1	É go' bhi, le Waa Zaazaa' zaa go' Yesu-á, le é lo' nà à gá bhìng bhà, ke gɔɔ̀yóo- nù à gidan bhi le.
2	Yesu' bo' súng waaá bhi yáángɛɛn kuà-yisɛá yáán gi ni gbɛi gi tó bhà, le vɔ́n' à kun' le.
3	Gɔɔ̀yóo' é mɛ̂ɛ gidan-mɛ̀ɛ̀a láà é nù- àle gi, le é wɩɩ' à nɛ̀ ye: I tò' Aatana gbeá laá, bhè liangzɛ gwɛɛbò é à nɛ̀, ke wò gálá à gi bhɛlɛ-pɔ̀ɔ̀n-a.
4	Kɛ́ le Yesu' à yoobɔ' à gɔ̀n ye: E bɛɛnzɛyèa Aatana-à sɛ́ikwɛ́ gi wo: Bhɛlɛ-pɔ̀ɔ̀n lengdo-le àa tó mɛ̂ɛ níiá. Kɛ́ wʋʋ páipái' è go Aatana biinlé, àle tó- to mɛ̂ɛ níiá le.
5	À pe zìpieta, gɔɔ̀yóo ké zí lo' nà Yesu-á Zelizalɛm-pɛ̀ɛ̀' é Aatana zòà-pɛ̀ɛ̀ kpáaá láà à gi, le é à dɔ' Aatana-kwìì sáá tà tɛ́nglà-lèè báibài' nuu bhi láà à gi,
6	le é wɩɩ' à nɛ̀ ye: I tò' Aatana gbeá laá, bhè dɔ bhɛ́ ke í bili, ke í zinná sáalé bhee. Atoosiwo e bɛɛnzɛyèa Aatana-à sɛ́ikwɛ́ gi wo: E wʋʋ kpɔ́à ebhà kɩ́ɩ́labò bhà i-wùn gi, ke wò kɔɔ kpɔ́ i gɔ̀n, ke i gɛɛnlé òo nù maa gwɛɛ ke bhà.
7	Kɛ́ le Yesu' à yoobɔ' à gɔ̀n ye: E zí bɛɛnzɛyèa Aatana-à sɛ́ikwɛ́ pɛ́ɛ́n bhɛ́i ke gi wo: Koo à peà kó ko nɛ Aatana Gwilinɛ gidan.
8	É go' àle gi, gɔɔ̀yóo ké ló ke wo' zízí nà Yesu-á tɔɔn dɔ́ɔ́n gànnggànngyè ke gwenglé, le lùu páipái' lúyáán tà, é à tó gie' à nɛ̀, ninà à tó ni pe gwilinɛnɛ̀ zán-á, le é wɩɩ' à nɛ̀ ye:
9	I zinná-le wò' n nɛ̀ kpóng gi ke í yànnglé kɛ̂ɛ n nɛ̀ laá, an pɔɔnbò láà à tó nu' wo i nɛ̀ le.
10	Kɛ́ le Yesu' à yoobɔ' à gɔ̀n ye: Bhè gó bhɛ́ kwɛi, Sɔtana! Atoosiwo e bɛɛnzɛyèa Aatana-à sɛ́ikwɛ́ gi wo: Kó zinná ko kpóng gi ko nɛ Aatana Gwilinɛ lengdo' à nɛ̀ le. Koo mɛngge bhɛ́i ke lɔ̀ɔ̀kɛɛà àle zìpieta.
11	É bo' àle peá kwɛi, gɔɔ̀yóo' kɔɔ gó' wo' à zì le. Yesu yéè lɛgaa, ke Aatana-à kɩ́ɩ́labò ké dɔɔ, ke wo à légièwoii. Yesu ké ebhà bháála zigo' Galilee lùu gi (Maki 1:14-15; Luki 4:14-15)
12	Wó bo' Záàn daaá kààso gi, ke Yesu- à-wùn ma, le é ló dɛ́ɛ wo' Galilee lùu gi le.
13	É kóló wo' Nazalɛti-pɛ̀ɛ̀' gi fɔ́ɔ́lé láà, òo ló yaai bhi-le bhà koo. Kɛ́ é lò- Kapɛlɛnau' wo le. Kapɛlɛnau-pɛ̀ɛ̀ láà e nuu Galilee-kɔ̀ɔ̀yí kpúnglé Zabulon sɛ́ɛ́ ni Nefutali sɛ́ɛ́ nààlé.
