Actes 24
1
Yáángɛɛn solu' gie', le yíkpáá-mɛ̀ɛ̀ kpáè Anania ni mɔaagbebò kemò ninà àngbhà liang yílí sí-mɛ̀ɛ̀' wó nuu à leeà Tɛlɛtuli láà, wó waa' Sezalee bhi, le wó lo' Pɔli daai kúmana kpáè nɛ̀ le.
2
Wó bo' Pɔli leeá ke è nu, le Tɛlɛtuli láà é dɔ' à yànggo bhɛɛ tà ye: Felisi, koà gɛ̀ilɛ tó-mɛ̀ɛ̀ kpáa, ko yàà ko fɛ́ɛ gi lɔ̀ɔ́ ye' mɔ́yèa é, àle- woyèa ile i sáà gi le. È gò' àle gi, koà lùu é à wɛ̂ɛ' seeláyèa, ke à yáán' bhɔii é, à tó- sì ibhà lùu kùn sɛ̀a-kɔ̀ɔ̀' bhà le.
3
E ko zʋʋ kúnyèa zanózànóá, le é sɛɛyèa ko nɛ̀ kɔɔtókɔ̀ɔ̀tó gi, le mɛnó páipái- i wánglego à-wùn gi le.
4
Máá à pé, ke án mɔ́ fèè yaaà i tóló lé pingpingle. Kɛ́ án wɩɩ í dɔ' wo gbáágbààa ke í i tóló dɔnɛ́ ke wo ko wʋʋ bhà ibhà kólósɛ̀nɛ̀ zìì láà à bhà le.
5
Kó à-lèè yeyèa ko: mɛ̂ɛàn é, bhaamɛ̀ɛ̀ yànmayè' à gá, le è Zuifu-bò' lúyáán tà àng tó kɔɔ yaa ziàn ké bhà le.
6
Nazalɛti-miià bhaamɛ̀ɛ̀ ni-zàà láà, àle à tà-mɛ̀ɛ̀bò wun bhà le. E nuu à pé lefienɛ́ wo ye: é lìì waa Aatana-kwìì kpáa' é Zelizalɛm láà à bhà. Ale kɛɛ le kó à kun' le. [Kó nuu woo à pé ke kó à gi-lìangzɛ ko pe tɔ́ng-zàà tà,
7
kɛ́ le sɔ́yabòà kúmana Lizia' waa' bhi, le é à vólódɔ' ko gɔ̀n yàn-gbàn tà,
8
le é à pe' à kún-mɛ̀ɛ̀bò ko nɛ̀ ye: kó nu ile i zué le.] I lekini ké mɔɔà à bhàgilawoá, ke kó pɔɔn' peii à bhà láà, è tò' beleá, í à-tùlé ye.
9
Tɛlɛtuli' à pe' kwɛi, le Zuifu-bò tó' yaa' à pe bhà wo: mai' à gá le. Pɔli-à liang yoobɔ̀ Felisi zué-kɔ̀ɔ̀
10
Wó bo', le kúmana kpáè' kɔizɛ' Pɔli nɛ̀, ke è e pe pe le. Pɔli' wɩ̀ɩ̀ àlei ye: À gàn ké n yàan ma: tenglé òo i yaa Zuifu lùu é à wunlé. A-wùn gi, án nuii nle n bhàwùn' pei i zué zé é, n kpɔ́yè ké i lé ma: í wún dɔn à gi.
11
Án lo' Aatana lɔ̀ɔ̀kɛɛ lià Zelizalɛm, à yáángɛɛn buu-ni-wɛ́ɛ́-piilɛnàà' tuàn tenglé le.
12
I bhàgilawo dàà' à gi, wo mai-wùn peà i nɛ̀ àle gi. Wòo n ye kekekèke wo Aatana-kwìì kpáa gi, ke ko ni mɛngge kó wún gbègóii kiá, sée ke án bhaamɛ̀ɛ̀ kɔɔ yaaii ké bhà bhi. Wòo zí n ye Aatana-kwìì bhɛ́i ke gélé, ɛ́ɛ́n wòo n ye pɛ́ɛ yáànbhà lɛngge gi, ke án wún suu' kwɛi à kɛɛii.
13
È gò' àle gi, wó wúnbò' peii n bhà yáain láà, àng lekini wàa mɔɔii à ke tò maiá-lèè gieá.
14
Wó wún páipái' peii láà, à mai-lèè donɛ́' à gi, ke an wɩ́ɩ́à à bhà i zué zé, àle ye: ko bhɛ́mabò' nuu Aatana do' à lɔ̀ɔ̀kɛɛà láà, n lekini an àle lɔ̀ɔ̀kɛɛ le. Kɛ́ an n pe lɔ̀ɔ̀kɛɛ zaawɛ́ɛ́' tà láà, wò àle leeii bhaamɛ̀ɛ̀ ni-zàà lɛ́ɛ. Sée ke n kpɔ́yè ké wún ye óó ye' àle' bɛɛnzɛyèa Aatana-à tɔ́ng-sɛ̀ikwɛ́ ni à wʋʋ léban-mɛ̀ɛ̀bòà sɛ́ikwɛ́ gi láà àle tó lé.
