Actes 16

É go' bhi, le Pɔli-nù' lo', le wó waa' Dɛlibu ni Lisitɛlɛ le. É kaa' Yesu pe gi-mɛ̀ɛ̀ do ke' à gi bhi, wo nuu à leeà Timotee. À laú' é nuu Yesu pe gi láà, Zuifu-nɔ̀ng' nuu à gá, le à nɛ' nuu Gɛlɛki-miiá le.

Ko laànɛ́bò' wó Lisitɛlɛ ni Ikoni bhi, wo nuu Timotee láà à zì-wʋ̀ʋ̀ sɛ̀ peà.

A-wùn gi, e nuu Pɔli pé ye: è ló e wɛì, le é à si', le é à waa' bà bhà Zuifu-bò' nuu lùu láà à gi àng-wùn gi le. Atoosiwo à gàn ké nuu mɛnó páipái yàan wo: Gɛlɛki-mii' à nɛá le.

Wó à pe-lò' wo' pɛ́ɛ kpákpaabò bhɛɛ tà láà, wo lo' liè dɔá ko laànɛ́bò tà lɛnói wo: Yesu-à táá-mɛ̀ɛ̀bò ni legilizi liélé sí-mɛ̀ɛ̀bò' wó Zelizalɛm, wó wʋʋ' pe' láà, mɛnó páipái- àle ma le.

A-wùn gi, legilizi bháa ké nuu dɔà, le bhaamɛ̀ɛ̀ dɛ́ɛ' nuu daaà àng pé yáángɛɛn tóá le. Pɔli yáin dàà Masedoni-mii do keá-yè

Pɔli-nù' ló' wo' láà, Waa Zaazaa òo wɩ́ɩ́ à bhà, ke wò bɔ Azi lùu gi ke wò Aatana-à liangzɛ bhi. Ale kɛɛ le wó bɔ' Filizi lùu ni Galati lùu gi le.

Wó bhɔ' daa lià Mizi sɛ́ɛ́ gi, wo nuu lò Bitini lùu gi-lèè guoà. Kɛ́ Waa Zaazaa' nuu zaa gieà àng nɛ̀ Yesu-à gie gi láà, òo wɩ́ɩ́ à bhà àng gɔ̀n.

A-wùn gi, wo gie' wo gɛɛn-á Mizi sɛ́ɛ́ gi, le wó yɔɔ' pɛ́ɛ' wò à lee Toloa láà à gi le.

Gbɛi gi' bhɔ', le Pɔli yáin' daa' Masedoni-mii do keá, ke e bhàiwoii à zì ye: Bhè dɔ gbáágbààa ke í bɔ Masedoni lùu gi, ke í táá ko pé.

Pɔli yáin láà àle' bo' daaá kwɛi, kó sɔɔ' wo' lò Masedoni-lèè guoà, ke kwéé bo à gigaaá, ke à gàn' daa ko yàan ko: Gwilinɛ Kpáa leng' ko leeyèa, ke kó ló àbhà nâa sɛ̀ kpɔ́i bhi le. Lidi wɩ̀ɩ̀ Gwilinɛ Kpáa-wùn bhà-kɔ̀ɔ̀

Kó gò- àle gi Toloa, le kó yítà-gɔ̀ɔ̀ si', le kó lo' vaaanle sɛ́ɛ́' é yí zué ke wò à lee Samotalasi láà à gi,

le à tàalà' bhɔ', le kó yɔɔ' pɛ́ɛ' wò à lee Neapoli láà à gi le. Kó go' bhi, le kó lo' Filipe le. Sée Filipe-pɛ̀ɛ̀ láà àle Masedoni-pɛ̀ɛ̀ kpulunɛ́' bhi à tó tiàànleyèa, le é zí Wɔlɔm-mɛ̀ɛ̀bò yaaléá le. Kó yáángɛɛn kpulunɛ́ ke kɛɛ' pɛ́ɛ láà à gi bhi.

Kó nuu ko zʋʋgɔɔn-à ko: wò bhàiwo Aatana zì lee' gi, à-lèè ke ké tóà yí gieyè do ke kpúnglé lɛnggei. Golo-kwèèi' bhɔ', le kó go' pɛ́ɛ yáànbhà, le kó lo' bhi le. Kó waa' bhi, kó yala', le kó Aatana-à liangzɛ' nɔ́ngbò' nuu banyèa ké tà bhi láà àng nɛ̀ le.