14	Sée Yesu' ló' wo' zi yaai bhi láà, àle to' Aatana wʋʋ léban-mɛ̀ɛ̀ Ezai' wʋʋ do' pe' lii, à gi-wùn kɛɛ-kɔ̀ɔ̀a le.
15	Atoosiwo Ezai ké wɩɩ' ye: Mɛ̂ɛ' wó Zabulon sɛ́ɛ́ gi oo, ni mɛ̂ɛ' wó Nefutali sɛ́ɛ́ gi oo, ni mɛ̂ɛ' wó kɔ̀ɔ̀yí pɛ́ɛ́n tà za oo, ni mɛ̂ɛ' wó Zudɛɛn zele tia oo, ni mɛ̂ɛ' wó Galilee sɛ́ɛ́' lùu bhɛ́i gi-mɛ̀ɛ̀bò nai' mɔɔyèa à tà láà à gi oo, mɛ̂ɛ páipái' wó yaayèa wo yán tíibhà kwɛi láà, wóò wo káá' wo, ke lɛi' póló àng tó tà púúá bolongle do le.
16	Angle-mii' wó nuu yaayèa ga wónglé kwɛi, ke ga-gbɔ̀ tó' woo wí àng wun bhà láà, wo wo káá' wo' do, ke mɔ̀ng' maa àng tà velekangle le.
17	É si' lóó láà àle bhà, Yesu' bhe, e wúnsɛ̀' è go Aatana pé láà, à-nàà kpɔ́ zì' go' le. E nuu à peà ye: Kà ka kɔɔ gó ka sɔng lé, atoosiwo gwilinɛ' é lɔngwɛ́ɛ́ gi láà, à pe' yaa tó wo à bhà. Yesu vé zɛ-mɛ̀ɛ̀ yisɛ lee-kɔ̀ɔ̀ (Maki 1:16-20; Luki 5:1-11)
18	Yesu' nuu gieà Galilee kɔ̀ɔ̀yí kpúng pé kwɛnggei, le é laànɛ́bhà-mɛ̀ɛ̀ piilɛ ta' bhi, ke wo song bili-ii yí tà le. Wo nuu mɛngdo leeà Simon, le à tɔ́yààtà' nuu Piɛli-a, le wó nuu mɛ̂ɛ dini leeà Andele le. Mɛ̂ɛ piilɛ láà àng pe bháála' nuu vé zɛyèa le.
19	Yesu' waa' àng lià bhi, le é wɩɩ' àng nɛ̀ ye: Kà daa n wɛì, ke án ka tó bhaamɛ̀ɛ̀-vè sí-mɛ̀ɛ̀a.
20	Wo to' sáabhi, le wó kɔɔ go' woà songbò zì, le wó daa' à wɛì le.
21	Yesu' lónɛ́ ke wo' liélé, le é laànɛ́bhà-mɛ̀ɛ̀ piilɛ bhɛ́i ke ta' zí le. Angle nuu Zebedee gbebò piilɛ' wó nuu àng leeà Zaki ni Záàn láà àng gá le. Wo nuu góló gi kià nà àng nɛá, le wó nuu woà songbò mɔ̀ng-baaà le. Yesu' waa' àng lià, le é àng lee',
22	le wó woà góló to' wo nɛ bhà bhi, le wó to' le wó daa' à wɛì le.
23	Yesu' nùù lóà gieá kwɛi' wo Galilee-pɛ̀ɛ̀ bhɛɛ tà, le è liangzɛ Aatana-kwììbò gi le. É nuu nâa sɛ̀' kpɔ́à láà, e nuu à peà ye: Gwilinɛ' é lɔngwɛ́ɛ́ gi láà, à pe' yaa tó wo à bhà. E zí nuu lóà bhàyúá-mɛ̀ɛ̀ ni nià-mɛ̀ɛ̀ suu tó páipái tóá kélékèlèa.
24	A-wùn gi, à tɔ́ sɛ̀ ké lo' flúúlé, le é mɔɔ lefienɛ́ wo' Sili lùu tó gi zanózànóá le. Ale kɛɛ le mɛ̂ɛ páipái' bhàyúá' nuu àng bhà láà, wó nuu nuà nà àng tóá Yesu pé le. Bhàyúá suu bɛ́ɛ́' nuu àng bhà, le gii' nuu zí gbɔɔn-à àng tà le. Yínaa yóo-mɛ̀ɛ̀bò oo, géèkwɛ́tà-mɛ̀ɛ̀bò oo, gɛɛnban-mɛ̀ɛ̀bò oo, wo nuu nuà nà àng tóá à nɛ̀, le é nuu àng tó páipái tóà kélékèlèa le.
25	A-wùn gi, bhaamɛ̀ɛ̀ ké nuu lóà à wɛì yèèèle. Ang kemò ké nuu góà Galilee lùu gi, le àng kemò' nuu góà Dekapoli lùu gi, le àng kemò' nuu góà Zelizalɛm, le àng kemò' nuu góà Zudee lùu gi, le mɛnggoò' nuu zí góà Zudɛɛn-gùàn zele-lèèbò gi, le wó nu' à wɛì le.