{
    "livre": "jean",
    "chapitre": 20,
    "versets": [
        {
            "numero": 1,
            "texte": "Lóówun dɛ́ɛ zigó-kwèèi' bhɔ', le Mali Madala' lo' Yesu bu tà yué pápálé, ke lɛi ké tuàn tíiá le. É waa' bhi, yéè lɛgaa, ke wa woo gwɛɛ sí yɛɛ láà à lé."
        },
        {
            "numero": 2,
            "texte": "Le é lo' bàlàa Simon Piɛli ni Yesu-à kàleng wùndɔ̀yóoá' nuu bhi láà àng pé, le é wɩɩ' àng nɛ̀ ye: Wa koà Gwilinɛ Kpáa láà à gó sɛ́ɛ́ gi wà! Kɛ́ wó à kpááyèa lee' gi, kwáá à-lèè dɔn."
        },
        {
            "numero": 3,
            "texte": "Mali' à pe' kwɛi, le Piɛli ni Yesu-à kàleng dini láà wó wala', le wó lo' à bu tà le."
        },
        {
            "numero": 4,
            "texte": "Wó nuu lóà, àng tó piilɛyè ké nuu bàlàsíà kiá do, kɛ́ Yesu-à kàleng dini láà à gɛɛn ké to' kpókpóá, le é gie' Piɛli tà, le é waa' yɛɛ lé à liélé le."
        },
        {
            "numero": 5,
            "texte": "Yéè naaná, ke è lɛgaa yɛɛ gi, à yáán' dàà gbàà pɛ́ɛ́nbò' wó à puola' Yesu-á, ke wò à bii à gi láà àle lengdo tà, ke e bannáyèa bhi le. Sée à leng-le òo sɔɔ-le wo yɛɛ gi."
        },
        {
            "numero": 6,
            "texte": "Kɛ́ Simon Piɛli-le' nu' dɔ̀ya, le é sɔɔ' yɛɛ gi, le à leng' gbàà pɛ́ɛ́nbò' nuu bannáyèa bhi láà à ye' le."
        },
        {
            "numero": 7,
            "texte": "Gbàà tu' wó nuu à bhuoyèa Yesu wɛí láà, e à tó ye', ke à pe kɔɔn ké kɛɛyèa pɛi, ke àle àa à pɛ́ɛ́n yemò láà àle pé."
        },
        {
            "numero": 8,
            "texte": "É kɛɛ' kwɛi, le Yesu-à kàleng dini' é waa' bhi fɔ́ɔ́lé láà, à leng' zí nuu sɔɔà yɛɛ gi, le é à-lèè ye', le wún' kɛɛ' láà, é nuu bhɔà à gi mai bhà tò le."
        },
        {
            "numero": 9,
            "texte": "Kɛ́ àle' kɛɛii kwɛi téei láà, ke Aatana wʋʋ' é bɛɛnzɛyèa fɔ́ɔ́lé ye: Yesu ké góà gɔɔ̀le, le è zana láà, ke wòo à zíà dɔn bhe."
        },
        {
            "numero": 10,
            "texte": "Yesu-à kàleng piilɛ láà wó go' bhi, le wó sɛi', le wó lo' wo yalé le. Yesu kàà Mali Madala-nɔ̀ng gi-kɔ̀ɔ̀ (Matie 28:9-10; Maki 16:9-11)"
        },
        {
            "numero": 11,
            "texte": "Kɛ́ Mali-le ké to' dɔɔ yɛɛ maabhà bhi kpɛ́lé, ke e wosí-ii. É nuu wosíà, le é naana',"
        },
        {
            "numero": 12,
            "texte": "le é lɛgaa' yɛɛ gi, le é Aatana-à kɩ́ɩ́la piilɛ ye' nà bhái púpúá àng bhà bhi, ke wo yaa Yesu-gèè' nuu kpááyèa lee' gi fɔ́ɔ́lé láà à gi le. Mɛngdo ké nuu yaa à wun dɔ-lià, le mɛ̂ɛ dini' nuu yaa à gɛɛn kpàà-lià le."
        },
        {
            "numero": 13,
            "texte": "Le wó wɩɩ' Mali nɛ̀ wo: Nɔ́ngnɛ́, mɛɛ kɛɛ le í wosí-ii le? Wó à pe' kwɛi, le é à yoobɔ' ye: Wò koà Gwilinɛ Kpáa góyè' gá sɛ́ɛ́ gi, le wó à kpááyèa lee' gi, máá à-lèè dɔn la wà!"
