Apocalypse 6
1
É go' bhi, máà lɛgaa ke Bháánɛ́' sɛ́ikwɛ́ léta-lèè saapiilɛ láà à fɔ́ɔ́yè lépóló. É kɛɛ' kwɛi, le pɔɔn yáányè yisɛ láà à do' gbala' kpókpóá ye la nɛ̀, le é wɩɩ' ye: Bhè nu.
2
Máà lɛgaa ke wo, ke sʋʋ púú do ké dɔɔ, ke mɛngge ké à tà nà sáaá e kɔlé. Wó mɛ̂ɛ láà à gba' fánngwɛ́ɛ́á, le é lo' gwili bhà ye kwɛ́lɛ́ kpáa nɛ̀, ke è nù sɛ́ɛ́ tó gó le.
3
Bháánɛ́' sɛ́ikwɛ́ létàa-pɔ̀ɔ̀n piilɛnàà lépolo', le án zí pɔɔn yáányèbò láà à piilɛnàà wʋʋ ma', ke e wɩ́ɩ́ii ye: Bhè nu.
4
É à pe' kwɛi, le sʋʋ bhɛ́i ke' to' le é wolo' à lé le. Ale ké nuu tɛ́ɛ́n-á manaile. Mɛ̂ɛ' é nuu yaayèa à tà, wo à gba' siàng-wɛ́ɛ́ kábhákoá, le wó gwili dàà sɛ́ɛ́ tà lɛnólɛ̀nó gi-bhàà daa' à gi, é kɛ̂ɛ kwɛi ke bhaamɛ̀ɛ̀bò- wo ké zɛ ké finibhà le.
5
Bháánɛ́' sɛ́ikwɛ́ létàa-pɔ̀ɔ̀n yakanàà lépolo', le án pɔɔn yáányèbò láà à yakanàà wʋʋ ma', ke e wɩ́ɩ́ii ye: Bhè nu. Máà lɛgaa ke sʋʋ tíi ké dɔɔ bhi, ke mɛngge ké à tà nà kíloá e kɔlé.
6
Máà n tóló dɔ ke mɛngge ké wɩ́ɩ́ii pɔɔn yáányè yisɛ láà àng finibhà ye: Miniwɛ́ɛ́ tɛ́ɛnɛ́ yààn do ké Denie do bhà, le kpeiwɛ́ɛ́ tɛ́ɛnɛ́ yààn yaka' zí Denie do bhà le. Kɛ́ miá yɔ́ɔ́n ni wɩ̂ɩ-le lóó sie.
7
Bháánɛ́' sɛ́ikwɛ́ létàa-pɔ̀ɔ̀n yisɛnàà lépolo', le án pɔɔn yáányèbò láà à yisɛnàà wʋʋ ma', ke e wɩ́ɩ́ii ye: Bhè nu.
8
Máà lɛgaa ke sʋʋ kwîi gbàiileyè do ke ké dɔɔ bhi. Mɛ̂ɛ' é nuu yaa à tà, wo nuu à leeà ga, le gɔɔ̀le-pɛ̀ɛ̀' nuu gieà à wɛì sɛ́ɛ́ pé le. Wo bhaamɛ̀ɛ̀bò' lúyáán tà àng pɛ́ɛ́n yisɛnàà tó zɛ-wʋ̀ʋ̀ kpɔ' àng bhà, ke àng kemò- tó gwili bhà, ke vɔ́n ni bhàyúá yóyoobò- mɛnggoò zɛ, ke wii kún-wììbò' kai, wò zí àng kemò kún.
9
Bháánɛ́' sɛ́ikwɛ́ létàa-pɔ̀ɔ̀n solunàà lépolo', máà lɛgaa ke wó mɛ̂ɛbò' àng zɛ' Aatana-wùn gi láà, àng-gɔ̀òbò ké baan sáà gò à tà-gwɛ̀góló' nuu bhi láà à pé. Sée wó àng zɛ̀- kwɛi, wó Aatana-à liangzɛ' wo', ke wó to' Aatana-wùn séeá, ke wòo gó wo wʋʋ tà láà àle-wùn gi le.
10
Mɛ̂ɛbò láà wo nuu gbáláà kpókpóá wo: Éké, ile Aatana záázàà' wúnyóo àa zin i bhà, ke i mai-wùn pe láà la ò, i dɔɔ mɛɛ gɔ̀n, ke í wún kpɔ́ lúyáán tà-mɛ̀ɛ̀bò tà, ke í bhɔlɔ gó ko gi, wó ko zɛ' wo' láà à-wùn gi le?
11
Wó à pe' kwɛi, le wó wéléwɛ́ɛ́ fɛ́nggbɛ púú tɔ̀yang daa' àng tó bhà dolodolo, le wó wɩɩ' àng nɛ̀ wo: Kà ka zowɛ́ɛ́ saanɛ́ ke wo, ke ka laànɛ́bò' wò Aatana-à bháála kɛɛ ye ka nɛ̀, ke àng zɛ-wùn' tuàn bhe ka-kɔ̀i láà, ke wò nu ka lépai.
12
Bháánɛ́' sɛ́ikwɛ́ létàa-pɔ̀ɔ̀n saadonàà lépolo', máà lɛgaa ke sɛ́ɛ́ ké viin-ii zìgìzìgìle, ke yáán' tala tíiá bìlìbìlìle ye ga tà-gbàà nɛ̀, ke mɛ̂ɛ leng' zí taan tɛ́ɛ́n-á ye yuɛn nɛ̀,
13
ke mɛɛ́ɛ́bò ké zí góii lɔng bhà, ke wo bannáii sáaá ye mánggolo kpolo- banna kɔɔ' gi, ke wàà ké gieii vúvúlé láà à nɛ̀.
14
Máà lɛgaa zí, ke lɔngwɛ́ɛ́ tó ké lóii góá, ke e tóii ye wó kwîi kélé' yeleii à nɛ̀, ke tɔɔnbò leni sɛ́ɛ́bò' kɔ̀ɔ̀yí zué, à tó ké lóii góá dɔ̀-lià.
15
Ale' kɛɛii kwɛi láà, ke gwilinɛbò' lúyáán tà oo, ni lùu wunlé-mɛ̀ɛ̀bò oo, ni sɔ́ya wunmɛ̀ɛ̀ kpákpaabò oo, ni wélé-mɛ̀ɛ̀bò oo, ni giè mɛ̂ɛ gɔ̀n-mɛ̀ɛ̀bò oo, ni mɛ̂ɛ paánbò' wó bhe, wó nuaá oo, ɛ́ɛ́n wó zí wo leng tà oo, àng tó páipái ké lóii wo bànàkpɔ́i gwɛɛ-yɛ̀ɛ̀ gi-lèèbò ni gwɛgɔ̀ɔ̀n finibhà-lèèbò gi tɔɔn bhà.
16
Ang lóyèa, wo nuu à peà wo: Tɔɔnbò ni gwɛgɔ̀ɔ̀nbò, kà dɔ gbáágbààa ke ká bhuolá ko tà, ke ká ko bànàkpɔ́ ke mɛ̂ɛ' é yaa gbòlò kpáè tà láà, à yánwɛ́ɛ́ òo nù ko ye, ke Bháánɛ́ yéè wún' kpɔ́ ko tà láà, è dɔ ko bhà dɔ́ɔ́n-á vóòle.
17
Atoosiwo Aatana ni àbhà Bháánɛ́ wó yáángɛɛn yóo' pe' wún kpɔ̀ ko tà lóóá poo, àle ya bhɔ é. Wáa- mɔɔà dɔá à wàà gɔ̀n le?