Actes 17

Wó go' bhi, wo gie' Anfipoli, le wó gie' Apoloni, le wó waa' Tesaloni le. Zuifu-bòà Aatana-kwìì do ké nuu péng bhi,

le Pɔli' lo' à gi ye è lo Aatana-kwììbò gi zììa kɔi láà à nɛ̀ le. E lo' bhi golo-kwèèi yakaá, le àle ni mɛ̂ɛ' wó nuu nuà bhi, wó nuu Aatana wʋʋ' é sɛ́ikwɛ́ gi láà à gisɔià ziàn le.

É nùù à zíà' peà àng nɛ̀, le é nuu zí à tàpólóà àng nɛ̀ ye: wó Izalae-bò la-mɛ̀ɛ̀ Klisi zɛ wɛ̀iyè' wo', ke è gó gɔɔ̀le ke è zana dɔ̀ya láà, e nuu bɛɛnzɛyèa à bhà kwɛi sɛ́ikwɛ́ gi fɔ́ɔ́lé. Pɔli' nùù à peà àle gi ye: Yesu do' án à-wùn-nàà kpɔ́ii ka nɛ̀ é, àle Aatana-à yaa-mɛ̀ɛ̀ Klisi' wò à pe láà à gá le.

Pɔli' liang' zɛ' láà, e mɛnggoò zʋʋ kun' Zuifu-bò finibhà, le wó daa' Pɔli ni Sila-nù pé le. Gɛlɛki yemò' wó nuu bhàiwò Aatana zì-mɛ̀ɛ̀a Zuifu-bò-kɔ̀i, àng lekini kpe ké wɩɩ' à bhà, le nɔ́ng tɔ́yèbò' nuu bhi, àng kpe' zí daa' àng pe gi le.

À kɛ̀ɛ̀ kwɛiyè láà à bhɔlɔ ké waa' Zuifu-bò gi, le wó liéfɩɩ mɛ̀ɛ̀ gwílí yóyoo kemò woo' pɛ́ɛ pé, le wó àng naa' wo bhà, le wó dɔ' kpulukpuluá, le wó gbaan' wee dɔà péele bhulukuule le. Wó gbùlù- àlei, le wó lo' mɛngge' wó nuu à leeà Zazon láà à pé kwíle Pɔli ni Sila kún lià, ke wó nu nà àng gá pɛ́ɛ-mɛ̀ɛ̀bò zué le.

Kɛ́ wó àng guo', ke wòo àng ye bhi, le wó Zazon ni ko laànɛ́ bhɛ́i kemò kun', le wó lo' nà àng gá pɛ́ɛ wunlé-mɛ̀ɛ̀bò zué, le wó gbaan' gbáláà wo: Mɛ̂ɛànbò' wó lúyáán tó dùnng góyèa láà, wo nuyèa zé tenglé, le Zazon' àng yagóyèa e pé kwíle le.

Sée àng kekekèke wàa gwilinɛ Sezaa-à tɔ́ngbò-le yàkisí, le wò wɩɩ wo: wo pe gwilinɛ kpáa bhɛ́i ke ké bhe, le wò à lee wo Yesu le.

Mɛ̂ɛ' wó à pe' kwɛi láà, àng wʋʋ ké pɛ́ɛ-mɛ̀ɛ̀bò ni wunmɛ̀ɛ̀bò tó zowɛ́ɛ́ wala'.

A-wùn gi, wo zin' Zazon ni à bhámò lé, le Zazon-nù' pɔɔn go' àng nɛ̀, le wó nuu wo kɔɔ góà àng zì le. Pɔli ni Sila wàà Belee-yè

A-wùn gi, gbɛi-le' bo' yaaá, ko laànɛ́bò' nuu bhi, wó tó' wo' le wó lo' Pɔli ni Sila-nù dɔi zaá, ke wò ló Belee le. Pɔli-nù' lo' ke wò waa bhi, le wó sɔɔ' Zuifu-bòà Aatana-kwìle le.

Kɛ́ Zuifu yemò' nuu bhi láà, bhɛɛ yàà bhaamɛ̀ɛ̀bò bhà-zòwɛ́ɛ́ ké nuu àngle gwílé Tesaloni-Zùìfu-bò-le bhà. A-wùn gi, Aatana wʋʋ wàà àng bhà-yè gi-wùn ké sɛɛ lekinilèkini wo' àng nɛ̀, le wó nuu kpooà Aatana-à sɛ́ikwɛ́ bɛɛn gi lɛ́nólɛ̀nó bhà, ke Pɔli' nuu wʋʋ' peà àng nɛ̀ láà, è tò' maiá, wó à-tùlé ye le.

