Ephesiens 3

Ale kɛɛ le nle Pɔli' án Yesu Klisi-à kààso kɛɛii mɛ̂ɛ' káá Zuifu-a ka-wùn gi láà, an zinna n kpóng gi Aatana nɛ̀ le.

Sée Aatana' gɛ̀ilɛ tó' wo' ke é n to' nâa kpɔ̀ ka nɛ̀-mɛ̀ɛ̀a láà, e n gi ye: ká àle mayèa.

Atoosiwo Klisi-wùn' é nuu Aatana zʋʋ pé, ke à gi' nuu tíiá mɛnó páipái gi fɔ́ɔ́lé láà, Aatana lekini' à tàpólóyèa n nɛ̀ le. Sée an tuàn góà àle bɛɛnzɛi ka nɛ̀ wʋʋ déngdèngnɛ́á lɛ́ɛ.

Sɛ́ikwɛ́ é, ká à-wʋ̀ʋ̀ peà, ká à-tùlé yeà à bhà ka: Aatana- gɛ̀ilɛ' tóyèa n bhà, le é Klisi-wùn tàpólóyèa n nɛ̀ kpákpálé le.

Òo à tàpóló mɛ̂ɛ' wó nuu ko liélé lii láà àngle nɛ̀. Kɛ́ dɔ̀yáa gá, e ebhà Waa Zaazaa bɔ', le é à tàpolo' e wʋʋ léban-mɛ̀ɛ̀bò ni ebhà táá-mɛ̀ɛ̀bò' kó yaayèa àbhà yaa gi ko nɛ̀ le.

Sée wúnsɛ̀' nuu à zʋʋ pé, ke é à tàpólóyèa ko nɛ̀ kwɛi láà, àle ye: mɛ̂ɛ' káá Zuifu-a, ke wó nâa sɛ̀ kpɔ' ka nɛ̀, ke ká wɩɩ' à-wùn bhà láà, ka leng ká dɔ̀lèè yeyèa Aatana-wùn bhà Zuifu-bò pé Yesu Klisi sáà gi. À kɛ̀ɛ̀ kwɛiyè láà à gi, Aatana' leekpɔ̀ɔ̀tili-sànma' à yaayèa Zuifu-bò gɔ̀n láà, ka leng ka dɔ̀lèè ké à gi. È gò' bhi, e ka nà àng gá-nù ka naayèa ké bhà, le é ka tóyèa mɛngdoá le. È gò' zí àle gi, é píní' wo' àng nɛ̀ láà, é à wò- mɛnó kale ka nɛ̀ le. Wúnsɛ̀' nuu à zʋʋ pé, ke é à tàpólóyèa ko nɛ̀ kwɛi láà, àle lɛ́ɛ.

Kɛ́ gɛ̀ilɛ lenglèng àa Aatana bhà, le é n yaa' nâa sɛ̀' è go à pé láà à kpɔ́-mɛ̀ɛ̀a le. Sée é bhɔ̀ɔ̀nɛ̀' bhɔ' n nɛ̀ kwɛi láà, é zí à gi-wùn kɛɛ-bhàà dàà n gi ebhà kpókpónɛ̀' bhà le.

Atoosiwo gɛ̀ilɛ kpáalàkpàà' à nààlé àa bhe, ke é à to' bhaamɛ̀ɛ̀bò ko bhà Klisi nù ko nɛ̀-yèa láà, e n yàà àle-nàà kpɔ́-mɛ̀ɛ̀a mɛ̂ɛ' wàa Zuifu-a àng nɛ̀, sée ke nle án à pe gi-mɛ̀ɛ̀ tó páipái gòzíàa le.

È gò' àle gi, wúnsɛ̀' é nuu pɔnópɔ̀nó daa-mɛ̀ɛ̀ Aatana zʋʋ pé, ke òo à tàpóló mɛnggemɛ̀ngge nɛ̀ lii do bhe láà, e zí gɛ̀ilɛ to', le é n yaa', ke án nù à-wùn tàpóló bhaamɛ̀ɛ̀bò nɛ̀, ke án à gi-tààsí-kɔ̀ɔ̀ gie àng nɛ̀ le.

Sée é n tò- wúnsɛ̀ láà à tó-nàà kpɔ́-mɛ̀ɛ̀a kwɛi, ke yínaa kpókpóbò ni giè mɛ̂ɛ gɔ̀n-pɔ̀ɔ̀nbò' wó lɔngwɛ́ɛ́ gi, àngle tó- nù à-tùlé ye legilizi-bò bhà tenglé-yààn é à gi wo: Aatana- wún dɔn suu' wo é, à nààlé àa bhe le.

