Actes 18
1
É go' bhi, le Pɔli' wala' Atɛni, le é lo' Kolɛnti le.
2
É Zuifu-mii ke' ta' bhi láà, wo nuu à leeà Akila. Kɛ́ wo à kpɔ' Pɔnti lùu gi. Pɔli ké waa' bhi, ke Akila ni àbhà nɔ́ng' wó nuu à leeà Pilisii láà wa gó Itali lùu gi, ke wa nu yaai bhi dɛ́ɛá. Gwilinɛbòà gwilinɛ Kolodi' tɔ́ng' dɔ' ye: Zuifu-bò tó- gó Wɔlɔm láà, àng leng' gò- bhi àle-wùn gi, le wó nu' yaai Kolɛnti le. Pɔli' waa' bhi, le é lo' àng lià,
3
le é nuu' wo' ke àle ni àng gá-nù àng kɛɛ-gàlá ké do láà, é lo' yaai àng pé kwíle, le wó nuu bháála kɛɛà kiá le. Ang dɔ̀n-a-wùn' kwɛi láà, àle nuu wélé' wò à gbáiwa dɔ láà à kɛɛyèa le.
4
Golo-kwèèi' nuu bhɔà kɔi dolodolo, Pɔli ké nuu liangzɛà Zuifu-bòà Aatana-kwìle, le è dɔà kɔɔ' gi ke è wʋʋ' peà láà, è Zuifu-bò ni Gɛlɛki-bò' nuu bhi àng tó zʋʋ kún, è à-lèè guo le.
5
Kɛ́ Sila ni Timotee-nù' bo' gó-le woá Masedoni lùu gi, ke wò waa bhi, Pɔli' nùù goloà Aatana-à liangzɛ-kɩ̀ɩ̀' bhà le. E nuu e kɔɛ́ɛ́ gieà Zuifu-bò nɛ̀ sɛ́ɛ́ gi gilígilílé, le è à pe ye: Izalae-bò la-mɛ̀ɛ̀ Klisi' wò à pe láà, àle Yesu-á le.
6
Kɛ́ wó nuu' wo' à wʋʋ gbègóà, ke wo sɔ̂ɔnwoii à gɔ̀n láà, le é ebhà gbàà gimaa' àng tɔ́á, le é lángga daa' àng pé ye: Ka lò' pailé, ke ka lekini ka daa-wùn' à gá le. Ka kekekèkeà lángga àa n kún-ii. Kɛ́ à gàn- tó ka yàan ka: è sí tenglé bhà, án lóà mɛ̂ɛbò' wàa Zuifu-a àng pé.
7
Pɔli' bo' à peá kwɛi, le é go' bhi, le é lo' mɛngge' é nuu bhàiwoà Aatana zì Zuifu-bò-kɔ̀i, ke wó nuu à leeà Titiu Zusitu láà, à pé kwíle le. Sée mɛ̂ɛ láà àbhà kwíi ké nuu Zuifu-bòà Aatana-kwìì maabhà kilíkilílé.
8
Kɛ́ àngbhà Aatana-kwìì wunlé-mɛ̀ɛ̀' wó nuu à leeà Kilisipu láà, àle ké wɩɩ' Gwilinɛ Kpáa-wùn bhà, à leni à bhà-mɛ̀ɛ̀ tó páipáiá. Kolɛnti-mɛ̀ɛ̀bò' wó nuu wo tóló dɔà Pɔli wʋʋ bhà láà, àng kpe kpáa ké zí wɩɩ' Yesu-wùn bhà, le wó àng dàà à pe gi-zùlù wo' le.
9
Gbɛi do ke gi, Pɔli yáin ké daa', ke Gwilinɛ Kpáa ké à peii à nɛ̀ ye: Nbhà liang zɛ i wɛ̂ɛá do, miá súó ke í dɔ i tàsáná.
10
Nle án i wɛì, mɛngge àa kɔɔ zin-ii i bhà, ke è wúnyóo kɛɛ i gá. Atoosiwo bhaamɛ̀ɛ̀bò' wó péng zé é, n pe ké àng gi kpeá.
11
A-wùn gi, Pɔli ké mɔ' Kolɛnti, le é kwee do ni mɛ̂ɛ saado kɛɛ' bhi, ke e Aatana wʋʋ zíà peii ziàn bhaamɛ̀ɛ̀bò nɛ̀ bhi le.
12
Kɛ́ Galion' nuu kúmana kpáèa Akai lùu wunlé tée' gi láà, Zuifu-bò ké zi bɔ' kiá Pɔli nɛ̀, le wó à kun', le wó lo' nà à gá lɩ́ɩ́-tèng bhà, le wó à daa' wo:
13
Mɛ̂ɛàn é, é nuii nà Aatana lɔ̀ɔ̀kɛɛ-gɛ̀ɛ̀n dɛ́ɛ ye' gá é, àle- koà wúlu gó gɛɛn' gá le.
14
Wó bo' à peá kwɛi, Pɔli yéè liangzɛ zigó tée' gi, ke è à zìdaa, le Galion' to' le é wɩɩ' Zuifu-bò nɛ̀ ye: É woo nù tóà wúnyóo kɛɛyè keá, ɛ́ɛ́n tɔ́ng sieyè keá, án woo n tóló dɔà ka wʋʋ bhà zììa-kɔ̀i.
