{
    "livre": "jean",
    "chapitre": 21,
    "versets": [
        {
            "numero": 1,
            "texte": "Bhanɛ́ ke' gie', le Yesu' wolo ke wo' ebhà kàlengbò tà Tibelia-kɔ̀ɔ̀yí kpúnglé le. É wolo' àng tà kɔɔ' gi, àle é:"
        },
        {
            "numero": 2,
            "texte": "Simon Piɛli ni Toma' wó nuu à leeà Pɛ̂ɛnnɛ́ láà, ni Natanaɛ' é nuu góà Kana Galilee lùu gi, ni Zebedee gbebò, ni àbhà kàleng bhɛ́ibò piilɛ, wo nuu kiá lɛngdo gi."
        },
        {
            "numero": 3,
            "texte": "Le Simon Piɛli' wɩɩ' e bhámò nɛ̀ ye: Máà ló yí pé. Le wo: È tò' àleá, konó kó lóà i wɛì. Wó lò- àlei, le wó daa' góló gi le. Kɛ́ wòo nù pɔnggepɔ̀ngge sí gbɛi ye láà àle gi."
        },
        {
            "numero": 4,
            "texte": "Yué' bhɔ', wóò wo káá' wo, ke Yesu ké dɔɔ yí kpúnglé, kɛ́ wàa nuu à gànnuà wo: àle à gá le."
        },
        {
            "numero": 5,
            "texte": "Yesu' àng bhàgilawò- àle gi ye: Nbhà náò, pɔngge' àa ka gɔ̀n, ke ká à bhɛlɛ la è? Le wo: Iin."
        },
        {
            "numero": 6,
            "texte": "É nuu ke wò à pe kwɛi, le é wɩɩ' àng nɛ̀ ye: Kà kaà song láà à bili góló kɔɔ sɛ̀ tà za. È tò' kwɛi, ká vé zɛà. Wó bo' song biliá bhi, wàa nuu mɔɔà à gbie lefienɛ́ woá koo, ke vé' à pa kpainkpainle."
        },
        {
            "numero": 7,
            "texte": "Ale kɛɛ le Yesu-à kàleng ye' é nuu àbhà wùndɔ̀yóoáá láà, é wɩɩ' Piɛli nɛ̀ ye: Gwilinɛ Kpáa' bhi loô la o. Simon Piɛli' bo' à maá ye: Gwilinɛ Kpáa' bhi laá, e tó' wo', le é ebhà gbàà kɔɔn si', le é à puola' e gá é nuu' wo' e kpáán-á láà à-wùn gi le. É bo', le é maa' kɔ̀ɔ̀yí tà le."
        },
        {
            "numero": 8,
            "texte": "Ale' kɛɛii kwɛi láà, ke Yesu-à kàleng paánbò ké nuii nà gólóá, ke wo vé-sòng láà à gbieii. Atoosiwo wàa nuu góyèa yí kpúng bhà dɔ́ɔ́n-á. Wó nùù mɛ́ɛtɛlɛ kàindini yɔ̀ɔ̀nsínma' à-nàà tà le."
        },
        {
            "numero": 9,
            "texte": "Wó bo' zinnáá sáalé, wo káá' wo' vé kpɔ̀ paá-yè bhà, ke e yaa pai kúá tà bhi, ke búlù ké kpaa à pé,"
        },
        {
            "numero": 10,
            "texte": "le Yesu' wɩɩ' àng nɛ̀ ye: Ká góii vébò' à zɛi láà, kà nu nà à keá n nɛ̀."
        },
        {
            "numero": 11,
            "texte": "É à pe' kwɛi, le Simon Piɛli' daa' góló gi, le é vé-sòng láà à gbie', le é yɔɔ' nàa yí kpúnglé, ke vé kpákpaa kàindini-kɔɔ-solu ni véwɛ́ɛ́ yaka ké à gi le. Vé ké nuu song payè sínmasìnma láà à gá kwɛi, kɛ́ àle tó gi, song òo nù péé."
