{
    "livre": "jean",
    "chapitre": 11,
    "versets": [
        {
            "numero": 1,
            "texte": "Mɛngge' nuu Betani, wo nuu à leeà Lazaa. À laànɛ́-loòbò piilɛ ké nuu zí péng bhi, wo nuu mɛngdo leeà Mali, le wó nuu mɛ̂ɛ dini leeà Maati le."
        },
        {
            "numero": 2,
            "texte": "Mali láà àle làsikɔlɔ wɛin' Gwilinɛ Kpáa gɛɛn tà dɔ̀ya, le é e wunkwɛ́ gie' à bhà le. É nuu kwɛnggei, ke kángwa kpókpó ké Lazaa bhà,"
        },
        {
            "numero": 3,
            "texte": "le à laànɛ́-loòbò láà wó mɛ̂ɛ bɔ' Yesu lee lià, wo: Gwilinɛ, i dɔ́ma' zé é, kángwa ké à bhà kpókpóá loô o."
        },
        {
            "numero": 4,
            "texte": "Yesu' bo' à maá kwɛi, le é wɩɩ' ye: Kángwa ye láà, àa tóii àle bhà. Kɛ́ àle- Aatana tɔ́ bhɔ' woà, le è zí à gbe leng tɔ́ bhɔ à pé le. A-wùn gi, òo walá ke è ló bhi zólé."
        },
        {
            "numero": 5,
            "texte": "Sée Maati ni Mali ni Lazaa láà, àng-wùn ké nuu Yesu gɔ̀n kpókpóá."
        },
        {
            "numero": 6,
            "texte": "Kɛ́ àle tó gi, é bo' kángwa tò Lazaa bhà-wùn maá, e yii' bhi piilɛ,"
        },
        {
            "numero": 7,
            "texte": "le é nuu à peà ebhà kàlengbò nɛ̀ ye: Kwàa sɛsí, ke kó ló dɛ́ɛ wo Zudee lùu gi tò!"
        },
        {
            "numero": 8,
            "texte": "É à pe' kwɛi, le àbhà kàlengbò' wɩɩ' à nɛ̀ wo: Kààmɔ, Zuifu-bò ké nuu à pé ke wò i zɛ gwɛɛ bìlì i bhà-yèa kála do é à gi é, le í zí wɩ́ɩ́ii ye: kó sɛ dɛ́ɛ sí, ke kó ló àng pé lùu gi la è?"
        },
        {
            "numero": 9,
            "texte": "Le Yesu' à yoobɔ' ye: Lɛ́ɛ́lɛ́ɛ́ buu-ni-wɛ́ɛ́-piilɛ-le àa tó yáángɛɛn doá ziàn è? Mɛ̂ɛ' è táási yáán gi, à gɛɛnlé àa maa, atoosiwo lɛi ké to pólóyèa à-mɛ̀ɛ̀ tà, le è lee ye e liélé le."
        },
        {
            "numero": 10,
            "texte": "Kɛ́ mɛ̂ɛ' è táási gbɛi gi, àle gɛɛnlé- maa lɛi- tó' wo talayèa tíiá à-mɛ̀ɛ̀ tà láà à-wùn gi le."
        },
        {
            "numero": 11,
            "texte": "É bo' à peá kwɛi, le é zí wɩɩ' àng nɛ̀ ye: Ko dɔ́ma Lazaa' yizɛ, kɛ́ an lò, ke án à zana."
        },
        {
            "numero": 12,
            "texte": "Le àbhà kàlengbò wo: Gwilinɛ Kpáa, è tò' ke e yi-le zɛii, ke e laà àlei."
        },
        {
            "numero": 13,
            "texte": "Sée Yesu-le' nùù woo à ga-wùn' peà le. Kɛ́ le àngle wó nuu zʋʋgɔɔn-à wo: é nùù yánwɛ́ɛ́ bhà-yì' à zɛ-wùn bhɛ́i peà le."
        },
        {
            "numero": 14,
            "texte": "Yesu' à pè- àng nɛ̀ àle gi tàpúúá do ye: Lazaa' ga' wo le."
        },
        {
            "numero": 15,
            "texte": "Kɛ́ máá nuu' wo' bhi láà, e sɛɛyèa n nɛ̀ ka-wùn gi, é kɛ̂ɛ kwɛi ke ka kpɔ́yè- nù tó n lé kelekelele. Kɛ́ kwàa ló-le wo zin-i bhi."
