{
    "livre": "jean",
    "chapitre": 1,
    "versets": [
        {
            "numero": 1,
            "texte": "É nuu fɔ́ɔ́lé lúyáán zigó téei, wò mɛ̂ɛ' à lee liang wʋʋ, àle nuu bhe le. Liang wʋʋ láà àle ni Aatana wo nuu ké wɛì, wàa nuu káán-à ké bhà. Liang wʋʋ láà àle nuu zí Aatana-á le."
        },
        {
            "numero": 2,
            "texte": "Ale ni Aatana wo nuu ké wɛì lúyáán zigó téei."
        },
        {
            "numero": 3,
            "texte": "Aatana' pɔnópɔ̀nó daayè dɔ̀- àle kɔ̀ɔ̀lé le. Pɔɔn óó pɔɔn' é daayèa, à kekekèke òo daa à tíibhà."
        },
        {
            "numero": 4,
            "texte": "Sii' àa yɛn, é nùù liang wʋʋ láà àle gi le. Sée wò zí sii láà à pè', ke wò mɛ̂ɛ tàpóló-mɛ̀ɛ̀' à pe le."
        },
        {
            "numero": 5,
            "texte": "Mɛ̂ɛ tàpóló-mɛ̀ɛ̀ láà àle mɔ̀ng maa bhaamɛ̀ɛ̀bò' wó lɛitíi lià àng tà le. Kɛ́ mɛ̂ɛ' wó lɛitíi lià láà wàa wɩ́ɩ́yèa à-wùn bhà."
        },
        {
            "numero": 6,
            "texte": "Mɛngge' Aatana' à bɔ', wo nuu à leeà wo Záàn."
        },
        {
            "numero": 7,
            "texte": "E nu', ke è tó mɛ̂ɛ tàpóló-mɛ̀ɛ̀ láà àbhà kɩ́ɩ́láá, ke è à-wùn zíà pe, ke mɛnómɛ̀nó- nù wɩ́ɩ́ à-wùn bhà à wʋʋ lé."
        },
        {
            "numero": 8,
            "texte": "Ale àa nuu mɛ̂ɛ tàpóló-mɛ̀ɛ̀a, kɛ́ é nù- ke è tó' wo mɛ̂ɛ tàpóló-mɛ̀ɛ̀ láà àbhà kɩ́ɩ́láá le."
        },
        {
            "numero": 9,
            "texte": "É nuu mɛ̂ɛ' à liélé-nàà kpɔ́à láà, àle mɛ̂ɛ tàpóló-mɛ̀ɛ̀ lekinilèkiniá, le à nù lúyáán tà-yè- mɔ̀ng maa mɛnómɛ̀nó tà le."
        },
        {
            "numero": 10,
            "texte": "Liang wʋʋ láà e nuu bhe lúyáán tà lii. Ale kɔɔ gbóló' lúyáán tóá le. Kɛ́ lúyáán tà-mɛ̀ɛ̀bò wòo à dɔn à bhà."
        },
        {
            "numero": 11,
            "texte": "E nu' e lekinià mɛ̂ɛbò lià, le àbhà mɛ̂ɛbò láà wòo wɩ́ɩ́ kɔɔ yàà à bhà-wùn bhà le."
        },
        {
            "numero": 12,
            "texte": "Kɛ́ mɛ̂ɛ páipái ye' wó wɩɩ' à-wùn bhà, ke wó kpɔ' à lé láà, e tò Aatana-à nɛ́á-bhàà daa' àngle tó gi."
        },
        {
            "numero": 13,
            "texte": "È tò' kwɛi, ke Aatana leng' àngle kpɔ́yèa le. Wàa mɛ̂ɛ bhɛ́i ke yuɛn-á. Ang kpɔ́yè àa miɔn ke yàan-wùn-a, sée àa zí bhaamɛ̀ɛ̀ ke gisɛ́lɛ́á. Ale Aatana lengdo' à gi-wùn-a le."
        },
        {
            "numero": 14,
            "texte": "Liang wʋʋ láà àle gala' à gi bhaamɛ̀ɛ̀a, le é nu' yaai ko kpe gi le. E nuu gɛ̀ilɛ lenglèng tóà, le é nuu mai-wùn peà kɔɔtókɔ̀ɔ̀tó gi, le kó àbhà mɛ̂ɛnɛ̀ zán gaa gi-gàà wo' le. E nuu e nɛ Aatana gɔ̀n nɛ́wɛ́ɛ́ doá, le é nuu e nɛ láà àbhà mɛ̂ɛnɛ̀ zán bhɔà le."