À kɛ̀ɛ̀ kwɛiyè láà à gi, Zuifu yemò' nuu bhi, àng kpe kpáalàkpàà tó ké wɩɩ' Yesu-wùn bhà. É go' àle gi, Gɛlɛki-bò' nuu péng bhi láà, àngbhà nɔ́ng tɔ́yèbò kpe ni miɔnbò kpe tó ké zí wɩɩ' Yesu-wùn bhà.

Kɛ́ Zuifu-bò' nuu Tesaloni, wó à ma' wo: Pɔli ké zí Aatana-à liangzɛii Belee-lèè leng bhà zí laá, le wó nu' daai pɛ́ɛ-mɛ̀ɛ̀bò wunbílí gi, le wó àng tó dɔ' bhulukuule le.

É kɛɛ' kwɛi, le ko laànɛ́ Yesu pe gi-mɛ̀ɛ̀bò' nuu bhi láà, wó to' le wó lo' Pɔli dɔi zaá kɔ̀ɔ̀yí lé-zàà tà le.

Kɛ́ Sila ni Timotee-nù-le ké to' Belee bhi. Mɛ̂ɛ' wó lo' Pɔli dɔi láà, wo to' à wɛì flúúlé, le wó waa' kiá Atɛni le. Wó nuu sɛsíà, le é wʋʋ kpɔ' àng bhà ye: Ka lò', ká à pe Sila ni Timotee nɛ̀ ka: wò nu zólé, ke wò n ta. Pɔli liangzɛ̀ Atɛni-yè

Pɔli' nuu e yáán tóà e tááyóóbò gɔ̀n téei Atɛni láà, à gélé ké nuu sieà à bhà é nuu yobò' yeà pɛ́ɛ pé lɛnólɛ̀nói láà à-wùn gi.

É nùù liang zɛà àlei ziàn Aatana-kwìle Zuifu-bò ni mɛ̂ɛ bhɛ́i yemò' nuu bhàiwoà Aatana zì àng-kɔ̀i láà àng nɛ̀ le. Lee' nuu zí kpɔɔà kɔi dolodolo, e nuu liangzɛà é nuu mɛ̂ɛ' àng taà téng kpáa lé àng nɛ̀.

Wúnnó zíà guo-mɛ̀ɛ̀ kemò' nuu Epikuli pe gi-mɛ̀ɛ̀a, ni àng yemò' nuu zí Sitoi-zàà tà, wó gbààn Pɔli gbègóà àle gi le. Ang kemò ké nuu à peà wo: Biin wɩ́ɩ́-mìnɛ́ é e wɩɩ ye lɔ? Le àng kemò' nuu zí à peà wo: E bhɔ yobò' è go lùu bhɛ́i gi, àngbhà kɩ́ɩ́la dɔ-mɛ̀ɛ̀ ke bhà. Kɛ́ wó Pɔli ye' wo', ke e Yesu-wùn ni ga-mɛ̀ɛ̀bò zana-wùn-nàà sɛ̀ kpɔ́ii láà, àle kɛɛ le wó nuu à peà kwɛi le.

A-wùn gi, wo à si' kwɛnggei, le wó lo' nàa à gá Aleopaze le. (Atɛni-tɔ̀ɔ̀n gwenglé-lèè', wó nuu lɩ́ɩ́ kpɔ́à bhi láà, wò àle lee kwɛi le.) Wó waa' bhi, le wó wɩɩ' à nɛ̀ wo: Í nuii bhaamɛ̀ɛ̀bò dɔɔi Aatana-wùn dɛ́ɛ' à gá é, à zíà' lɔ le? Bhè à pe ko nɛ̀.

Atoosiwo í wúnbò' daaii ko tóló gi láà, à-mài ké mɛ̂ɛ ni. À kɛ̀ɛ̀ kwɛiyè láà à gi, kó à pé ke kó à gi leng ma kpákpálé.

Sée bha' nùù gieà Atɛni-mɛ̀ɛ̀bò tó páipái ni àngbhà yàngpébò tó tà wún dɛ́dɛɛbò' è daa ziàn láà, ke wò àle peii, ɛ́ɛ́n ke wò wo tóló dɔii àle gɛingóyè bhà le.

Wó Pɔli bhàgilawo' kwɛi, le é dɔ' mɛ̂ɛ' wó nuu banyèa ké tà Aleopaze láà àng tó zué, le é wɩɩ' ye: Atɛni-mɛ̀ɛ̀bò, án à-lèè yeyèa ma: Wúnbò' à ganng- zin Aatana-wùn bhà láà, à tó páipái-wùn ké ka gɔ̀n kpókpóá miniminiyèa.

