1	Gwilinɛ Kpáa' bo' à peá kwɛi, le é wɩɩ' n nɛ̀ ye: Bhè sɛ́ikwɛ́ bɛɛnzɛ, ke í à bɔ Aatana-à gielá-mɛ̀ɛ̀' é Efɛzi-lègilizi wunlé láà à nɛ̀, ke í à pe à nɛ̀ ye: Mɛɛ́ɛ́ saapiilɛ' nle-mii' n kɔɔ sɛ̀ gi, ke an gie ziàn pai zán dɔ̀ à lé-pɔ̀ɔ̀n saapiilɛ' é sánngá à finibhà láà, nle án liangzɛii ka nɛ̀ é. Án wɩɩ ma:
2	Ka wúnsɛ̀sɛ̀bò' kɛɛ oo, ni ka giibò' si oo, ni ka wúnbò' kun ka bhà n-wùn gi láà oo, án à tó gànnu. Án à gànnu zí ma: zowɛ́ɛ́ yóo-mɛ̀ɛ̀bò kɛɛ-wùn àa kún wo ka gi. Atoosiwo mɛ̂ɛbò' wò wo lekini lee Yesu-à táá-mɛ̀ɛ̀, kɛ́ ke wàa sée à gá láà, ká àng súnmago', le ká àng dɔn' bele pe-mɛ̀ɛ̀a le.
3	È gò' àle gi, à gàn ké n yàan ma: wúnnówùnnó ké kúnwoyèa ka gi, àle kɛɛ le ka wɛ̀ilèè páipái' góyèa n-wùn gi láà, ká à tó kúnyèa ka bhà, le ka gbɔ̀i àa yɛnyèa le.
4	Kɛ́ àle tó gi, n lààwùn' é ka pé, àle ye: n lɔ̀ɔ̀' nuu ka kɛɛà à zigó gi fɔ́ɔ́lé kɔɔ' gi láà, ká ka kɔɔ góyèa àle lé dɔ̀yáa gá.
5	À kɛ̀ɛ̀ kwɛiyè láà à gi, ká góyèa ka gbóló' à tà láà, ka zʋʋ- zana à-wùn-a, ke ká solong kún, ke ká ka táá-kɔ̀ɔ̀ sɛ̀' é nuu láà àle sí dɛ́ɛ wo le. Káó àle kɛ̀ɛ̀' kwɛi, án nuà, le an kaà pai zán dɔ̀ à lé-pɔ̀ɔ̀n láà à go dɔ̀-lià le. Kɛ́ káó wɩ̀ɩ̀' solong kún-wùn bhà laá, le an nuu àle kɛɛà kwɛi le.
6	È gò' àle gi, kaà wún ye' è n zʋʋ kun, àle ye: Nikola pé-mɛ̀ɛ̀bò kɛɛ-wùn lɔ̀ɔ̀ àa n kɛɛ kɔɔ do' gi láà, à lɔ̀ɔ̀ àa zí ka leng ka kɛɛ àle-kɔ̀ɔ̀ bhà le.
7	Waa Zaazaa' wún' peii legilizi-bò nɛ̀ láà, à gima-tòlòkwɛ́- tóà mɛ̂ɛ' à wun bhà, è à ma. Mɛ̂ɛ' i gieà gwili láà à gɔ̀n laá, án i-mɛ̀ɛ̀ gbaà mɛ̂ɛ la-yìlì' é lee sɛ̀ gi Aatana pé láà à wɛ́ɛ́á. Gwilinɛ Kpáa-à nâawʋʋ-sɛ̀ikwɛ́' lo' Simini-lègilizi nɛ̀, àle é
8	É go' bhi, le Gwilinɛ Kpáa' zí wɩɩ' n nɛ̀ ye: Bhè sɛ́ikwɛ́ ke bɛɛnzɛ, ke í à bɔ Aatana-à gielá-mɛ̀ɛ̀' é Simini-lègilizi wunlé láà à nɛ̀, ke í à pe à nɛ̀ ye: Nle-mii' án wúnnó zigó-mɛ̀ɛ̀a, ke án zí wúnnó léyaa-mɛ̀ɛ̀a, ke án ga', kɛ́ ke án zí go' gɔɔ̀le ke án yáányèa láà, nle án liangzɛii ka nɛ̀ é le.
9	Wúnbò' kpɔ́ii ka tà oo, ni ká kɔifɩɩ-mɛ̀ɛ̀a kɔɔ' gi oo, à ke àa n tíibhà-wùn-a. Kɛ́ pɔɔn ké ka gɔ̀n, káá kɔifɩɩ-mɛ̀ɛ̀a. È gò' àle gi, mɛ̂ɛbò' wò wo leng lee wo Zuifu-bò, sée ke wàa à kɔ̀ɔ̀tà-le ke wo láà, wò yàngbhabò' waa ka bhà ziàn láà, án zí à tó-lèè ye. Kɛ́ mɛ̂ɛbò' kwɛi láà, Sɔtana-à bànkétà-kwìle-mɛ̀ɛ̀bò' àngle tóá le.