15
Kɛ́ à ye' é ka ké gbègó-wùn-a wɩ́ɩ́-kɔ̀ɔ̀bò, ni pɔɔn tɔ́bò, ni ka leng kaà wúlubò-le-wùn gi láà, ka lesósó ka tà-wùn' àleá le. Máá à pié ke nle án tó wún yemò láà àle gi-lìangzɛ-mɛ̀ɛ̀a.
16
Galion' bo' à peá kwɛi, le é Zuifu-bò láà àng piékɛɛ' lɩ́ɩ́-tèng bhà bhi le.
17
Ale' kɛɛ' kwɛi, àng tó páipái' yʋʋlá' wo' Aatana-kwìì wunlé-mɛ̀ɛ̀' wó nuu à leeà Sositɛni láà à tà, le wó gbaan' à maaà lɩ́ɩ́-tèng bhà bhi, ke Galion àa à yàkisí lefienɛ́ wo le. Pɔli sɛì ke è ló Antiɔsi-yè
18
Kɛ́ àle tó gi, Pɔli ké to' Kolɛnti, le é mɔ́ leng wo' bhi le. É bo', le é yué daa' ko laànɛ́ Yesu pe gi-mɛ̀ɛ̀bò nɛ̀, le é daa' yítà-gɔ̀ɔ̀ gi, le é lo' Sili lùu gi, à leni Pilisii ni Akila-a le. Kɛ́ Pɔli òo daaà yítà-gɔ̀ɔ̀ gi bhe, e líe e wun bhɔ́ɔ́bhɔ́ɔ́ go' Sankele. Atoosiwo e nuu kwɛi, ke ya daa gban gi Aatana zué.
19
Wó waa' Efɛzi, le Pɔli' sɔɔ' Aatana-kwìle, le à leni Zuifu-bò wó gbaan' Aatana wʋʋ gisɔià kiá le.
20
Wó bhàiwò- à zì àle gi wo: è mɔ́nɛ́ ke wo wo pé bhi le. Kɛ́ Pɔli òo wɩ́ɩ́ à bhà,
21
le é yué daa' àng nɛ̀ ye: Aatana- wɩ̀ɩ̀' à bhà, án tuàn sɛíà, le an nu ka lià le. Pɔli' bo' à peá kwɛi, le é e táá yóóbò to' Efɛzi, le é go' bhi le.
22
É yaa' yítà-gɔ̀ɔ̀ gi, le é lo' zinnái Sezalee le. É waa' bhi, le é lo' Zelizalɛm, ke è wɩ́ɩ́ legilizi gi-mɛ̀ɛ̀bò bhà bhi le. É bo' wɩ̀ɩ̀bhà láà à kɛɛá, le é yɔɔ', le é lo' Antiɔsi le.
23
É bo' yiiyàànnɛ́ ke kɛɛá bhi, le é ló dɛ́ɛ wo', le é gie' Galati ni Filizi sɛ́ɛ́bò bhɛɛ tà, ke e lóii Yesu pe gi-mɛ̀ɛ̀bò tó bháa dɔá dɔ́ɔ̀nle le. Apolo lò Efɛzi ni Kolɛnti-yè
24
Ale' kɛɛii kwɛi láà, ke Zuifu-mii do ke' wó nuu à leeà Apolo, ya waa Efɛzi. Alesandili-mii' nuu à gá le. E nuu dɔn-à wɩ́ɩ́á, le é zí nuu Aatana-à sɛ́ikwɛ́ bɛɛn dɔn-à miniminiyèa le.
25
E nuu kwɛi, ke wa woo à dɔɔ táásì Gwilinɛ Kpáa-à zaa tà-kɔ̀ɔ̀ tóá. Yesu-wùn-pài ké nuu à tà bɩ́bɩ́lé. À kɛ̀ɛ̀ kwɛiyè láà à gi, e nuu àbhà liangzɛà, le é nuu zí bhaamɛ̀ɛ̀ dɔɔà à-wùn-a sɛ̀a, le à pá-lèè àa nuu bhe le. Sée Záàn pe bhaamɛ̀ɛ̀ zúlúyè láà, àle lengdo-wùn' nuu à yàan le.
26
Kɛ́ é bo' waaá Efɛzi, é gbaan' wo' Gwilinɛ Kpáa-à liangzɛà Aatana-kwìle, ke síka kekekèke àa à gi le. À kɛ̀ɛ̀ kwɛiyè láà à gi, Pilisii ni Akila-nù' nuu bhi láà, wó bo' à wʋʋ maá, wó à lee' wo', le wó à yala', le wó Aatana-à zaawɛ́ɛ́ gie' à nɛ̀ sɛ̀ lengá le.
27
É go' àle gi, e nuu Apolo pé ye: é ló Akai lùu gi, le ko laànɛ́bò' à bháa dɔ' à-wùn bhà, le wó sɛ́ikwɛ́ bɔ' Yesu pe gi-mɛ̀ɛ̀bò' nuu lùu láà à gi àng nɛ̀, ke wò à-tɔ̀ɔ̀ kún sɛ̀a le. É lo' ke è waa bhi, Aatana' gɛ̀ilɛ' to' à bhà láà, à tɔnɔ ké to' wɩ̀ɩ̀ Yesu-wùn bhà-mɛ̀ɛ̀bò bhà kpáaá miniminiyèa.
28
Atoosiwo e nuu Zuifu-bò wɛì-wùnwɛ́ɛ́ pólóà e bháa bhà mɛnó yàànlé, le Yesu tò Izalae-bò la-mɛ̀ɛ̀ Klisi-a-yè láà, é nuu à tò maiá-lèè gieà àng nɛ̀ Aatana-à sɛ́ikwɛ́ gi kpákpálé le.