        },
        {
            "numero": 16,
            "texte": "Yesu' à pe' kwɛi, le Toma' wó nuu à leeà Pɛ̂ɛnnɛ́ láà, é wɩɩ' e bhámò kàlengbò nɛ̀ ye: Konó kwàa ló gwilinɛ wɛì, ke wò à zɛà lee' gi, wò mɛnó ko zɛ bhi do. Yesu' ga-mɛ̀ɛ̀ zana-mɛ̀ɛ̀ ni sii' àa yɛn à daa mɛ̂ɛ gi-mɛ̀ɛ̀a le"
        },
        {
            "numero": 17,
            "texte": "Yesu' lo', e waa' bhi, ke Lazaa-gèè' woo yáángɛɛn yisɛ kɛɛ à kpɔ̀lèè gó lià."
        },
        {
            "numero": 18,
            "texte": "Sée Betani-lèè láà e nuu Zelizalɛm-pɛ̀ɛ̀ maabhà. Ang finibhà àa nuu kílo yaka lefienɛ́ bhɔà."
        },
        {
            "numero": 19,
            "texte": "À kɛ̀ɛ̀ kwɛiyè láà à gi, Zuifu-bò kpe ké nuu nuyèa yèèèle Maati ni Mali sɛ̀ɛgíigɔ̀n gó lià àng laànɛ́ láà à-wùn gi."
        },
        {
            "numero": 20,
            "texte": "Maati' bo' Yesu wàà bhi-wùn maá, le é lo' dɔi à gɔ̀n zaá le. Kɛ́ Mali-le ké to' yaláyèa kwíle."
        },
        {
            "numero": 21,
            "texte": "Maati' Yesu ta', le é wɩɩ' à nɛ̀ ye: Gwilinɛ Kpáa, í woo nù tóà zé laá, ke n laànɛ́ àa woo gaii."
        },
        {
            "numero": 22,
            "texte": "Kɛ́ kó dɔɔ lefienɛ́' wo é, à gàn ké n yàan ma: i wún óó wún' peà Aatana nɛ̀, è à kɛɛ' wo i nɛ̀ le."
        },
        {
            "numero": 23,
            "texte": "Le Yesu' à pe' à nɛ̀ ye: I laànɛ́ láà è nù zanai."
        },
        {
            "numero": 24,
            "texte": "Le Maati ye: À gàn-le ké n yàan ma: è nù zanai ga-mɛ̀ɛ̀bò tó zana bha bhà lúyáán yɛn-kwèèi."
        },
        {
            "numero": 25,
            "texte": "Yesu' à pè- à nɛ̀ àle gi ye: Wò à pè' ga-mɛ̀ɛ̀bò zana-mɛ̀ɛ̀, ke wò nle n pe le. Wò zí à pè' sii' àa yɛn à dàà mɛ̂ɛ gi-mɛ̀ɛ̀, ke wò nle n pe le. Mɛ̂ɛ' à kpɔ́yè- to n lé, yàa ni éè ga, à-mɛ̀ɛ̀ ké sii' àa yɛn láà à sɔlɔà."
        },
        {
            "numero": 26,
            "texte": "Sée mɛ̂ɛ óó mɛ̂ɛ' à kpɔ́yè' n lé, ke é sii láà à sɔlɔyèa, àle-mɛ̀ɛ̀ àa gaii gbonggbongle koo. Án wún' peii láà, i kpɔ́yè ké à lé è?"
        },
        {
            "numero": 27,
            "texte": "Le Maati' à yoobɔ' à gɔ̀n ye: Iin, Gwilinɛ Kpáa, án à gànnu ma: Aatana gbe Klisi' à nu-wùn' nuu bhe láà, àle i gá le. Yesu ké Lazaa ga wòsi'"
        },
        {
            "numero": 28,
            "texte": "Maati' bo' à peá kwɛi, le é lo' e lɔ́ɔ̀ Mali leei, le é wɩɩ' à nɛ̀ piilɛ gi ye: Gwilinɛ' waa zé, e i leeii."
        },
        {
            "numero": 29,
            "texte": "Mali' bo' àle maá, e walá' wo' zólé, le é lo' Yesu lià le."
        },
        {
            "numero": 30,
            "texte": "Atoosiwo e nuu kwɛi, ke Yesu òo sɔɔ pɛ́ɛ yáànbhà bhe, ke Maati' à ta' lee' gi láà, e tuàn bhi."
        },
        {
            "numero": 31,
            "texte": "Zuifu-bò' nuu Mali tàga lià kwíle láà, wó à walà zólé-lèè ye' ke yéè wolo lúulé, le wó dɔ' à wɛì, ke wo zʋʋgɔɔn-ii wo: è ló' woii wosíi Lazaa bu tà lɛ́ɛ."