10	Kao súóà wún páipái' é tuàn kpɔ́à ka tà láà à ke-wùn gi. Ká ka yáán tó bhi, gɔɔ̀yóo ké ka gidan-à ka kemò bìlì kààso gi-yèa, le ka wɛ̀ilèè ye yáángɛɛn buuá le. Kɛ́ àle tó gi, yàani wóò ka zɛ lefienɛ́ wo, ka wʋʋ- tó ka wʋʋá, ke è zin ka gayè bhà. È tò' kwɛi, án sii kɛ̀ɛ̀ à tà-fànngwɛ́ɛ́ yaaà ka wun bhà.
11	Waa Zaazaa' wún' peii legilizi-bò nɛ̀ láà, à gima-tòlòkwɛ́- tóà mɛ̂ɛ' à wun bhà, è à ma. Mɛ̂ɛ' i gieà gwili láà à gɔ̀n laá, ga piilɛnàà wàà lefienɛ́ àa wí-ii i-mɛ̀ɛ̀ bhà. Gwilinɛ Kpáa-à nâawʋʋ-sɛ̀ikwɛ́' lo' Pɛligamu-lègilizi nɛ̀, àle é
12	É go' bhi, le Gwilinɛ Kpáa' wɩɩ' n nɛ̀ ye: Bhè sɛ́ikwɛ́ ke bɛɛnzɛ zí, ke í à bɔ Aatana-à gielá-mɛ̀ɛ̀' é Pɛligamu-lègilizi wunlé láà à nɛ̀, ke í à pe à nɛ̀ ye: Siàng-wɛ́ɛ́' à lé' zanó piilɛyèa láà, é nle-mii' n tà, nle án liangzɛii ka nɛ̀ é le.
13	Án wɩɩ ma: ká lee' gi láà, án à-lèè dɔn. À gàn ké n yàan ma: gɔɔ̀yóo sung- gbaanyèa bhi' wo le. Kɛ́ kale laá, ká kuluyèa n bhà kelekelele, le káá ka kɔɔ góyèa kpɔ̀ n lé-yè zì le. Yàani Antipasi' é nuu n séeá, ke òo gó e wʋʋ tà láà, wó à zɛ' bha lekini' bhà kaá pée-lèè' é Sɔtana yàlèèa láà à gi, ká to' kuluyèa n bhà kwɛi kelekelele do.
14	Kɛ́ àle tó gi, n lààwùn' é ka pé, àle ye: mɛnggoò' ka kpe gi, wo Balaam pé-zààwɛ́ɛ́ síyèa. Atoosiwo Balaam láà àle Baalaki dɔɔ' sua kpɔ̀ Izalae-bò nɛ̀ yí gulu tà-yèa lii, le é yo lɔ̀ɔ̀kɛɛ-pɔ̀ɔ̀nbò ni núòbò léyaa' àng bhà, le é to' àng gò zaa gi gɛɛn-á le.
15	A-kɔ̀ɔ̀ do láà à gi, mɛnggoò' ka kpe gi, àng leng ké zí Nikola pé-zààwɛ́ɛ́-wùn kúnyèa wo níiá.
16	À kɛ̀ɛ̀ kwɛiyè láà à gi, ká solong kún mɛ̂ɛbò láà àng-wùn gi. Àa àleá, án nuà ka lià bhi dɛ́ɛdɛ́ɛnɛ́ é à gá, le an gwili daa àng tà n biinlé-siàngwɛ́ɛ́á le.
17	A-wùn gi, Waa Zaazaa' wún' peii legilizi-bò nɛ̀ láà, à gima-tòlòkwɛ́- tóà mɛ̂ɛ' à wun bhà, è à ma. Mɛ̂ɛ' i gieà gwili láà à gɔ̀n laá, án i-mɛ̀ɛ̀ gbaà Mani' é bànàkpɔ́yèa Aatana pé, ke mɛngge àa à dɔn láà à gá. È gò' àle gi, án zí gwɛɛ púú do nuà i-mɛ̀ɛ̀ nɛ̀, ke i tɔ́ dɛ́ɛ' mɛngge bhɛ́i ke àa à dɔn ile-mɛ̀ɛ̀ i zìpieta, e bɛɛnzɛyèa à bhà. Gwilinɛ Kpáa-à nâawʋʋ-sɛ̀ikwɛ́' lo' Tiatili-lègilizi nɛ̀, àle é
18	É go' bhi, le Gwilinɛ Kpáa' à pe ke wo' n nɛ̀ ye: Bhè sɛ́ikwɛ́ bɛɛnzɛ, ke í à bɔ Aatana-à gielá-mɛ̀ɛ̀' é Tiatili-lègilizi wunlé láà à nɛ̀, ke í à pe à nɛ̀ ye: Nle-mii' án Aatana gbeá, ke n yánwɛ́ɛ́' ye painɛ̂ɛ nɛ̀ n wunbílí gi, ke n gɛɛn yáán- bhɔ gɛ̀lɛ̀nggɛ̀lɛ̀ngle ye dìán zán nɛ̀ láà, nle án liangzɛii ka nɛ̀ é le.