        },
        {
            "numero": 12,
            "texte": "Wó bo' song láà à tó gbieá sáalé, le Yesu' wɩɩ' àng nɛ̀ ye: Kà nu ká lígó. Sée àbhà kàlengbò láà àng do ke òo mɔɔ à gílawoá ye: Wáa-le' i gá le? Atoosiwo à gàn ké nuu àng tó yàan wo: Gwilinɛ Kpáa' à gá le."
        },
        {
            "numero": 13,
            "texte": "Yesu' bo' àng leeá kwɛi, le é yɔn' bhi, le é búlù láà à si', le é à nu' àng nɛ̀ nà vé kpɔ̀ paá-yè láà à gá le."
        },
        {
            "numero": 14,
            "texte": "Yesu wòlò ebhà kàlengbò tà-yè gɛnyààn yakanàà' nuu à gò gɔɔ̀le ke è zana-yè zìpieta lɛ́ɛ. Yesu ni Piɛli"
        },
        {
            "numero": 15,
            "texte": "Wó bo' lígóá, le Yesu' Piɛli bhàgilawo' ye: Elaò, Záàn gbe Simon, n lɔ̀ɔ̀- ile i kɛɛ' wo, le à lé- gie i bhámò é àngle tó páipái tà la è? Le Piɛli' à yoobɔ' à gɔ̀n ye: Iin, Gwilinɛ Kpáa, à gàn ké i lekini yàan ye: i lɔ̀ɔ̀ ké n kɛɛ. Yesu' à pè- à nɛ̀ àle gi ye: Yé à pè' kwɛi, í nbhà bháánɛ́bò légba."
        },
        {
            "numero": 16,
            "texte": "É go' bhi, le é zí à bhàgila piilɛnàà wo' ye: Záàn gbe Simon, án wɩɩ ma: n lɔ̀ɔ̀ ké i kɛɛ è? Le Piɛli' à yoobɔ' à gɔ̀n ye: Iin, Gwilinɛ Kpáa, à gàn ké i lekini yàan ye: i lɔ̀ɔ̀ ké n kɛɛ maiá. Yesu' à pè- à nɛ̀ àle gi ye: Ale gi, í i yáán tó nbhà bháábò bhà."
        },
        {
            "numero": 17,
            "texte": "É go' bhi, le Yesu' zí Piɛli bhàgila yakanàà wo' ye: Záàn gbe Simon, án wɩɩ ma: n lɔ̀ɔ̀ ké i kɛɛ maiá è? É gílawo gɛnyààn yakanàà daa' ye: n lɔ̀ɔ̀ ké i kɛɛ è laá, le Piɛli' e wɛí kun', le é à yoobɔ' à gɔ̀n ye: Gwilinɛ Kpáa, ile-mii' i wúnnówùnnó dɔn é la ò, à gàn àa i yàan' wo ye: i lɔ̀ɔ̀ ké n kɛɛ la è? Yesu' à pè- à nɛ̀ àle gi ye: Le àle' kwɛi, í nbhà bháábò légba n nɛ̀."
        },
        {
            "numero": 18,
            "texte": "Kɛ́ án à zɛ i nɛ̀ sii lenglèng tà ma: é nuu ke í tuàn walá-mɛ̀ɛ̀a laá, í nuu ibhà kiásili yeleà i lengá, le lee' é nuu sɛɛà i nɛ̀, í nuu lóà bhi le. Kɛ́ i tóà mɔán-á tée' gi, í i gban gipólóà, le mɛ̂ɛ bhɛ́i ke- ibhà kiásili yele, le è lo nà i gá lee' àa sɛ̀a i gi à bhà le."