        },
        {
            "numero": 32,
            "texte": "Kɛ́ Mali' waa' Yesu' nuu lee' bhà láà à gi, ke è yáánpá à bhà, le é bhuola' à gɛnpé, le é wɩɩ' à nɛ̀ ye: Gwilinɛ Kpáa, í woo nù tóà zé laá, ke n laànɛ́ àa woo gaii."
        },
        {
            "numero": 33,
            "texte": "Yesu' à gaa' ye Mali ké wosí-ii, ninà Zuifu-bò' wó nuu à wɛì láà àng tóá laá, wɛ̀i ké ban' à lekini tà bháalé, le à gwílé' múúwo' le."
        },
        {
            "numero": 34,
            "texte": "É àng bhàgilawò- àle gi ye: Ká à kpɔ̀lèè gò- mɛ́ɛ́? Le wó à yoobɔ' à gɔ̀n wo: Gwilinɛ Kpáa, bhè nu kó ló, ke í à-lèè gaa."
        },
        {
            "numero": 35,
            "texte": "Le Yesu leng' wosi' le."
        },
        {
            "numero": 36,
            "texte": "Zuifu-bò' nùù à peà àle gi wo: Kà lɛgaa lɛ́ɛ. À lɔ̀ɔ̀-le' nùù à kɛɛà wɛ́!"
        },
        {
            "numero": 37,
            "texte": "Le àng kemò wo: Ale-mii' é yánwili láà à yán lépolo' é la ò, yòo mɔɔ pɔngge kɛɛá, ke mɛ̂ɛ ye é à leng- zí la kángwa é à gɔ̀n è? Lazaa zana-kɔ̀ɔ̀"
        },
        {
            "numero": 38,
            "texte": "É nuu ke wɛ̀i ké ban dɛ́ɛ woii zí Yesu tà, le é lo' zin-i à bu kpɔ́-lià le. Yɛɛ pɔ̀n tɔɔn gi-yè' nuu bu láà à gá, le wó nuu gwɛbílí do bhuoyèa à lé le."
        },
        {
            "numero": 39,
            "texte": "Wó waa' bhi, le Yesu' wɩɩ' ye: Kà gwɛɛ é à gó bhi. É à pe' kwɛi, le nɔ́ngnɛ́ ye' wó nuu à leeà Maati, ke é nuu mɛ̂ɛ' é ga' à laànɛ́á láà, é wɩɩ' ye: Gwilinɛ, à wàà' nù bhɔ zigó yíiín. Atoosiwo é ga', à yáángɛɛn yisɛnàà' tenglé le."
        },
        {
            "numero": 40,
            "texte": "Kɛ́ le Yesu' wɩɩ' à nɛ̀ ye: Mɔ́ɔ́ à pe i nɛ̀ ma: i kpɔ́yè- tò' n lé, í Aatana tò kpókpóá-lèè yeà è?"
        },
        {
            "numero": 41,
            "texte": "É bo' à peá kwɛi, le wó gwɛɛ láà à go' bhi, le Yesu' lɛgaa' tɛ́ng gi, le é wɩɩ' ye: N nɛ, má i wánglegó í wɩ́ɩ́yè' gá nbhà bhài wʋʋ bhà láà à-wùn gi."
        },
        {
            "numero": 42,
            "texte": "À gàn ké nle n yàan ma: í wɩɩ n wʋʋ bhà lɛ́ile. Kɛ́ an à ye é àle peii kwɛi bhaamɛ̀ɛ̀bò' kɔnɔyèa n zì zé é àngle-wùn gi le. È tò' kwɛi, le wò à gànnu wo: ile í n bɔyèa maiá le."
        },
        {
            "numero": 43,
            "texte": "Yesu' bo' bhàiwoá kwɛi, le é gbala' kpókpóá ye: Lazaa, bhè wolo."
        },
        {
            "numero": 44,
            "texte": "Le Lazaa' wolo' le. À gɛɛn ni à kɔɔbò ké nuu yeleyèa wélé gɛɛn tutuá, ke gbàà pɛ́ɛ́n ke ké yeleyèa à wɛí. Le Yesu' wɩɩ' mɛ̂ɛ' wó nuu bhi láà àng nɛ̀ ye: Kà à póló, ke è ló. Yàngbha yàà Yesu bhà-yè (Matie 26:1-5; Maki 14:1-2; Luki 22:1-2)"
        },
        {
            "numero": 45,
            "texte": "Zuifu-bò' wó nuu nuyèa Mali-nù lià, Yesu' sɔ́n' kɛɛ' láà, wó à-lèè ye', e to' àng kpe tó kpɔ̀ à lé gɛɛn-á."