        },
        {
            "numero": 14,
            "texte": "Mali' bo' à peá kwɛi, é seela' e gi, yéè e káá' wo, ke Yesu leng ké dɔɔ bhi, kɛ́ òo à dɔn ye: àle à gá le."
        },
        {
            "numero": 15,
            "texte": "Le Yesu' wɩɩ' à nɛ̀ ye: Nɔ́ngnɛ́, mɛɛ kɛɛ le í wosí-ii le? I wáa guo le? Kɛ́ e nuu Mali gi ye: yílí-bʋ̀ʋ̀nɛ́' nuu bhi láà, àle wunlé-mɛ̀ɛ̀' e gílawoii lɛ́ɛ. É à pè- à nɛ̀ àle gi ye: Wunmɛ̀ɛ̀, è tò' ke ile í à-gèè si' laá, í à kpaa' lee' gi, bhè dɔ gbáágbààa ke í à-lèè gie n nɛ̀, ke án ló à síi."
        },
        {
            "numero": 16,
            "texte": "Kɛ́ Mali' à pe' kwɛi, le Yesu' à si' tɔ́á gbaànle ye: Mali! Le Mali' seela' e gi, le é wɩɩ' à gɔ̀n Ebɛlɛ-wʋ̀ʋ̀ gi ye: Labuni! Wò à pè' kwɛi, ke wo wɩɩ wo: n kààmɔ."
        },
        {
            "numero": 17,
            "texte": "Le Yesu' wɩɩ' à nɛ̀ ye: Miá i kɔɔ zin n bhà, atoosiwo mɔ́ɔ́ tɔɔnkún n nɛ-zàa bhe. Kɛ́ bhè ló n nɛànɛ́bò lià, ke í à pe àng nɛ̀ ye: N nɛ Aatana' é zí àng leng nɛá, ke é ko ni àng gá-nù konó koà Aatana-á láà, máà tɔɔnkún àle-zàa líe le."
        },
        {
            "numero": 18,
            "texte": "Yesu' à pe' kwɛi, le Mali Madala láà é lo' à léban-i àbhà kàlengbò bhà ye: Má Gwilinɛ Kpáa ye, le ya wʋʋ' é kwɛɛ́ɛ́ ni kwɛɛ́ɛ́ à kpɔ́ n bhà le. Yesu kàà ebhà kàlengbò gi-kɔ̀ɔ̀ (Matie 28:16-20; Maki 16:14-18; Luki 24:36-49)"
        },
        {
            "numero": 19,
            "texte": "Kwɛngdo láà à gi yáánpa, é nuu lóówun zigó-kwèèiá láà, Yesu-à kàlengbò' nuu kwíi' gi, à lé ké nuu tayèa kpulungle, ke súó ké àng kɛɛii Zuifu-bò gɔ̀n. Wóò wo káá' wo, ke Yesu' nu, ke e dɔɔ àng zué bhi, ke e wɩ́ɩ́ii àng bhà ye: Kaà wɩ̀ɩ̀bhà' é la oo. Síka òo tóà ka gi."
        },
        {
            "numero": 20,
            "texte": "É bo' à peá kwɛi, le é e kwenglé-lèè ni e siánlé-lèèbò tó gie' àng nɛ̀ le. Wó Gwilinɛ Kpáa ye', àng zowɛ́ɛ́ nii ké daa' tɔ̀kpɛ́tɔ̀kpɛ́lé,"
        },
        {
            "numero": 21,
            "texte": "le é à pe dɛ́ɛ ke wo' àng nɛ̀ ye: Kaà wɩ̀ɩ̀bhà' é la oo. Síka òo tóà ka gi. N nɛ' n bɔyèa kɔɔ' gi láà, n lekini máà ka bɔ àle-kɔ̀ɔ̀ bhà le."
        },
        {
            "numero": 22,
            "texte": "É bo' à peá kwɛi, le é wàà wi' àng bhà, le é wɩɩ' àng nɛ̀ ye: Má ka gba Waa Zaazaa' gá lɛ́ɛ."
