{
    "livre": "apocalypse",
    "chapitre": 8,
    "versets": [
        {
            "numero": 1,
            "texte": "É go' àle gi, Bháánɛ́ láà é zí sɛ́ikwɛ́ létàa-pɔ̀ɔ̀n saapiilɛnàà' nuu láà à lépolo', lɛtà' ga' wo' lɔngwɛ́ɛ́ gi zilingle lɛ́ɛ́lɛ́ɛ́ gbú do yɔ̀ɔ̀nsínmáá le."
        },
        {
            "numero": 2,
            "texte": "Máà lɛgaa ke Aatana-à kɩ́ɩ́la saapiilɛ' wò to dɔɔ à zué lɛ́ile láà, wa àng gba túnú saapiilɛá."
        },
        {
            "numero": 3,
            "texte": "Máà zí n káá' wo ke Aatana-à kɩ́ɩ́la bhɛ́i ke' zí nu dɔi sáà gò à tà-gwɛ̀góló maabhà. Wò làsikɔlɔ dɔ pailé sánng gbɔnɛ́' à gi láà, à do ke ké nuu à kɔlé, le wó à gba' làsikɔlɔbòa kpáaá, le é à ban' Yesu pe gi-mɛ̀ɛ̀bò tó páipáià bhài wʋʋ tà, le é gbòlò kpáa tà-mɛ̀ɛ̀ láà à lɔ̀ɔ̀kɛɛ' à tóá sánng-gwɛ̀góló lé bhi le."
        },
        {
            "numero": 4,
            "texte": "É à kɛɛ' kwɛi, le làsikɔlɔ' go' kɩ́ɩ́la kwenglé, à pai gbɛ́ɛ́n ni Yesu pe gi-mɛ̀ɛ̀bòà bhài wʋʋbò' é à léban' láà, à tó' waa' kiá Aatana zué le."
        },
        {
            "numero": 5,
            "texte": "É bo', le é sánng gbɔnɛ́ láà à si', le é zí paikúá si' gwɛgóló lé, le é à ban' à gi, le é à pa', le é à bili' nàa sɛ́ɛ́ tà le. Máà n káá' wo ke la ké pàipài góii, ke e gbáláii, ke wɔɔɔle ké wɩ́ɩ́ii lɛnó gi, ke sɛ́ɛ́ ké viin-ii zìzìle. Túnú saapiilɛ"
        },
        {
            "numero": 6,
            "texte": "Ale' kɛɛ' kwɛi, túnú saapiilɛ' nuu Aatana-à kɩ́ɩ́la saapiilɛ' àng kɔlé láà, wó dɔ' wo' woà túnú pie-yàn gi le."
        },
        {
            "numero": 7,
            "texte": "Wó dɔ' kwɛi, le àng fɔ́ɔ́yè' to', le é e pe túnú pie' le. É bo' àle kɛɛá, máiwɛ́ɛ́ ni paikúá' banná zì' go' sɛ́ɛ́ tà, ke yuɛn ké kaanyèa à gá, le é to' ye wa sɛ́ɛ́ péé à gi yaka, le pai' à pɛ́ɛ́n yakanàà bhɛlɛ', le pai' zí yílíbò' lúyáán tà à tó bànkétàyè pɛ́ɛ́n yakanàà bhɛlɛ', le é zí bɩ̂ɩ nɛɛ tó páipái bhɛlɛ' le."
        },
        {
            "numero": 8,
            "texte": "Kɩ́ɩ́labò láà àng piilɛnàà' e pe túnú pie', pɔngge' nuu ye tɔɔn kábháko nɛ̀, ke pai ké à lé, é dalá' wo' kɔ̀ɔ̀yí bhá le. É kɛɛ' kwɛi, le é to' ye wa kɔ̀ɔ̀yí péé à gi yaka, le à pɛ́ɛ́n yakanàà láà à tó' gala' à gi yuɛn-á le."
        },
        {
            "numero": 9,
            "texte": "A-wùn gi, tɛ́i-pɔ̀ɔ̀nbò' kɔ̀ɔ̀yí wɛ́ɛ́, àng tó pèè à gi-yè pɛ́ɛ́n yakanàà' wi', le yítà-gɔ̀ɔ̀bò tó pèè à gi-yè pɛ́ɛ́n yakanàà' zí sie' le."
        },
        {
            "numero": 10,
            "texte": "Kɩ́ɩ́la yakanàà' e pe túnú pie', le mɛɛ́ɛ́ kábháko do ke' go' lɔngwɛ́ɛ́ gi, le é dala', ke e doloii ye sɛ́i nɛ̀ le. É dalá' wo' láà, é à wò- yí gieyè tó páipái pèè à gi-yè pɛ́ɛ́n yakanàà ninà yíwun bhɔlé-lèèbò' tà le."
        },
        {
            "numero": 11,
            "texte": "Wo nuu mɛɛ́ɛ́ láà à leeà kpáinkpàin. A-wùn gi, yí tó páipái pèè à gi-yè pɛ́ɛ́n yakanàà ké to' kpáinkpàin-a, le bhaamɛ̀ɛ̀ kpe kpáa' à mi', le é àng zɛ' à tò kpáinkpàin-a-wùn láà à gi le."
        },
        {
            "numero": 12,
            "texte": "Kɩ́ɩ́la yisɛnàà' e pe túnú pie', le wún' kpɔ' yáán oo, ni mɛ̂ɛ oo, ni mɛɛ́ɛ́bò oo, àng tó ni pe pèè à gi-yè pɛ́ɛ́n yakanàà tà, le é to' ye wa yáán ni mɛ̂ɛ péé à gi yaka yaka, le àng tó ni pe pɛ́ɛ́n yakanààbò' tala' tíiá bìlìbìlìle le. Mɛɛ́ɛ́bò leng pe kpulu yakanàà' zí tàlà- tíiá à-kɔ̀ɔ̀ do láà àle gi le. À kɛ̀ɛ̀ kwɛiyè láà à gi, mɔ̀ng ye' è maa yáán gi, e pee' à gi yaka, le à pɛ́ɛ́n yakanàà' kaan' à lé le. Gbɛi gi leng pe' tò- kwɛi' wo zí le."
        },
        {
            "numero": 13,
            "texte": "É go' àle gi, máà lɛgaa ke gíí-màà ke ké gieii tɛ́nglà mɛ̂ɛ gwenglé zué, ke e wɩ́ɩ́ii kpókpóá ye: Lúyáán tà-mɛ̀ɛ̀bò, ka véè, ka véè. Wún' è kpɔ́à ka tà kɩ́ɩ́la yaka paánbò pe túnú wʋʋ bhà láà, e tóà kpókpóá bháalé."
        }
    ]
}