1	Mɛ̂ɛ' wó nuu à leeà Záàn mɛ̂ɛ zúlú-mɛ̀ɛ̀ láà, é walà- bha láà àle bhà, le é gbaan' Aatana-à lòlòkpɔ́à bhìng bhà Zudee lùu gi le.
2	E nuu wɩ́ɩ́à ye: Kà ka kɔɔ gó ka sɔng lé, atoosiwo gwilinɛ' é yaa lɔngwɛ́ɛ́ gi láà à pe' yaa tó wo à bhà.
3	Sée Aatana wʋʋ léban-mɛ̀ɛ̀ Ezai' Záàn láà àle liélé-nàà kpɔ' lii ye: Mɛ̂ɛ' à lòlòkpɔ́-wʋ̀ʋ̀' woloii bhìng bhà láà, e wɩɩ ye: Ká Gwilinɛ Kpáa giè à tà-zàà baa, ke ká à lé-lèè tó mɔɔ kiá dɛlɛngle.
4	Záàn' nùù yɔ̀ɔ̀nmia kua bhái' daaà, le àbhà gbàà tà-bhɛ̀ɛ̀' nuu kwîiá le. É nùù zɔ́ɔ́' góà kai, le è bhienɛ́bò kun, le è to àbhà lígóá le.
5	Bhaamɛ̀ɛ̀ ké nuu góà Zelizalɛm, le wó nuu góà Zudee lùu tó gi, le wó nuu góà zí sɛ́ɛ́bò ye' é Zudɛɛn-gùàn pé à tó gi, le àng tó- gbulu, le wò lo Záàn pé le.
6	Wo nuu wɩ́ɩ́à wo sɔng bhà bhi, le Záàn' nuu àng zúlúà Zudɛɛn-gùàn láà à wɛ́ɛ́, ke bɔ́n- nù gó àng bhà le.
7	Kɛ́ Záàn' à gaa' ye Faliziɛn-bò ni Sadusiɛn-bò ké nuii wo zúlú lià kpeá, le é wɩɩ' àng nɛ̀ ye: Bhei-bhààmɛ̀ɛ̀bò, Aatana yéè ka bhàgila kpáa' wo leekpɔ̀ɔ̀tili gi láà la ò, wáa dàà à gɔ̀n kai-gwìlìkààn daa' ka bhà tò le?
8	È tò' ke ká ka kɔɔ góyèa ka sɔng lé maiá laá, kà à gi-wùn kɛɛ' wo tò le.
9	Kɛ́ kao tóà à pe-le lengdo woà ziàn ka zowɛ́ɛ́ pé bhiá ka: Ablam ginɛ́bò' kale kaá le. Atoosiwo án wɩɩ ka nɛ̀ ma: Aatana ké mɔɔà à bhà, le è gwɛɛbò é à kemò gigala, le wò to Ablam ginɛ́á le.
10	Sée dua-le ké yaayè tóá yílí bɔ lɔ̀ɔ̀ nɛ̀ à sɩ́ɩ-nàà tà. A-wùn gi, yílí ye óó ye' àle àa wɛ́ɛ́ sɛ̀-le bha láà, à gàn- tó ka yàan ka: wóò àle tó bɔ' wo, ke wò pai daa à kián gi le.
11	Nle an ka zúlúii yí' gá ka kɔɔ gò ka sɔng lé-wùn gi le. Kɛ́ mɛ̂ɛ ye' é nuii n zíà láà, àle ké kpókpóá e gie nle n tà. An mɛɛá ke máá àbhà sàbha sì à gɛɛn bhà-nùà lefienɛ́ bhɔyèa le?Ale- nù' laá, è ka zúlúà Waa Zaazaa ni pai' gá le.
12	Abhà láwa ké à kɔlé. È bò' ebhà mini maaá gwɛɛ́sáa lé, ke è à pie láwa láà à gi, e à wɛ́ɛ́ wóóà, le è à ban ebhà sàwa gi le. Kɛ́ à sèlè ni à fɩɩ' è tóà láà, è àle dɔ' woà pai' àa líí gbonggbongle láà à lé le. Yesu zúlúyè (Maki 1:9-11; Luki 3:21-22)
13	À tée láà à gi, Yesu ké go' Galilee lùu gi, le é lo' Záàn pé Zudɛɛn-gùàn wɛ́ɛ́ bhi, ke è e zúlú le.
14	Kɛ́ é waa' bhi, Záàn ké woo à gò à bhà-wʋ̀ʋ̀ pe' à nɛ̀ ye: Nle n bhàwùn' ile-mii' i bhà, ke í bɔ́n gò n bhà-zùlù wo láà la ò, le ile i zí nu nle n pé la è?
15	Le Yesu' à yoobɔ' à gɔ̀n ye: A tó bhi kwɛi, ke í à do' tenglé é àle kɛɛ-le wo. Atoosiwo wún ye' é Aatana zòàwùn-a, à-lèè ké à bhà ke kó àle tó kɛɛ' wo kwɛi do le. É à pe' kwɛi, le Záàn' nuu wɩ́ɩ́à à bhà, le é nuu à zúlúà le.
16	É bo' à zúlúá, le Yesu' to' le é go' yí wɛ́ɛ́ le. À gò yí wɛ́ɛ́-yèa, yéè lɛgaa ke lɔngwɛ́ɛ́ ké lépólóyèa, ke Aatana-à Waa Zaazaa ké yɔɔii ye tìnìng nɛ̀, ke e nuii à tà.
17	Ale' kɛɛii kwɛi láà, ke wʋʋ ke ké góii Aatana pé lɔngwɛ́ɛ́ gi ye: Mɛ̂ɛ é, nbhà nɛ́ wùndɔ̀yóoá' à gá, le à lɔ̀ɔ̀' è n kɛɛ láà à nààlé àa bhe le.