        },
        {
            "numero": 15,
            "texte": "Záàn ké à liélé-nàà kpɔ' lòlò gi ye: Án nuu mɛ̂ɛ' à peà ma: e nuii n zíà láà, àle lɛ́ɛ. Ale ké fìláá nle n bhà, atoosiwo é nuu ke nle mɔ́ɔ́ bhɔ bhe laá, ke àle ké bhe."
        },
        {
            "numero": 16,
            "texte": "À kɛ̀ɛ̀ kwɛiyè láà à gi, liang wʋʋ gigàlà bhaamɛ̀ɛ̀a-yè' é nu' yaai ko kpe gi láà, e gɛ̀ilɛ gi-gɛ̀ilɛ to' mɛnó ko bhà wúnsɛ̀' é nuu à kɔɔ payèa láà à gá."
        },
        {
            "numero": 17,
            "texte": "Atoosiwo Aatana' ebhà tɔ́ng' dɔ' lii láà, é àle-wʋ̀ʋ̀ kpɔ̀- Moizi' à bhà, le é nu' à léban-i ko bhà le. Kɛ́ é gɛ̀ilɛ ye' to' ko bhà oo, ni é mai-wùn ye' pe' ko nɛ̀ oo, é àle-wʋ̀ʋ̀ kpɔ̀- Yesu Klisi' à bhà, le é nu' à tàpólói ko nɛ̀ le."
        },
        {
            "numero": 18,
            "texte": "Mɛnggemɛ̀ngge òo Aatana ye do bhe. Kɛ́ à gbe' é à gɔ̀n tòlédoá, ke à lekini' zí Aatana-á, ke é yaa à nɛ bhulu gi láà, àle à dɔ̀kɔ̀ɔ̀ gieyèa bhaamɛ̀ɛ̀bò ko nɛ̀ le. Záàn tò Yesu-à kɩ́ɩ́láá-kɔ̀ɔ̀ (Matie 3:1-12; Maki 1:1-8; Luki 3:1-18)"
        },
        {
            "numero": 19,
            "texte": "Yíkpáá-mɛ̀ɛ̀bò ni Aatana-kwìì légièwo-mɛ̀ɛ̀bò' wò àng lee Levite-bò láà, Zuifu-bò' wó nuu Zelizalɛm, wo àng kemò bɔ', le wó lo' Záàn bhàgilawoi wo: Le ile wɛ, wáa ileá le?"
        },
        {
            "numero": 20,
            "texte": "Wó à bhàgilawo' kwɛi, le é à yoobɔ' àng gɔ̀n tàpúúá, òo à tà bànàkpɔ́, le é wɩɩ' ye: E ka gi ye: Aatana-à yaa-mɛ̀ɛ̀' wò à lee Klisi láà, àle n gá le. Kɛ́ àa nleá."
        },
        {
            "numero": 21,
            "texte": "É à pe' kwɛi, le wó à bhàgilawo' zí wo: Wáa sée ileá le? Eli' i gá la è? Le ye: Ááo. Nle máá Eli-a. Le wo: Tààn Aatana wʋʋ léban-mɛ̀ɛ̀' à nu-wùn' bhe láà, àle i gá la è? Le ye: Ááo. Yàa nleá."
        },
        {
            "numero": 22,
            "texte": "É a pe' kwɛi, le wó zí wɩɩ' à nɛ̀ wo: Wáa sée ileá àle gi le? Bhè wɩ́ɩ́, ke kó nù dɔn à sèèlài kɛɛá mɛ̂ɛ' wó ko bɔ' láà àng nɛ̀. Í wɩɩ i lekini bhà ye lɔ?"
        },
        {
            "numero": 23,
            "texte": "Le ye: Aatana wʋʋ léban-mɛ̀ɛ̀ Ezai ké à pe' lii ye: Lòlòkpɔ́ wʋʋ ké woloii bhìng bhà. E wɩɩ ye: Kà Gwilinɛ Kpáa giè à tà-zààwɛ́ɛ́ baa, ke ká à mɔɔ kiá dɛlɛngle. Ezai' lòlòkpɔ́-mɛ̀ɛ̀' à-wùn pe' lii ye: à wʋʋ ké woloii bhìng bhà láà, àle n gá le."
        },
        {
            "numero": 24,
            "texte": "Sée Zuifu-bò' nuu mɛ̂ɛ' àng bɔyèa Záàn bhàgilawoi kwɛi láà, Faliziɛn-bò' nuu àng gá le."
        },
        {
            "numero": 25,
            "texte": "Wó bo', le wó zí à bhàgila dɛ́ɛ wo' wo: Le mɛɛ kɛɛ le ile í sée bɔ́n gò bhaamɛ̀ɛ̀bò bhà-zùlù woii, sée ke Aatana-à yaa-mɛ̀ɛ̀ Klisi ni Eli ni Aatana wʋʋ léban-mɛ̀ɛ̀' wò à pe láà ile yáá àngle keá le?"