Atoosiwo án gieà kaà pɛ́ɛ é à pé, ka pɔɔnbò' à lɔ̀ɔ̀kɛɛ láà, án à tó súnmago. À kɛ̀ɛ̀ kwɛiyè láà à gi, án kɔnɔ do yeyè lefienɛ́á, ke bɛɛn ké zɛyèa à bhà wo: Aatana ye' é mɛngge àa à dɔn láà, à lɔ̀ɔ̀kɛɛ-lèè' é. È tò' kwɛi, ke Aatana ye' ka à lɔ̀ɔ̀kɛɛ, ke káá à dɔn láà, an àle-wùn-nàà kpɔ́ii ka nɛ̀ é le.

Aatana' é lúyáán daa' ninà à tà-pɔ̀ɔ̀n tóá, ke é sɛ́ɛ́ ni lɔngwɛ́ɛ́ tó wunlé-mɛ̀ɛ̀a láà, yàa yii gɔòbò lɔ̀ɔ̀kɛ̀ɛ̀i-kwìì' bhaamɛ̀ɛ̀bò- à dɔ wo kɔɔá, àle ke gi.

Mɛngge àa à légièwo. Wánglafila, àle-mii' è mɛnó páipái níi daa àng gi, ke è ko gba tɛ́i-wàà ni ko bhàwùn' pɔɔn' à bhà à tó páipáiá láà, àle àa daa kpala gi, ke è zʋʋ yaa ko kwenglé-pɔ̀ɔ̀n kekekèke nɛ̀.

Aatana láà àle zí à kɛɛ', le bhaamɛ̀ɛ̀bò' wɛinnáyèa lúyáán tà lɛnó páipái gi, sée ke mɛngdo fíole yuɛn' àng tó páipáiá le. Ang tó- wo pe mɔ́ woà nàà' tà, ni wò yaaà lee' gi, e à tó nàà kaan' fɔ́ɔ́lé, ke òo àng daa lefienɛ́ wo bhe.

Sée Aatana' àle kɛ̀ɛ̀ kwɛi, ke bhaamɛ̀ɛ̀bò kó nù e guo' wo, ke kó ko bháa dɔ, ke kó ló ko kɔɔ wawíá flúúlé, keèbhi ko à yeà le. Kɛ́ sée Aatana-lèè àa dɔ́ɔ́n-le keá mɛngge ko bhà.

Atoosiwo ko níi' ko gi oo, ni ko pàlebhà-yè oo, leni koà tòsɛ́ɛ́là-yè oo, à tó- gò Aatana do láà àle gi le. Kaà yei kemò' zí wún' pe', àle lɛ́ɛ. Wo wɩɩ wo: À ginɛ́' konó koá le.

Le àle' kwɛi, ke ko suu- gò Aatana' gi laá, à-lèè àa à bhà ke è tó ko gi ye: Aatana- bhɔ̀ pɔɔnbò' bhaamɛ̀ɛ̀bò- à kɛɛ wo kɔɔá, gànma káányè ni wo yáinsɛ́lɛ́á láà àle ke bhà le. Wò sánng-wɛ́ɛ́ ni wɛ́ipúúwɛ́ɛ́bò' pie oo, ni gwɛɛbò' wò à yan láà oo, Aatana àa ye àle ke nɛ̀.

Mɛnó páipái' nuu wo yán tíibhà tée' gi láà, Aatana òo àle yàkisí. Kɛ́ le é nâa kpɔ́ii dɔ̀yáa gá bhaamɛ̀ɛ̀ tó páipái nɛ̀ lɛnólɛ̀nó gi ye: wò wo kɔɔ gó wo sɔng lé le.

Atoosiwo Aatana ké lúyáán tà-mɛ̀ɛ̀ tó páipái bhàgila kpáa wo lóó kpɔ́yèa. A-kwèèi láà è bhɔ̀', Aatana' mɛ̂ɛ' yaayèa bhàgila kpáa wo-mɛ̀ɛ̀a láà, à-mɛ̀ɛ̀ ké mɛnó pe peà à pe lià. A-wùn gi, Aatana ké à go' gɔɔ̀le, le é à zana', ke mɛnó- nù à dɔn bhàgila kpáa láà à wo-mɛ̀ɛ̀a le.

Mɛ̂ɛ' wó nuu bhi, wó bo' ga-mɛ̀ɛ̀bò zana-wùn láà àle maá, mɛnggoò' gbaan' wo' sóósíà Pɔli bhà, le àng kemò' nuu wɩ́ɩ́à wo: Kó i wʋʋ láà à paán maà lóó bhɛ́i ke bhà.

É kɛɛ' kwɛi, le Pɔli' e pe gó wo' àng kpe gi bhi le.

Kɛ́ àle tó gi, mɛnggoò ké dɔ' à wɛì, le wó wɩɩ' Gwilinɛ Kpáa-wùn bhà le. Aleopaze gi-mɛ̀ɛ̀ do' wó nuu à leeà Denisi, ni nɔ́ngnɛ́ ke' wó nuu à leeà Damalisi, wo nuu àng bhɛɛ gi, ni mɛnggoò bhɛ́i kemòa zí.