Kɛ́ wúnsɛ̀ láà à kɛɛ-wùn' nuu Aatana zʋʋ pé fɔ́ɔ́lé lúyáán daayè liélé kɔɔ do' gi, é nù- à tó kɛɛi àle-kɔ̀ɔ̀ bhà koà Gwilinɛ Yesu Klisi bɔ̀ ke è nu sɛ́ɛ́ tà-yèa le.

Sée gɛ̀ilɛ àa zí Yesu Klisi do láà àle bhà, le é zaa lépólóyèa mɛ̂ɛ' ko kpɔ́yè' à lé láà ko gɔ̀n, le ko mɔɔ sɔ́n-á Aatana gi, ke síka kekekèke àa ko gi koo le.

À kɛ̀ɛ̀ kwɛiyè láà à gi, án wɩɩ ma: ká dɔ gbáágbààa ke án wɛ̀ilèè' yeii ka-wùn gi láà, òo tó ka gbɔ̀i yɛn gɛɛn-á, kɛ́ ke ká à gànnu' wo ka: àle tó- ka vele tò dɔ́ɔ́n-á gɛɛn lesósó' gá le. Ko lɔ̀ɔ̀' è Klisi kɛɛ láà à sanggbai tò dɔ́ɔ́n-á-kɔ̀ɔ̀

Ko nɛ Aatana' gɛ̀ilɛ kpáalàkpàà tóyè' gá ko bhà kwɛi láà, àle kɛɛ le an zinna n kpóng gi à nɛ̀ le.

Atoosiwo è go lɔngwɛ́ɛ́ gi, ke è nu sɛ́ɛ́ tà sáalé, kwíilé-yɛ̀ɛ̀ ye óó ye' é lúyáán tà, àle tɔ́' à tó páipái bhà le.

An sée zinnà n kpóng gi à nɛ̀ kwɛi, ke è dɔ' wo gbáágbààa ke è gɛ̀ilɛ tó ka bhà, ke ka zowɛ́ɛ́- nù gbaan kpókpóá kelekelele ka gwílé àbhà Waa Zaazaa bháa bhà le. È gò' bhi, è zí dɔ gbáágbààa ke è gɛ̀ilɛ láà à tó ka bhà kpáaá gbanggbaale do, ke è bhɔ àbhà mɛ̂ɛnɛ̀' à nààlé àa bhe láà àle bhà le.

Án zí bhàiwo kwɛi, ke ka kpɔ̀ Klisi lé-yè láà, è tó à lekini yàlèè kùn ka zowɛ́ɛ́ pé-kɔ̀ɔ̀a, è gò' bhi ke ka lekini ka gɛɛn- nù sɛ́ɛ́ kún' wo, ke ká tó gbaanyèa kelekelele Aatana ni bhaamɛ̀ɛ̀bò lɔ̀ɔ̀' è ka kɛɛ láà à gi le.

Ka à kɛ̀ɛ̀' kwɛi, le ka ni Yesu pe gi-mɛ̀ɛ̀ tó páipái ka mɔɔ Aatana-wùn dɔn-á kpákpálé, le ka à gànnu ka: bhaamɛ̀ɛ̀ lɔ̀ɔ̀' è Klisi kɛɛ láà, à tulé ké gbɛ́ɛ́á, le à sanggbai' dɔ́ɔ́n-á, le à gbùnnggi' zí dɔ́ɔ́n-á, le à dɔ̀ gɛɛn bhà-yè tó' dɔ́ɔ́n gànggàngyɔ̀lɔ̀a, le à mɔ̀ɔ̀kiá àa bhe le.

È gò' àle gi, án zí bhàiwo kwɛi, ke ko lɔ̀ɔ̀ do' è Klisi kɛɛ, ke à lé- gie bhaamɛ̀ɛ̀bòà wún gima-nàà tó tà dɔ́ɔ́n-á pánngle láà, kó nù àle dɔn leng wo sɛ̀a le. È tò' kwɛi, ká Aatana-wùn sogélé tó páipái dɔn-à kpákpálé, le è ka zowɛ́ɛ́ pa kɔɔtókɔ̀ɔ̀tó gi le.

-21 Sé ké Aatana nɛ̀, le è mɔɔ bháála kɛɛá ko gi ebhà kpókpónɛ̀ bhà, le wún páipái' ko à gi-bhài wo à zì, ni à yemò lefienɛ́' è to ko zʋʋ pé, è à tó légiètà dɔ́ɔ́n kɛɛ ko nɛ̀ le. Ale kɛɛ le an wɩɩ ma: à-lèè ké à bhà ke Aatana' é kpókpóá kwɛi láà, àle tɔ́- bhɔ legilizi tó finibhà Yesu Klisi-wùn gi bha tó bhà tó bhà, ke è tó à pe tó-kɔ̀ɔ̀a le. Amiina.