        },
        {
            "numero": 26,
            "texte": "Záàn' à yoobɔ̀- àng gɔ̀n àle gi ye: Nle an bhaamɛ̀ɛ̀ zùlù yí' wɛ́ɛ́ le. Kɛ́ mɛngdo ke' é ka finibhà, ke káá à dɔn láà, e nuii n zíà."
        },
        {
            "numero": 27,
            "texte": "Nle máá bhɔyèa àle gɛin-sàbha bhɛɛ lépóló-nùà lefienɛ́ gi."
        },
        {
            "numero": 28,
            "texte": "Wúnbò láà à tó ké bhɔ' Betani guan' wò à lee Zudɛɛn láà à zele tia za. Atoosiwo Záàn' nùù bhaamɛ̀ɛ̀ zúlúà bhi' wo le. Aatana-à bháánɛ́"
        },
        {
            "numero": 29,
            "texte": "À tàalà' bhɔ', Záàn' Yesu ye', ke e nuii e lià, le é wɩɩ' ye: Aatana-à bháánɛ́' è tóà bɔ́n gò lúyáán tó bhà-pɔ̀ɔ̀n-a, àle nuii é."
        },
        {
            "numero": 30,
            "texte": "Án àle-wùn pe' yáálé ma: mɛ̂ɛ' é nuii n zíà láà, àle ké fìláá nle n bhà lɛ́ɛ. Pɔɔn- à kɛɛ ke an àle pe kwɛi, àle ye: é nuu ke nle mɔ́ɔ́ bhɔ bhe, ke àle ké bhe."
        },
        {
            "numero": 31,
            "texte": "Sée n lekini máá nuu à dɔn-à fɔ́ɔ́lé. Kɛ́ nle án nù- bhaamɛ̀ɛ̀ zúlúi yí wɛ́ɛ́, ke Izalae-bò yánlé- nù póló' wo à bhà le."
        },
        {
            "numero": 32,
            "texte": "Záàn' à pe' kwɛi, le é wɩɩ' zí ye: Án Aatana-à Waa Zaazaa ye', ke e góii lɔngwɛ́ɛ́ gi. E nuu ye tìnìng nɛ̀, le é yɔɔ', le é dɔ' án mɛ̂ɛ' à peii láà à tà le."
        },
        {
            "numero": 33,
            "texte": "Nle máá nuu à dɔn-à fɔ́ɔ́lé, kɛ́ Aatana' é n bɔ' bhaamɛ̀ɛ̀ zúlú lià yí wɛ́ɛ́ láà, àle wɩɩ' n nɛ̀ ye: I Waa Zaazaa yè' ke e yɔɔii, è dɔà mɛ̂ɛ' à tà láà, ke àle bhaamɛ̀ɛ̀ zùlù Waa Zaazaa-a-mɛ̀ɛ̀a le."
        },
        {
            "numero": 34,
            "texte": "Nle-mii' án à-lèè ye' kwɛi láà, pɔɔn- à kɛɛ ke an wɩɩ ma: àle Aatana gbeá, àle lɛ́ɛ. Yesu-à kàleng fɔ́ɔ́lébò"
        },
        {
            "numero": 35,
            "texte": "À pe tàalà' bhɔ', ke Záàn ké tuàn bhi nà àbhà kàleng piilɛá,"
        },
        {
            "numero": 36,
            "texte": "é Yesu gaa' ke e gieii, le é wɩɩ' ye: Aatana-à bháánɛ́' gieii lɛ́ɛ."
        },
        {
            "numero": 37,
            "texte": "Záàn-à kàleng piilɛ láà wó àle ma', wó dɔ' wo' Yesu wɛì le."
        },
        {
            "numero": 38,
            "texte": "Yesu' seela' e gi, ke è àng ye, ke wo nuii e wɛì, le é àng bhàgilawo' ye: Ka mɛɛ guo le? Le wó wɩɩ' à nɛ̀ wo: Labi, i yaayè- mɛ́ɛ́' wo le? Wò à pè' Ebɛlɛ-wʋ̀ʋ̀ gi wo Labi, ke wo wɩɩ kààmɔ."
        },
        {
            "numero": 39,
            "texte": "Le ye: Kà nu, ke ká à-lèè ye. Wó lo' à wɛì, wo à yàlèè ye', le wó to' à lià kwɛpoo à gi le. Sée e nuu kwɛi, ke yáán loo daa gi' bhɔ."
        },
        {
            "numero": 40,
            "texte": "Mɛ̂ɛ piilɛ', Záàn' liangzɛ' àng yàànlé, ke wó dɔ' Yesu wɛì láà, wo nuu mɛngdo leeà Andele. Ale nuu Simon Piɛli lɔ́ɔ̀a le."
