̀ kemò ye' bhi, le kó yáángɛɛn saapiilɛ kɛɛ' àng lià le. Wo nuu à peà Pɔli nɛ̀ Waa Zaazaa wʋʋá wo: òo lóà Zelizalɛm.
5	Kɛ́ lóówun do láà àle' bo' zin-á kélé, kó walá' wo', le kó lo' le. Yesu pe gi-mɛ̀ɛ̀bò' nuu péng bhi miɔnbò ni nɔ́ngbò ni náòa láà, àng tó ké lo' ko dɔi zaalé, le kó lo' kiá flúúlé, le kó go' pɛ́ɛ yáànbhà, le kó daa' gbɛ̀ɛɛ zì le. Kó waa' kɔ̀ɔ̀yí kpúnglé, le ko nà àng tóá kó zinna' ko kpóng gi, le kó bhàiwo' Aatana zì le.
6	É go' àle gi, kó bo' yué daaá ko ké nɛ̀, le kole kó daa' yítà-gɔ̀ɔ̀ gi, le àngle wó sɛsi', le wó lo' woó kwíle le.
7	Kó bo' góá Tiili, le kó waa' Tolemai, le kó go' yítà-gɔ̀ɔ̀ gi le. Kó lo' wɩ̀ɩ̀bhà kɛɛi ko laànɛ́bò bhà, le kó yáángɛɛn do kɛɛ' àng lià bhi le.
8	À pe tàalà' bhɔ', kó go' bhi, le kó lo' Sezalee le. Kó waa' bhi, le Yesu-wùn-nàà sɛ̀ kpɔ́-mɛ̀ɛ̀ Filipu' ko yago' e pé kwíle le. Legilizi légièwo-mɛ̀ɛ̀ saapiilɛ' Yesu pe gi-mɛ̀ɛ̀bò' àng yaa' Zelizalɛm ziàn láà, àng gi dini' nuu à gá le.
9	À lúbò yisɛ ké nuu bhi, ke àng ke òo yaa gɔnɔ bhà bhe. Ang tó ké nuu Aatana wʋʋ léban-à ziàn.
10	Kwéé woo yii bhi kpeá, le Aatana wʋʋ léban-mɛ̀ɛ̀ ke' wó nuu à leeà Agabu láà é go' Zudee lùu gi, le é yɔɔ' ko lià le.
11	É waa' bhi, le é Pɔli-à kiásili si', le é à puola' e kɔɔ ni e gɛɛnbòa, le é wɩɩ' ye: Waa Zaazaa ké wɩɩ ye: kiásili é, é mɛ̂ɛ' à peá láà, à-mɛ̀ɛ̀- wàà' Zelizalɛm laá, Zuifu-bò- à yeleà kwɛpɛ́lɛ' wo, le wò à lédɔ mɛ̂ɛ' wàa Zuifu-a àng nɛ̀ le.
12	Kó bo' àle maá kwɛi, ko ni bhi-mɛ̀ɛ̀bò konó kó gbaan' wo' bhàiwoà Pɔli zì ko: òo tɔnng-à Zelizalɛm le.
13	Kɛ́ le Pɔli' wɩɩ' ye: Mɛɛ kɛɛ le ka à kɛɛ kwɛi, le ka wosi ke n gbɔ̀i- yɛn le. Atoosiwo è tò' nle n pe bhà laá, yàa tóii n yele-wùn-le lengdo bhà, wánglafila án wɩ́ɩ́yèa à bhà ke wò n zɛ lefienɛ́ wo Zelizalɛm koà Gwilinɛ Yesu-wùn gi.
14	Kó à gaa' ko: ko wʋʋ àa mɔɔii à bhà, ke è à kún ko pe láà à bhà laá, le kó ko bo' bhàiwoá à zì, le kó wɩɩ' ko: À ye' è sɛɛà Gwilinɛ Kpáa nɛ̀, àle- kɛ̂ɛ le.
15	Yiiyààn kpulunɛ́ ke' bo' gieá à zìpieta, le kó ko tàmò baa', le kó tɔnng' Zelizalɛm le.
16	Yesu pe gi-mɛ̀ɛ̀ kemò ké zí go' Sezalee, le wó lo' ko dɔi bhi mɛngge' wó nuu à leeà Manazon à pé kwíle, ke ko-tɔ̀ɔ̀- nù tó àle tà le. Manazon láà, Sipɛlɛ lùu gi-mii' nuu à gá, le à dàà Yesu pe gi lɔ̀ɔ́' woo mɔ́ le. Pɔli lò zin-i Zaki-nù lià-kɔ̀ɔ̀
17	Ko wàà Zelizalɛm-wùn ké sɛɛ' ko laànɛbò' nuu bhi àng tó nɛ̀.
18	À tàalà' bhɔ', Pɔli ké daa' ko nɛ̀ liélé, le kó lo' kiá Zaki lià le. Legilizi liélé sí-mɛ̀ɛ̀bò tó páipái ké nu' ban-i ké tà bhi.