Nɔ́ngbò láà à mɛngdo ke' nuu àng kpe gi Tiatili-nɔ̀ngá, wo nuu à leeà Lidi. É nùù gbáán bháibò' à lóódɔà le. Bhàiwò Aatana zì-nɔ̀ng' nuu à gá Zuifu-bò-kɔ̀i le. E nuu e tóló dɔà sɛ̀a, le Aatana Gwilinɛ' à zowɛ́ɛ́ lépolo', ke Pɔli' nuu liang' zɛà láà, ke è à gima le.

Wó bo' à dàà Yesu pe gi-zùlù woá, àle ni e pé kwíle-mɛ̀ɛ̀bòa laá, le é bhàiwo' ko zì ye: È tò' ke ká n dɔnyèa kpɔ̀ Gwilinɛ Kpáa lé-mɛ̀ɛ̀ lekiniá laá, kà nu ke ká yaa n pé kwíle. E bhàiwo' ko zì flúúlé, le kó kpala' à gɔ̀n le. Pɔli ni Sila dàà kààso gi-kɔ̀ɔ̀

Kó nuu lóà zí bhàiwo-lèè láà à bhà kwɛnggei, kó gùá-nɔ̀ng do ke' ta' zaá, yínaa ké nuu à wɛì, le é nuu dee bɔà à bhà le. Gùá-nɔ̀ng láà à pàtɔnɔngbò ké nuu wélé yeà àbhà dee bɔyè bhà miniminiyèa.

É ko ni Pɔli-nù ko ye', le é nu' dɔi ko gɔ̀n zaá, le é daa' ko wɛì pɛ́ɛ pé, ke e gbáláii ye: Aatana Kpáalàkpàà' é lɔngwɛ́ɛ́ gi tɛ́nglà, àbhà gùábò' mɛ̂ɛbò é àng gá le. Wò mɛ̂ɛ la-zàà' gieii ka nɛ̀ lɛ́ɛ.

E mɔ' wɩ́ɩ́à kwɛi yáángɛɛn kpeá. Pɔli gi' ga', ke ya daa à lààwùn lià, le é seela' e gi, le é wɩɩ' yínaa láà à nɛ̀ ye: Án à pe Yesu Klisi-à pe gi, bhè gó nɔ́ngnɛ́ é à wɛì. Pɔli' à pe' kwɛi, e to' sáaá bhi, le yínaa' go' nɔ́ngnɛ́ láà à wɛì le.

Kɛ́ à pàtɔnɔngbò' à gaa' wo: woà wélé yè à bhà-pɔ̀ɔ̀n' wo zʋʋ' nuu à nɛ̀, ya ló laá, le wó Pɔli ni Sila kun', le wó àng gbie', le wó lo' nà àng gá pɛ́ɛ wunlé-mɛ̀ɛ̀bò zué téng kpáa lé le.

Wó waa' bhi, le wó àng dɔ' kúmanabò zué, le wo: Mɛ̂ɛànbò é, àngle wó koà pɛ́ɛ gi tóii bhúlúbhùlùa le.

Zuifu-bò' àng gá le. Wó bhaamɛ̀ɛ̀ dɔɔii wúlubò' gá é, à-lèè àa à bhà ke mɛ̂ɛ' kó Wɔlɔm-mɛ̀ɛ̀bòa kole kó wɩ́ɩ́ à bhà, ɛ́ɛ́n ke kó à gi-wùn kɛ̂ɛ.

Wó bo' àle peá kwɛi, mɛ̂ɛ' wó nuu bhi, àng tó' zi bɔ' wo' kiá Yesu-à táá-mɛ̀ɛ̀bò nɛ̀ le. Kúmanabò' à pè- sɔ́yabò nɛ̀ àle gi wo: wò gbàà gó Pɔli ni Sila-nù bhà, ke wò àng maa yílíá le.

Wó bo' àng maaá, le wó àng daa' kààso gi, le wó liè dɔ' kààso-kwìì wunlé-mɛ̀ɛ̀ tà wo: è e yáán tó àng bhà sɛ̀ lekiniá le.

À lekini' bhe, wó bo' liè láà àle dɔá à tà kwɛi, e àng bili' wo' kààso-kwìì gélé-lèè ye' é zíà tia dɔ́ɔ́n-á láà à gi, le é yúlu daa' àng gɛɛn bhà le.

Gbɛi zué ké bhɔ', ke Pɔli ni Sila ké bhàiwoii, ke wo táán bɔii, ke wo tɔ́ ban-ii Aatana bhà. Ale' kɛɛii kwɛi láà, ke kààso gi-mɛ̀ɛ̀ paánbò tóló ké àng wʋʋ bhà.

Wóò wo káá' wo, ke sɛ́ɛ́ ké viin-ii, ke é viin-ii kpókpó suu' gá é, ke kààso-kwìì láà à gwɛgóló' nuu sɛ́ɛ́ gi, à tó ké viin-ii à wala. E to' sáabhi, le kààso-kwìì láà à gélé-lèè tó páipái' lépolo', le yɔ̀ɔ́bhɛɛbò' kaan' kààso gi-mɛ̀ɛ̀ tó páipái bhà le.