        },
        {
            "numero": 46,
            "texte": "Kɛ́ mɛnggoò-le wó go' bhi, wo ló' wo' Faliziɛn-bò pé, le Yesu' wún' kɛɛ' láà, wó à gɛingo' àng nɛ̀ le."
        },
        {
            "numero": 47,
            "texte": "Yíkpáá-mɛ̀ɛ̀bòà wunmɛ̀ɛ̀bò ni Faliziɛn-bò' bo' àle maá kwɛi, wo Sanedɛnɛ tó ban' wo' ké tà, le wó wɩɩ' wo: Kó à kún lɔ? Atoosiwo mɛ̂ɛàn láà e sɔ́n kɛɛii miniminiyèa."
        },
        {
            "numero": 48,
            "texte": "Ko à tò' nàa bhi kwɛi, ke mɛnó páipái- wɩ́ɩ́ à-wùn bhà, e sieà Wɔlɔm-mɛ̀ɛ̀bò' wó ko wunlé láà àng nɛ̀, le wò nu, le wò koà Aatana-kwìì kpáa ni koà lùu é à tó wi à-wùn gi le."
        },
        {
            "numero": 49,
            "texte": "Kɛ́ mɛngge' nuu àng kpe gi bhi, wo nuu à leeà Kaifu. Ale nuu àngbhà yíkpáá-mɛ̀ɛ̀ kpáèa kwee láà à tà, le é wɩɩ' àng nɛ̀ ye: Kale káá pɔngge dɔn' wo le."
        },
        {
            "numero": 50,
            "texte": "À gàn àa ka yàan ka: e fìláá ka bhà, ke mɛngdo-kini-dò- ga mɛnó-wùn gi, kɛ́ ke lùu gbànggbààyè é àle tó gi òo nù sie è?"
        },
        {
            "numero": 51,
            "texte": "Sée Kaifu' à pe' wo' kwɛi láà, àle òo gó e leng gi. Kɛ́ é nuu' wo' yíkpáá-mɛ̀ɛ̀ kpáèa kwee poo à tà láà, àle kɛɛ le é Aatana wʋʋ léban' e tíibhà kwɛi le. Atoosiwo é wʋʋ' pe' láà, à zíà leng' nuu bhe, àle ye: à-lèè ké nuu à bhà, ke Yesu- ga, ke è nù tó Zuifu-bò tó páipái bhà-sààa le."
        },
        {
            "numero": 52,
            "texte": "Sée é ga' wo' láà, òo à wo Zuifu-bò lengdo-wùn gi, kɛ́ Aatana-à náò' wɛinnáyèa lúyáán tà-lèè tó páipái gi láà, é gà- àngle tó-wùn gi, ke è àngle ni Zuifu-bò kɔɔ wí ké tà, ke àng tó- nù tó mɛngdoá le."
        },
        {
            "numero": 53,
            "texte": "É si' yáángɛɛn láà àle bhà, Zuifu-bòà wunmɛ̀ɛ̀bò wʋʋ' mɔɔ' wo' Yesu zɛ-wùn bhà le."
        },
        {
            "numero": 54,
            "texte": "Ale kɛɛ le Yesu òo lébhɔ kpunglé Zuifu-bò kpe gi koo le. É go' Betani bhi-le bhà, e ló' wo' bèka pé pɛ́ɛ' wò à lee Efalaimu láà à gi, le é mɔ' bhi kià nà ebhà kàlengbòa le. Sée Efalaimu-pɛ̀ɛ̀ láà e yaayèa bhìng bhà lùu nààlé."
        },
        {
            "numero": 55,
            "texte": "E nuu kwɛi, ke Zuifu-bòà Paki bha ke' bhɔ kúlúá, le bhaamɛ̀ɛ̀ kpe' go' lùu gwílé yèèèle, le wó lo' Paki bhàkɔ́ngwoi Zelizalɛm, ke wò nù bɔ́n gò wo bhà-sààbò gó fɔ́ɔ́lé le."
        },
        {
            "numero": 56,
            "texte": "Wo nuu Yesu guoà, le wò à pe wo ké nɛ̀ ziàn, ke wo dɔɔ Aatana-kwìle wo: È ka gi ye: yéè sɛ' sí, ke è nu Paki tà la è?"
        },
        {
            "numero": 57,
            "texte": "Sée e nuu kwɛi, ke yíkpáá-mɛ̀ɛ̀bòà wunmɛ̀ɛ̀bò ni Faliziɛn-bò' bo à peá wo: wò lòlòkpɔ́, ke è tò' ye Yesu' lee' gi, mɛngge ké à-lèè dɔn, è à pe, ke wò nù à kún."
        }
    ]
}