Actes 6
1
É nuu tée láà à gi, Yesu pe gi-mɛ̀ɛ̀bò dààpé lesósó' nuu daaà, le lee' nuu kpɔɔà kɔi dolodolo láà, wó nuu lígó gúlúà wo ké tà le. Kɛ́ Zuifu-bò' wó daa' Yesu pe gi kwɛi láà, àng yemò' go' sɛ́ɛ́ pé, wo nuu àng leeà Gɛlɛki-bò, le àng yemò' wó nuu lùu gi bhi, wó nuu àng leeà Ebɛlɛ-bò le. É yɔn' bhi, ke Gɛlɛki-bò láà wo yuun gi-zààbɔii Ebɛlɛ-bòa, wo: wo wo pe gɛɛn-nɔ̀ngbò gba yáàngóngpéá pɔɔn gúlú lià ziàn bòo.
2
Wún láà é daa' Yesu-à táá-mɛ̀ɛ̀bò buu-ni-wɛ́ɛ́-piilɛ láà àng tóló gi, le wó à pe gi-mɛ̀ɛ̀bò tó páipái ban' ké tà, le wó wɩɩ' àng nɛ̀ wo: Àa sɛ̀a, ke kole kó ko kɔɔ zuɛ Aatana-à liangzɛ-wùn-le bhà bhɛlɛ-pɔ̀ɔ̀n gúlú-wùn-le gi.
3
Le àle' kwɛi, n laànɛ́bò, bhaamɛ̀ɛ̀ saapiilɛ' é àng tɔ́ sɛ̀' bhe, ke Waa Zaazaa' àng payèa, ke wó zí wún dɔn-mɛ̀ɛ̀bòa, kà àng sí ka kpe gi, ke ká nu nà àng gá, ke kó àngle yaa gàlá ye láà àle kɛɛ-mɛ̀ɛ̀a le.
4
È tò' kwɛi, le kole ko bhàiwo-kɩ̀ɩ̀ ni Aatana-à liangzɛ-kɩ̀ɩ̀-le kun ko níiá do, le kwáá yáinga waa à bhà le.
5
Wó à pe' wo' kwɛi láà, e mɛ̂ɛ kpe' wó nuu bhi láà àng tó zʋʋ kun', le wó bhaamɛ̀ɛ̀bò si' wo finibhà, le wó nu' nà àng gá, ke wò àng yaa le. Etiɛni' à kpɔ́yè' nuu Yesu lé kelekelele, ke Waa Zaazaa' nuu à payèa láà, wo nu' nà à gá, le wó nu' nà Filipu-a, le wó nu' nà Polokɔɔ-a, le wó nu' nà Nikanɔɔ-a, le wó nu' nà Timon-a, le wó nu' nà Pamɛnasi-a, le Antiɔsi-mii Nikola' àa nuu Zuifu-a, kɛ́ ke é nuu daayèa àngbhà sée gi láà, wó nu' zí nà à gá,
6
le wó àng tó kɔ́nɔ́wo' Yesu-à táá-mɛ̀ɛ̀bò nɛ̀ le. Wó bo', le Yesu-à táá-mɛ̀ɛ̀bò láà wó àng lébhàiwo' Aatana zì, ke wo wo kɔɔ dɔyèa àng tà le.
7
E nuu tée láà à gi, ke Aatana wʋʋ ké lóii sɔ́á, ke Yesu pe gi-mɛ̀ɛ̀bò- daa lesósó' woii à lé do gbanggbaale Zelizalɛm le. È nù yɔ́n bhi, ke yíkpáá-mɛ̀ɛ̀ kpe kpáa tó ké wɩ́ɩ́ii Yesu-wùn bhà. Etiɛni kún-kɔ̀ɔ̀
8
Aatana ké nuu gɛ̀ilɛ kpáa tóyèa Etiɛni bhà, le é nuu zí à gbayèa wún kpókpó kɛɛ-wààa gbanggbaale le. À kɛ̀ɛ̀ kwɛiyè láà à gi, Etiɛni ké nuu lábhili-wùn ni sɔ́n-wùn kpákpaabò kɛɛà, le pɛ́ɛ tó' nuu à-lèè yeà le.
9
Kɛ́ le Zuifu kemò' gbaan' Etiɛni gbègóà le. Mɛ̂ɛbò láà àng kemò ké nuu góà Silɛni ni Alesandili-lèèbò gi, le Aatana-kwìì ye' wò à lee gò nuanɛ̀ gi-mɛ̀ɛ̀bòà Aatana-kwìì láà, wó nuu à gi-mɛ̀ɛ̀bòa le. Ang kemò ké nuu zí góà Silisi lùu ni Azi lùu gi.
10
Kɛ́ Etiɛni-à wún dɔn-kɔ̀ɔ̀ miniminiyè láà à-wùn gi, wàa nuu dɔ̀lèè yeà à bhà, le é nuu zí liangzɛà Waa Zaazaa bháa' bhà láà, wàa nuu mɔɔà dɔá à folongwɛ́ɛ́ lé le.
11
Wó mɛnggoò gbalé kɛ̀ɛ̀ àle gi, ke wò nù à pe wo: Kó mɛ̂ɛ é à ye', ke e Moizi ni Aatana bhàfángwoii le.
12
Wó pɛ́ɛ-mɛ̀ɛ̀bò ni tɔ́ng dɔ-mɛ̀ɛ̀bò ni mɔaagbebò tó zowɛ́ɛ́ walà- kwɛi' wo, le wó nu' Etiɛni kún-i yàn-gbàn tà, le wó lo' nàa à gá Sanedɛnɛ zué le.
13
Wo zí mɛnggoò naa' wo bhà, ke wò woà séenɛ̀ kɛ̂ɛ bele tà, le wó lo' nà àng gá, ke wò àng gbaan le. Wó waa' bhi, le séenɛ̀ kɛ̀ɛ̀ bele tà-mɛ̀ɛ̀bò láà wó wɩɩ' wo: Mɛ̂ɛàn é àa e kɔɔ gó Aatana-à tɔ́ng ni Aatana zòà-kwìì é à màà biin gi-yè zì.
14
Kó à ta', ke e wɩ́ɩ́ii ye: mɛ̂ɛàn' nuu góà Nazalɛti, ke wó nuu à leeà Yesu láà, e Aatana-kwìì é à wíà, le Moizi' wúlubò' yaa' lii, ke wó à léban' ko bhà láà, è à go le.
15
Wó nuu à peà kwɛi, ke mɛ̂ɛ páipái' wó nuu Sanedɛnɛ gi bhi, àng tó ké Etiɛni gaaii gbàànle. Kɛ́ wóò wo káá' wo, ke à wɛí-lèè zán ké bhɔii gɛ̀lɛ̀nggɛ̀lɛ̀ngle ye Aatana-à kɩ́ɩ́la ke pe nɛ̀.