19	Án wɩɩ ma: ka wúnsɛ̀sɛ̀bò' kɛɛ oo, ni Aatana lɔ̀ɔ̀- ka kɛɛ kɔɔ' gi oo, ni ka kpɔ́yè' n lé kelekelele kɔɔ' gi oo, ni ka Aatana-à bháála-wùn kun kpókpóá kɔɔ' gi oo, ni ka wúnnówùnnó kun ka bhà kɔɔ' gi oo, à tó-wùn ké n yàan. Án zí à gànnu ma: ká wún ye' kɛɛii dɔ̀yáa gá é, àle lé ké gie ka kɛɛ-wùn fɔ́ɔ́léyèbò-le tó tà.
20	Kɛ́ àle tó gi, n lààwùn do' é ka pé, àle nɔ́ngnɛ́ do' é ka finibhà, ke wò à lee Zezabɛli láà à-wùn-a le. Atoosiwo e e leng lee ye Aatana wʋʋ léban-mɛ̀ɛ̀, sée ke àa ni à gá-le ke wo. Kɛ́ le ka à to bhi, le è liangzɛ kaà legilizi gi, le è nbhà gùábò légo pɔɔn nɛ̀, ke wò zùàkɛ̂ɛ, è gò' bhi ke wò yo lɔ̀ɔ̀kɛɛ-pɔ̀ɔ̀nbò bhɛlɛ le.
21	A-wùn gi, án bha kpɔ' à nɛ̀, ke è nù e kɔɔ gó e sɔng lé. Kɛ́ òo nù wɩ́ɩ́ à bhà, ke è e kɔɔ gó ebhà zùàkɛɛyè láà à zì gbonggbongle.
22	Ale kɛɛ le máà yúá kpókpó yaa à bhà, ke mɛ̂ɛ páipái' wò daa à pé ziàn láà, àng tó- yaa bhéi kpáalàkpàà lé le. Kɛ́ wòo wɩ̀ɩ̀' kɔɔ gò Zezabɛli sɔng láà à lé-wùn bhà laá, le an nuu à kɛɛà àng gá kwɛi le.
23	È gò' zí àle gi, án àbhà náò tó zɛà. An wúnbò láà à kɛ̀ɛ̀' kwɛi, le legilizi-bò tó- à gànnu wo: nle án gbangwààwɛ́ɛ́ dan bhaamɛ̀ɛ̀bò tó gwílé, le an àng zʋʋ pé-wùn tó dɔn le. Nle do láà nle án zí kanó ka pe dɔ̀lèè góà à gó lià ka kɛɛ-wùn bhà le.
24	Kɛ́ Tiatili-lègilizi gi-mɛ̀ɛ̀ paán yemò' kale káá àng pe zaawɛ́ɛ́ yóo láà à síyèa, ke Sɔtana gwílé-wùnbò' wò wɩɩ ziàn wo: wó à gisɔi láà, káá zí wɩ́ɩ́yèa à ke dɔn-wùn bhà láà, an wɩ̀ɩ̀ kale ka nɛ̀ ma: máá wúngge bhɛ́i ke-gbà yaaii ka gwenglé koo.
25	Kɛ́ ka kɔɔ' à ye' à tà láà, kà ka bháa dɔ leng' wo, ke ká àle kún kpókpóá, ke n nu bha- bhɔ le.
26	Mɛ̂ɛ' i gieà gwili láà à gɔ̀n, ke i-mɛ̀ɛ̀ i tóà n zòàwùn kɛɛà kwɛi flúúlé, ke lúyáán léyaalé- bhɔà laá, án i-mɛ̀ɛ̀ gbaà gieá, le i yaa lùubò' wàa Aatana dɔn láà àng wunlé le.
27	-28 I-mɛ̀ɛ̀ ké yaaà àng wunlé pɛɛ́ɛ́-sàbhilia, le i àng giwi ye mɛ̂ɛ' sɛ́ɛ́ gbɔ wí le. N nɛ' n lekini n yaa' ke án yáán káán kɔɔ' gi láà, an i-mɛ̀ɛ̀ i leng yaaà ke í i pe yáán káán à-kɔ̀ɔ̀ do láà àle gi le. È gò' àle gi, mɛɛ́ɛ́' è wolo lɛwɔɔlé, ke wò à lee géluu láà, án i-mɛ̀ɛ̀ gbaà à gá.
29	Waa Zaazaa' wún' peii legilizi-bò nɛ̀ láà, à gima-tòlòkwɛ́- tóà mɛ̂ɛ' à wun bhà, è à ma.