        },
        {
            "numero": 41,
            "texte": "Andele' go' bhi, le é e dóo Simon láà àle fɔ́ɔ́lé ye', le é wɩɩ' à nɛ̀ ye: Wò Mɛsi' à-wùn pe ziàn láà, kwéé à ye tò. (Sée wò à pè' Ebɛlɛ-wʋ̀ʋ̀ gi wo Mɛsi, ke wo wɩɩ Klisi.)"
        },
        {
            "numero": 42,
            "texte": "Andele' à pe' kwɛi, le é daa' Simon nɛ̀ liélé, le é lo' à dɔi Yesu lià le. Wó waa' bhi, le Yesu' à gaa' sɛ́inlé, le é wɩɩ' à nɛ̀ ye: Záàn gbe Simon, ile i tɔ́yààtà' tóà dɔ̀yáa gá Sefasi-a le. Wò à pè' kwɛi, ke wo wɩɩ wo: Piɛli. (Wò à pè' zí Piɛli, ke wo wɩɩ gwɛɛ.) Yesu-à kàleng piilɛ ke lee-kɔ̀ɔ̀"
        },
        {
            "numero": 43,
            "texte": "À pe tàalà' bhɔ' zí, ke Yesu yéè walá ke è ló Galilee sɛ́ɛ́ gi, le é Filipu ye', le é wɩɩ' à nɛ̀ ye: Bhè daa n wɛì."
        },
        {
            "numero": 44,
            "texte": "Besaida-mii' nuu Filipu-a ye Andele ni Piɛli-nù nɛ̀ le."
        },
        {
            "numero": 45,
            "texte": "Filipu' go' bhi, le é Natanaɛ ye', le é wɩɩ' à nɛ̀ ye: Wó mɛ̂ɛ' à-wùn peyèa Moizi-à tɔ́ng-sɛ̀ikwɛ́ gi, ke wó zí à-wùn peyèa Aatana wʋʋ léban-mɛ̀ɛ̀bòà sɛ́ikwɛ́ gi láà, kwéé à ye tò! Nazalɛti-mii' à gá le. Wo à lee Yesu, le wò à nɛ lee Zozɛfu le."
        },
        {
            "numero": 46,
            "texte": "Kɛ́ Filipu' bo' à peá kwɛi, le Natanaɛ' wɩɩ' à nɛ̀ ye: Bhaamɛ̀ɛ̀ tiàànle-mɛ̀ɛ̀' go Nazalɛti-le bhà le? É à pe' kwɛi, le Filipu' à yoobɔ' à gɔ̀n ye: Bhè nu, ke í i yáánpá à bhà."
        },
        {
            "numero": 47,
            "texte": "Yesu' Natanaɛ ye', ke e nuii e lià, le é à pe' à bhà ye: Izalae-wɛ́ɛ́ lekinilèkini' lebhà é le. Yàa wúngge kɛɛ dáingɔ̀n lúá."
        },
        {
            "numero": 48,
            "texte": "Natanaɛ' Yesu wʋʋ láà à ma' kwɛi, le é à bhàgilawo' ye: I n dɔ̀n mɛ́ɛ́' wo, le i àle pe kwɛi le? Le Yesu' à yoobɔ' à gɔ̀n ye: Í nuu yaa bhúlu wala tée' gi láà, n yáán ké nuu i bhà, ke Filipu òo i lee bhe."
        },
        {
            "numero": 49,
            "texte": "Natanaɛ' à pè- à nɛ̀ àle gi ye: N kààmɔ, má à gànnu tò ma: ile í Aatana gbeá, le í zí Izalae-bò koà gwilinɛá mai lekinilèkiniá le."
        },
        {
            "numero": 50,
            "texte": "Natanaɛ' à pe' kwɛi, le Yesu' wɩɩ' à nɛ̀ ye: Án à pe' wo' i nɛ̀ ma: n yáán ké nuu i bhà bhúlu wala láà, àle kɛɛ le í kpɔ́yèa n lé kwɛi lɛ́ɛ. Kɛ́ í tuàn à ye láà àle légiètà yeà."
        },
        {
            "numero": 51,
            "texte": "Án à zɛ ka nɛ̀ sii lenglèng tà ma: ká lɔngwɛ́ɛ́ yeà, ke a lépóló n tà tɛ́nglà, ke Aatana-à kɩ́ɩ́labò ké góii bhi, ke wo yɔɔii, ke wo nuii nle bhaamɛ̀ɛ̀ gbe n pé ziàn, ke wo zí tɔnng-ii bhi."
        }
    ]
}