        },
        {
            "numero": 23,
            "texte": "À kɛ̀ɛ̀ kwɛiyè láà à gi, ka bian gò' mɛngge bhà, ke Aatana lekini' bian gó' wo à-mɛ̀ɛ̀ bhà lɛ́ɛ̀. Kɛ́ ka à peà ka: bian òo góà mɛ̂ɛ ye' àle bhà laá, bian àa góii à-mɛ̀ɛ̀ bhà Aatana zué. Toma-à Yesu-wùn gbègó-kɔ̀ɔ̀"
        },
        {
            "numero": 24,
            "texte": "Toma' wó nuu à leeà Pɛ̂ɛnnɛ́ láà, Yesu-à kàleng buu-ni-wɛ́ɛ́-piilɛ láà àng gi dini' nuu à gá le. Kɛ́ Yesu' e leng gie fɔ́ɔ́lé wo' à bhámò nɛ̀ tée' gi láà, àle àa nuu bhi."
        },
        {
            "numero": 25,
            "texte": "À bhámò' à pè- à nɛ̀ àle gi dɔ̀ya wo: Kó Gwilinɛ Kpáa yeyèa. Kɛ́ le Toma' à yoobɔ' àng gɔ̀n ye: N leng-le mɔ́ɔ́ yáánpáà pɔ́ngti gbóló-le bhà à kwenglé bhe, ni mɔ́ɔ́ n kɔɛ́ɛ́ sɔɔà pɔ́ngti bhɛ láà àle gi bhe, leni mɔ́ɔ́ zí n kɔɔ sɔɔà dí gbóló láà àle gi à siánlé bhe, à zana-wùn láà àa yaaii n gi mai bhà gbonggbongle."
        },
        {
            "numero": 26,
            "texte": "À yáángɛɛn saakanàà-kwèèi' bhɔ', Yesu-à kàlengbò ké nuu banyè dɛ́ɛ keá ké tà kwíi do láà à gi, ke Toma leng ké àng pé bhi. Yesu ké nu dɛ́ɛ wo', ke kwíi lé ké tayèa kpulungle, le é dɔ' àng zué bhi, le é wɩɩ' àng nɛ̀ ye: Kaà wɩ̀ɩ̀bhà' é la oo. Síka òo tóà ka gi."
        },
        {
            "numero": 27,
            "texte": "É bo' à peá kwɛi, le é wɩɩ' Toma nɛ̀ ye: Bhè i kɔɛ́ɛ́ yɔ́n zé, ke í n kwenglé gaa. È gò' bhi, ke í i kɔɔ yɔ́n zé, ke í à sɔɔ n siánlé. I gò' àle gi, i kpɔ́yè- tó n lé. Miá n-wùn gbègó koo."
        },
        {
            "numero": 28,
            "texte": "Toma' à yoobɔ̀- à gɔ̀n àle gi ye: Áááá, Gwilinɛ Kpáa, má i dɔn Aatana-á, má i dɔn n nɛá tò!"
        },
        {
            "numero": 29,
            "texte": "Le Yesu' wɩɩ' à nɛ̀ ye: Toma, ile i n yeyè' gá, le n-wùn' tuàn bhɔà i gi mai bhà tò é le. Kɛ́ mɛ̂ɛ yemò' àngle kpɔ́yè' n lé, sée ke wàa yáán lefienɛ́ páyèa n bhà láà, àngle pe- sɛ̀ lenglèng' gá le. Sɛ́ikwɛ́ kélé é à bɛɛnzɛ kɔ́lɔ̀' lɔ le?"
        },
        {
            "numero": 30,
            "texte": "È gò' àle gi, Yesu' zí sɔ́n-wùn bhɛ́ibò' kɛɛ' ebhà kàlengbò yàànlé láà, à nààlé àa nuu bhe. Ale tó àa bɛɛnzɛyè' gá sɛ́ikwɛ́ kélé é à gi le."
        },
        {
            "numero": 31,
            "texte": "Kɛ́ à yenɛ́' é bɛɛnzɛyèa sɛ́ikwɛ́ é à gi láà, àle' bɛɛnzɛ̀- kwɛi, ke ka kpɔ́yè- nù tó' wo Yesu lé ye: àle Aatana gbeá, le é zí àbhà yaa-mɛ̀ɛ̀' wò à lee Klisi láà à gá le. Sée ka kpɔ́yè- tò' à lé kwɛi, le sii' àa yɛn láà, ka à sɔlɔ à sáà gi le."
        }
    ]
}