É kɛɛ' kwɛi, le kààso-kwìì wunlé-mɛ̀ɛ̀ láà é zana' le. Kɛ́ é à gaa-le wo' ye kààso-kwìì lé ké pólóyèa zanózànóá laá, é ebhà siàng-wɛ́ɛ́ gbie' wo' à gi, le yéè woo e leng zɛ le. Atoosiwo e nuu à gi ye: kààso gi-mɛ̀ɛ̀bò tó' woo daa kai.

Kɛ́ le Pɔli' to' le é gbala' kpókpóá ye: Miá wúnyóo kɛɛ i lengá, mɛnó páipái kó zé.

Pɔli' à pe' kwɛi, le kààso-kwìì wunlé-mɛ̀ɛ̀ láà é wɩɩ' ye: Kà mɔ̀ng maa n tà bhee. Wó bo' mɔ̀ng maaá à tà, le é sɔɔ' bhi bàlàa, le é bhuola' Pɔli ni Sila wala, ke à bhà ké viin-ii yàyàle le.

É wolo' nà àng gá, le é wɩɩ' ye: Gwilinɛbò, an mɛɛ kɛɛà ke án la le?

Le Pɔli ni Sila' à yoobɔ' wo: Bhè wɩ́ɩ́ Gwilinɛ Yesu-wùn bhà, ke í la, ka ni i bhà-mɛ̀ɛ̀bòa.

Wó bo', le wó Aatana-à liangzɛ' mɛ̂ɛ láà à leni à pé kwíle-mɛ̀ɛ̀bò tó nɛ̀ le.

E àng si' lɛ́ɛ́lɛ́ɛ́ do láà à bhà gbɛi láà à gi, le é lo' àng bhɛbò lului le. Wo zí to' sáabhi, le wó à dàà Yesu pe gi-zùlù wo' à leni à bhà-mɛ̀ɛ̀bò tóá le.

Wó go' bhi, le kààso-kwìì wunlé-mɛ̀ɛ̀' lo' nà Yesu-à táá-mɛ̀ɛ̀bò láà àng gá e pé kwíle, le é àng léguo', le à leni e bhà-mɛ̀ɛ̀bò tó' wo liágo' wó wɩ́ɩ́' wo' Aatana-wùn bhà láà à-wùn gi le.

Lee' bo' kpɔɔá, le kúmanabò' wo kɔlé-mɛ̀ɛ̀bò bɔ' kààso-kwìì wunlé-mɛ̀ɛ̀ láà à nɛ̀ wo: Bhè i kɔɔ gó mɛ̂ɛànbò láà àng zì, ke wò ló.

Wó bo' à peá à nɛ̀, le à lekini' lo' à léban-i Pɔli bhà ye: Kúmanabò ké mɛ̂ɛ bɔyèa wo: án n kɔɔ gó ka zì. Le àle' kwɛi, kà wolo ke ká kaà ló wo ka fɛ́ɛ gi.

Kɛ́ le Pɔli' wɩɩ' wó mɛ̂ɛ' àng giela' láà àng nɛ̀ ye: Kole-mii' kó Wɔlɔm-mɛ̀ɛ̀bòa é, wa bo ko maaá mɛnó yàànlé, le wa ko daabò tó wo kààso gi, ke à-lɩ̀ɩ̀ òo kpɔ́ lefienɛ́ wo bhe la ò, le wò wɩɩ wo: wó ko wolo bànàkpɔ́ gi la è? Ale àa kɛɛii. Kà ló, ke ká à pe àng nɛ̀ ka: àng lekini' wò nu, ke wò ko sí kààso gi le.

Pɔli wʋʋ láà, gielá-mɛ̀ɛ̀bò' lo' à léban-i kúmanabò bhà, e súó daa' àng gi, wó à ma' wo' wo: Wɔlɔm-mɛ̀ɛ̀bò' Pɔli-nùa láà à-wùn gi.

À kɛ̀ɛ̀ kwɛiyè láà à gi, wo nu' wo' kpɔ́i Pɔli-nù zʋʋ tà, le wó àng si' kààso gi, ke wo bhàiwoii àng zì wo: wò gó péele bhi le.

Kɛ́ Pɔli ni Sila' go' kààso-kwìle, wo lo' Lidi pé kwíle, le wó ko laànɛ́ Yesu pe gi-mɛ̀ɛ̀bò ye' bhi le. Wó bo' àng zʋʋ gbaan-á, le wó nuu lóà le.