19	Pɔli' bo' wɩ̀ɩ̀bhà kɛɛá àng tó bhà, le Aatana' wún páipái' kɛɛ' à kɔ̀ɔ̀tà mɛ̂ɛ' wàa Zuifu-a àng finibhà láà, é dɔ' à tó bhɛɛ tà àng nɛ̀ dɔ́ɔ̀nle le.
20	Wó bo' à gɛin-le maá kwɛi, wo Aatana wánglegó' wo' à-wùn gi le. Wó bo', le wó wɩɩ' Pɔli nɛ̀ wo: N laànɛ́ Pɔli, bhè lɛgaa, ke Zuifu wáá wúlú' wó wɩ́ɩ́yèa Yesu-wùn bhà é, àng tó páipái ké yeleyèa Moizi-à tɔ́ng bhà kelekelele.
21	Kɛ́ bhè à gaa, ke wo i peyèa àng nɛ̀ wo: í wʋʋ kpɔ́yèa Zuifu páipái' wó yaayèa lùu bhɛ́ibò gi àng tó bhà ye: wò wo kɔɔ gó Moizi-à tɔ́ng zì. Àngbhà náò wòo lóà gbùé koo. Wòo koà lùu gbanbò kún-à koo.
22	È tò' kwɛi, kó à kún lɔ, sée ke í nuyè' gá é, àa nuii tói bànàkpɔ́ gi le?
23	A-wùn gi, kóò wún' pe i nɛ̀ é, bhè ló ke í àle kɛ̂ɛ le. Bhaamɛ̀ɛ̀ yisɛ ké ko kpe gi, le wó daayèa gban gi Aatana zué le.
24	Bhè àng naa i bhà, ke ka nà àng gá ká gò gban gi-zùlù wo kiá, ke wún' è tóà à gi, ke í à kɛ̂ɛ, ke wò wo wun bhɔ́ɔ́bhɔ́ɔ́ gó. I à kɛ̀ɛ̀' kwɛi, le mɛnó páipái- à gànnu à bhà wo: Moizi-à tɔ́ng kún-mɛ̀ɛ̀' zí i lekiniá le. Kɛ́ wó wúnbò' peyèa wo nɛ̀ i bhà láà, à do lefienɛ́ àa maiá.
25	Kɛ́ à ye' mɛ̂ɛ' wàa Zuifu-a, ke wó wɩ́ɩ́yèa Yesu-wùn bhà àngle pe-wùn-a láà, kwéé woo sɛ́ikwɛ́ bɔ àngle nɛ̀, le kó wɩɩ' ko: wii ye' wa à zɛ yo bhà oo, ni wii yuɛn oo, ni yífáa oo, wò àle gban kún le. È gò' bhi, ke wò zí wo tɛ́ɛinsí zùàkɛɛyè bhà.
26	Zaki' à pe' kwɛi kwee' gi láà, à pe tàalà' bhɔ', Pɔli ké mɛ̂ɛbò láà àng naa' e bhà, le wó lo' gò gban gi-zùlù láà à woi kiá le. Wó bo', le é sɔɔ' nà àng gá Aatana-kwìle, le é àng zúlú lóó zìn kélé-kwèèi' è tóà àng tó ni pe sáà gò à bhà lóóá láà à kpɔ' le. Pɔli kùn Aatana-kwìle-kɔ̀ɔ̀
27	É nuu ke yáángɛɛn saapiilɛ láà a bhɔ yɛn lià, Zuifu kemò' nuu góà Azi lùu gi, wo Pɔli ye' Aatana-kwìle. Wó pɛ́ɛ-mɛ̀ɛ̀bò tó wunbílí gisiè- àle gi, le wó kɔɔ wi' Pɔli tà le.
28	Wo nuu gbáláà wo: Izalae gbebò, kà táá. Mɛ̂ɛàn' è gie liang yóo zɛá lɛnólɛ̀nó gi, ke mɛnómɛ̀nó- à ma láà, àle é. Ale wɩɩ ziàn ye: Izalae lùu oo, ni Moizi-à tɔ́ng oo, ni Aatana-kwìì é oo, àle ke àa pɔnggepɔ̀nggeá le. E sɔɔyè lefienɛ́á nà Gɛlɛki-bòa Aatana lekini-kwìì é à gélé, le ya à gban zɛ le.