15
È gò' àle gi, n kpɔ́yè ké zí Aatana lé ma: wúnsɛ̀ kɛɛ-mɛ̀ɛ̀bò ni wúnyóo kɛɛ-mɛ̀ɛ̀bò tó zana-wùn ké bhe. Sée mɛ̂ɛbò é àng lekini zʋʋ- à gi zí à-kɔ̀ɔ̀ do láà àle gi le.
16
Ale kɛɛ le nle an n gi to kpókpóá lɛ́ile, ke án táásí gwílé púú tà, ke pe òo nù tó n bhà Aatana ni bhaamɛ̀ɛ̀bò zué kɔɔkekɔ̀ɔ̀ke gi le.
17
Ale kɛɛ zí le án bo' kwee ting kɛɛá zaa bhɛ́ia, le án nu', ke án wɛ̀i-mɛ̀ɛ̀bò' wó koó lùu gi àng gba, è gò' bhi ke án Aatana lɔ̀ɔ̀kɛ̂ɛ le.
18
Wó n tà- àle gi Aatana-kwìle, ke má woo bo gò gban gi-zùlù tó woá, ke máá tìng kekekèke daayèa, sée ke mɛngge àa zí wee dɔii n zì le.
19
Kɛ́ sée Zuifu kemò' nuu góà Azi lùu gi, àngle wó n ta láà à wo' bhi kwɛi le. Angle wó woo nuà àlei i zué zé, le àngbhà wúngge- woo tò' n bhà, le wò woo dɔ à bhɛɛ tà i nɛ̀ le.
20
Yàa àleá, bhè mɛ̂ɛbò é àngle bhàgilawo, ke wó n dɔ' Sanedɛnɛ zué kwee' gi láà, wó wo pe sɔng' ye' n bhà bhi, wò à pe bhee.
21
Án à pe-le wo' lòlò gi bhi ma: án n yáán tó' woii ga-mɛ̀ɛ̀bò zanayè gɔ̀n láà, wò n dɔyèa ka zué àle-wùn gi tenglé é le. Kɛ́ à gàn ké n yàan ma: án à pe do' wo' kwɛi láà, è gò' àle gi, wàa mɔɔii wúngge bhɛ́i ke peá, ke àle- tó n kún gɛɛn bhɔyèa.
22
Wún' é táásì Yesu-à zaa tà-wùn gi, Felisi ké nuu à tó dɔn-à kpákpálé. É àng léyalà- àle gi dɔ̀ya gɔ̀n, le é wɩɩ' àng nɛ̀ ye: Sɔ́yabòà kúmana Lizia- nùlo, ke má kaà wún láà à yáán bhɔ.
23
É bo', le é wʋʋ kpɔ' kapitɛni' nuu bhi à bhà ye: wò Pɔli tó kààso gi. Kɛ́ wò wo kɔɔ gó à zì, ke è tónɛ́ ke wo e leng kɔ̀ɔ̀bhà. È gò' àle gi zí, wòo à leng gɔ̀n-mɛ̀ɛ̀ kekekèke kɔɔ síà wún kɛ̀ɛ̀ à nɛ̀-yè bhà. Pɔli liangzɛ̀ Felisi ni àbhà nɔ́ng zué-yè
24
Yáángɛɛn ke' gie', le Felisi' nu' nàa ebhà nɔ́ng' wó nuu à leeà Duluzili, ke é nuu Zuifu-lòònɛ́á láà à gá, le é wɩɩ' ye: wò ló Pɔli leei le. É nu' ke è waa bhi, le Felisi' wɩɩ' à nɛ̀ ye: N tóló ké i wʋʋ bhà, ke í táásì Yesu Klisi-à zaa tà-wùn zíà pe n nɛ̀.
25
É à pe' kwɛi, le Pɔli' sɔɔ' dɔà àng nɛ̀ Aatana zòàwùn kɛɛyè ni kɔɔ mɔ̀ɔ̀ leng zowɛ́ɛ́ tà-yè ni mɛ̂ɛ lò bhàgilawo kpáa lià Aatana zué-yèbò bhɛɛ tà dɔ́ɔ̀nle le. Pɔli' nuu liang' zɛà láà, Felisi' àle ma' kwɛi, súó' daa' wo' à gi, le é wɩɩ' à nɛ̀ ye: Bhè ló líe bhi. Bha sɛ̀ ke- bhɔ̀', án i lee ke woà.
26
É nuu à peà kwɛi láà, ke à zʋʋ ké à gi ye: Pɔli ké e gbalé kɛɛà wɛ́iá. Ale kɛɛ le é nuu à leeà ziàn bhéiilé, ke wò sung dɔ le.
27
Kwee piilɛ' giè- Pɔli tà à kɛ̀ɛ̀ kwɛi-yè láà àle bhà, le Felisi sàngsí' waa' bhi le. Wo nuu à sàngsí láà à leeà wo Pɔlisiu Fɛsitu. É nuu' wo' Felisi pé ye: e-wùn liá òo góà Zuifu-bò gi láà, é Pɔli tò- kààso gi àle gi le.