        },
        {
            "numero": 19,
            "texte": "Wó Piɛli zɛ' dɔ̀ya kɔɔ' gi, ke é to' Aatana tɔ́ bhɔ-kɔ̀ɔ̀a láà, Yesu' àle to' liélé, le é nuu e biin góà à tà kwɛi lɛ́ɛ. É bo' à peá kwɛi, le é zí wɩɩ' Piɛli nɛ̀ ye: Bhè dɔ n wɛì, ke í táásí n gbóló tà. Yesu ni àbhà kàleng wùndɔ̀yóoáyè"
        },
        {
            "numero": 20,
            "texte": "É à pe' kwɛi, le Piɛli' seela' e gi, le à yáán' daa' e bhá ye' é nuu Yesu-à kàleng wùndɔ̀yóoáá láà à tà, ke e nuii àng wɛì le. Sée é nuu fɔ́ɔ́lé ke Yesu òo ga bhe, àbhà kàleng wùndɔ̀yóoá do láà àle nuu yaayèa táabhɛlɛ bhà à maabhà kilíílé, wó nuu Paki-pɔ̀ɔ̀n bhɛlɛà kwee' gi láà à gi le. Ale do láà àle nuu zí e wun dɔyèa Yesu túlú lé kwɛpoo à gi, le é à bhàgilawo' ye: Gwilinɛ Kpáa, wáa yéè i lénu pɔɔn nɛ̀ le?"
        },
        {
            "numero": 21,
            "texte": "Piɛli' bo' e bhá láà à yeá, ke e nuii wo wɛì kwɛi laá, le é Yesu bhàgilawo' ye: Le mɛ̂ɛ ye é àle wɛ, Gwilinɛ Kpáa, àle pe- tóà lɔ?"
        },
        {
            "numero": 22,
            "texte": "Le Yesu ye: An à pè' ma: mɛ̂ɛ láà e mɔ́à flúúlé, ke n nu bha- bhɔ la ò, ile i pe mɔ̀ng' àle gi le? Ile bhè dɔ' wo n wɛì, ke í táásí n gbóló tà do le."
        },
        {
            "numero": 23,
            "texte": "Yesu' à pe' wo' Piɛli nɛ̀ kwɛi láà, àle kɛɛ le à-wʋ̀ʋ̀' maana' ko laànɛ́bò kpe gi wo: Yesu-à kàleng ye láà àle àa gaii le. Kɛ́ sée Yesu ké à pe' Piɛli nɛ̀ à-wùn gi ye: an à pè' ma: e mɔ́à flúúlé, ke n nu bha- bhɔ la ò, i pe mɔ̀ng' àle gi le? Òo à pe Piɛli nɛ̀ ye: mɛ̂ɛ ye láà àle àa gaii."
        },
        {
            "numero": 24,
            "texte": "Yesu-à kàleng wùndɔ̀yóoá do láà, àle wúnbò láà à tó gɛingóyèa, le é à bɛɛnzɛyèa sɛ́ikwɛ́ é à gi le. Sée kó à gànnu ko: é à gɛin' góyèa láà, e maiá. Bɛɛn é à léyaalé' é"
        },
        {
            "numero": 25,
            "texte": "Yesu' wúnsɛ̀sɛ̀ bhɛ́i yemò' kɛɛ', e ting kpáalàkpààa. Wó woo nù àle tó síà dolodolo, ke wò à bɛɛnzɛ, e n gi ye: wò à bɛɛnzɛà sɛ́ikwɛ́ kélébò' gi láà, e woo mɔɔà lúyáán tà, le à paán- to gbanggbaale le. f1 Yesu ké wɩɩ ye: Nle án bháá maakɛɛ-mɛ̀ɛ̀ lekiniá le. Záàn 10:11 f2 Yesu ké wɩɩ ye: Nle án dɔ̀lɔ̀ng-yìlìa, le kale ká n gbaanbòa le. Záàn 15:5 f3 Wɔlɔm-sɔ̀yabò. Záàn 19:2"
        }
    ]
}