1	É go' àle gi, máà lɛgaa ke sɛ́ikwɛ́ kélé ke' à bɛɛn' nuu zɛyèa zanó piilɛyèa, e mɛ̂ɛ' nuu gbòlò tà láà à kɔɔ sɛ̀ gi. Sɛ́ikwɛ́ kélé láà à lé ké nuu tayèa bíindáán-á lee saapiilɛ gi, le kɛ́ɛ' nuu kpɔ́yèa à bhà à léta-lèèbò láà à gi le.
2	Máà n káá' wo, ke Aatana-à kɩ́ɩ́la kpáa ke ké gbáláii ye: Wáa bhɔyèa sɛ́ikwɛ́ kélé é à póló-mɛ̀ɛ̀ gi, ke é létayèa leebò' gi gɔgɔtɔle láà, è à tó lépóló le?
3	Kɛ́ é bhàgilawo láà à daa' kwɛi, mɛ̂ɛ' è mɔɔà sɛ́ikwɛ́ kélé láà à lépólóá ke è à gaa, à-mɛ̀ɛ̀ òo sɔlɔ lɔngwɛ́ɛ́ gi tɛ́nglà, sée à-mɛ̀ɛ̀ òo sɔlɔ sɛ́ɛ́ tà sáalé, le òo zí sɔlɔ gɔɔ̀le-mɛ̀ɛ̀bò finibhà sɛ́ɛ́ wala le.
4	Án à gaa' ma: mɛnggemɛ̀ngge àa bhɔyèa sɛ́ikwɛ́ láà à lépòlò ke è à gaa-mɛ̀ɛ̀ gi laá, án péé' wo' gbóoó bhà le.
5	Kɛ́ le mɔaabò' nuu láà àng do ke' wɩɩ' n nɛ̀ ye: Miá wosí. Atoosiwo gwilinɛ Davi dunng' é góó-mii kpáaá Zuda-kwìle láà, wúnnó' nù- tói àle pe bhà le. A-wùn gi, bhè i yáán tó bhi, àle mɔɔà sɛ́ikwɛ́ kélé létàa-pɔ̀ɔ̀n saapiilɛ láà à tó wíá, le è à lépolo le.
6	Máà lɛgaa zí ke Bháánɛ́ ké dɔɔ gɛɛn bhà gbòlò kpáè oo, ni pɔɔn yáányè yisɛ oo, ni mɔaabò láà àng finibhà. Bháánɛ́ láà e nuu ye pɔɔn' wa à zɛ à nɛ̀. À sele ké nuu saapiilɛ, le à yánwɛ́ɛ́' nuu zí à wun bhà saapiilɛ le. À yánwɛ́ɛ́ saapiilɛ láà àle nuu Aatana' ebhà níi saapiilɛ' àng daayèa sɛ́ɛ́ pé lɛnólɛ̀nó gi láà à gá le.
7	Bháánɛ́ láà e yɔn' liélé, le é lo' sɛ́ikwɛ́ kélé' é nuu gbòlò kpáè tà-mɛ̀ɛ̀ kɔɔ sɛ̀ gi láà à síi le.
8	É bo' sɛ́ikwɛ́ láà à síá kwɛi, pɔɔn yáányè yisɛ ni mɔaabò kuà-piilɛ-ni-wɛ́ɛ́ yisɛ láà, àng tó' zinná' wo' wo kpóng gi à nɛ̀ le. Mɔɔabò láà, kwèèla ké nuu àng tó kɔlé dolodolo ninà sánng gbɔnɛ́bò' dɔ̀ pailé-làsikɔlɔ' nuu à payèa à gá. Yesu pe gi-mɛ̀ɛ̀bò- bhàibò' wo à zì ziàn láà, àle to' làsikɔlɔá sánng gbɔnɛ́bò gi le.
9	È gò' bhi, wo nuu kɔnng táán dɛ́ɛ bɔà, le wò Bháánɛ́ si táán gi, wo: Bháánɛ́, ile í bhɔyèa sɛ́ikwɛ́ láà à sí-mɛ̀ɛ̀ gi, ke í à léta-lèè tó lépóló le. Wo ile i yuɛn kpɔ', le í to' bhaamɛ̀ɛ̀bò bhà-sààa le. Í to' bhaamɛ̀ɛ̀bò' àng tàboo-pɔ̀ɔ̀n-a kwɛi, ke wò nù tó Aatana peá láà, sííya tó páipái suu ké bhi, bhaamɛ̀ɛ̀bò- wʋʋ páipái' à pe lúyáán tà à tó-mɛ̀ɛ̀bò ké bhi pɛipɛi, bhaamɛ̀ɛ̀ páipái' wó lúyáán tà àng tó suu ké bhi, le lùu tóletòlé gi-mɛ̀ɛ̀bò' bhi le.
10	Í àngle tó dɔ̀lèè kpɔ́yèa ko nɛ Aatana-à gwilinɛnɛ̀ bhà, le í àng tóyèa àbhà yíkpáá-mɛ̀ɛ̀a le. Angle wó zí yaaà sɛ́ɛ́ tó páipái wunlé le.
11	Máà zí lɛgaa ke n tóló' daa Aatana-à kɩ́ɩ́la kpe kpáalàkpàà wʋʋ gi. Wo nuu wáá wúlú tinglàtìng-a ye maanɛ́ biinlé-kàà nɛ̀, le núnú àa nuu àng bhà le. Wo nuu kɔnɔyèa gbòlò kpáè ni pɔɔn yáányèbò ninà mɔaabò' nuu láà àng zì,
12	le wó nuu à peà kpókpóá wo: Wó Bháánɛ́' zɛ' ke é to' bhaamɛ̀ɛ̀bò bhà-sààa láà, mɛ̂ɛnɛ̀ oo, ni wélé oo, ni wúndɔnnɛ̀ oo, ni kpókpónɛ̀ oo, à tó- àle peá le. A-wùn gi, à-lèè ké à bhà ke mɛnó- bhɛɛ yaa à bhà, ke wò à tɔ́ bhɔ, ke wò à wánglegó.
13	É go' zí àle gi, le n tóló' daa' Aatana daa-pɔ̀ɔ̀n páipái' wó lúyáán tà àng tó wʋʋ gi le. Pɔɔn yemò' lɔngwɛ́ɛ́ gi tɛ́nglà oo, ni à yemò' sɛ́ɛ́ tà sáalé oo, ni à yemò' sɛ́ɛ́ wala oo, ni à yemò' kɔ̀ɔ̀yí wɛ́ɛ́ oo, pɔɔn páipái' wó lúyáán tà kwɛi láà, àng tó ké nuu wɩ́ɩ́à wo: Mɛ̂ɛ' é yaa gbòlò kpáè tà, ninà Bháánɛ́ láà, à-lèè ké à bhà ke mɛnó- àngle wánglegó, ke wò àng bhɛɛ yaa, ke wò àng tɔ́ bhɔ le. Angleà yáán- tó lɔng bhà kweetókwèètóá le.
14	Wó à pe' kwɛi, le pɔɔn yáányè yisɛ láà wó à lékun' wo: Amiina. Wó bo', le mɔaabò láà wó zinna' wo kpóng gi, le wó tɔ́ ban' Aatana ni Bháánɛ́ láà àng bhà, le wó bhɛɛ yaa' àng bhà le.