29	Wó Efɛzi-mii Tolofimu ye' wo' Pɔli wɛì pɛ́ɛ pé fɔ́ɔ́lé láà, wó nùù à peà kwɛi àle-wùn gi le. Atoosiwo wo nuu zʋʋgɔɔn-à wo: Pɔli ké yíiín sɔɔ' nà à gá Aatana-kwìle.
30	Ale-tìng' daa' pɛ́ɛ yáànbhà lɛnó gi, le bhaamɛ̀ɛ̀bò' go' zanózànóá gbùlùùle, le wó Pɔli kun', le wó go' nà à gá Aatana-kwìle, ke wo à gbieláii le. Wó tuàn gieà nà à gá kpóló lé, wo tó' wo' le wó Aatana-kwìì láà à léta' àng zíà le.
31	Wóò woo Pɔli zɛ tée' gi láà, le à-wʋ̀ʋ̀' maa' sɔ́ya kpulu' nuu Zelizalɛm láà àngbhà kúmana bhà, le wó wɩɩ' à nɛ̀ wo: Dààkélé' daa pɛ́ɛ pé lɛnó gi le.
32	E to' sáabhi, le é kapitɛni kemò ni àngbhà sɔ́yabò si', le é lo' nà àng gá bhi bàlàa le. Wó tuàn yáánpá-le woà kúmana ni sɔ́yabò láà àng bhà, wo bo' wo' Pɔli maaá le. Kúmana láà é yɔn' bhi, le é Pɔli kun', le é wɩɩ' ye: wò à yele yɔ̀ɔ́bhɛɛ piilɛá le.
33	Wó bo' à yeleá, le kúmana' bhàgilawo daa' ye: Wáa mɛ̂ɛ é à gá le? Le è mɛɛ kɛɛyèa le?
34	Kɛ́ bhaamɛ̀ɛ̀ kpe láà àng tó' nùù gbálá lesósó' woà, sée ke àng wʋʋ àa ni ké ta-le ke wo le. Bhaamɛ̀ɛ̀ gbáan wʋʋ' nuu' wo' wɔɔɔle do, ke kúmana àa nuu mai-wùn leng ke gima-lèè yeà àng nɛ̀ láà, le é wɩɩ' ye: wò ló nà Pɔli-a sɔ́ya-gbùnng gi le.
35	Wó waa' nà à gá sɔ́ya-gbùnng kpóló kún-lé, sɔ́yabò' à sí' wo', ke bhaamɛ̀ɛ̀bò' woo bhɔ à vólódɔ̀ àng gɔ̀n lià le. Atoosiwo pɛ́ɛ-mɛ̀ɛ̀ ting kpáalàkpàà ké nuu dɔyèa àng wɛì,
36	ke wo gbáláii kpókpóá wo: À zɛ- wo. À zɛ- wo. Pɔli' e leng tà-lɩ̀ɩ̀' kpɔ' Zuifu-bò zué
37	Wóò sɔɔ nà Pɔli-a sɔ́ya-gbùnng gi tée' gi, le é wɩɩ' àngbhà kúmana láà à nɛ̀ ye: Í wɩ́ɩ́à à bhà, ke wúngge' bhi, án à pe i nɛ̀ è?
38	Le kúmana' à bhàgilawo' ye: Í dɔn Gɛlɛki-wʋ̀ʋ̀ peá wà? Ezite-mii' é bhaamɛ̀ɛ̀bò daa' kélé, ke è ló nàa fálibò wáá yisɛá bhìng bhà, ke à lɔ̀ɔ́ òo mɔ́ bhe láà, àle àa ileá wà?
39	Le Pɔli ye: Zuifu' nleá le. Tasi-pɛ̀ɛ̀' é pɛ́ɛ tiàànleá Silisi lùu gi láà, àle gi-mii' n gá le. Kɛ́ bhè dɔ gbáágbààa ke án liangnɛ́ ke zɛ pɛ́ɛ-mɛ̀ɛ̀bò nɛ̀.
40	Pɔli' bo' à peá kwɛi, ke kúmana- wɩ́ɩ́ à bhà, le é dɔ' gɛɛn bhà kpóló tà, le é pɛ́ɛ-mɛ̀ɛ̀bò tàkaan' e kɔɔá le. Mɛnó tà' bo' gaá zilingle, le é liangzɛ zìgo' àng nɛ̀ Ebɛlɛ-wʋ̀ʋ̀ gi ye: