Apocalypse 7
1
É go' àle gi, máà lɛgaa ke Aatana-à kɩ́ɩ́la yisɛ ké dɔyèa lúyáán sòbhà-lèè yisɛ láà à tó bhà. Wàà' yéè woo gó lúyáán tà-zààwun yisɛ bhà, ke è gie sɛ́ɛ́ tó páipái tà láà, wo nuu zinyèa à tó gɔ̀n zaalé, é kɛ̂ɛ kwɛi ke òo nù gie sɛ́ɛ́ ni kɔ̀ɔ̀yí tà, ɛ́ɛ́n ke òo nù zí viin yílí kekekèke bhà.
2
Án zí Aatana-à kɩ́ɩ́la bhɛ́i ke ye', ke e góii yáánwoloá, ke wò Aatana yáányè lekinià kɛ́ɛ kpɔ pɔɔnbò bhà pɔɔn' gá ziàn láà, e à kɔlé. Aatana-à kɩ́ɩ́la yisɛ' wó wʋʋ kpɔ' àng bhà wo: wò wún kpɔ́ sɛ́ɛ́ ni kɔ̀ɔ̀yí tó tà láà, le kɩ́ɩ́la bhɛ́i ye láà é gbala' kpókpóá, le é à pe' àng nɛ̀ ye:
3
Kao wún kpɔ́à sɛ́ɛ́ oo, ni kɔ̀ɔ̀yí oo, ni yílíbò láà àng ke tà líe. Ká dɔlɔ́ flúúlé, ke kó bo kɛ́ɛ kpɔ́á ko nɛ Aatana-à gùábò tó páipái kpòng lé, ke káà wún' kɛɛ, ke ká nuu à kɛɛà.
4
Kɩ́ɩ́la láà é bo' à peá kwɛi, wó kɛ́ɛ kpɔ' mɛ̂ɛbò' àng bhà, án àng-nàà ma', ke wo à peii wo: àng tó bànkétàyè ké bhaamɛ̀ɛ̀ wáá kàindini-kɔɔ-yisɛ-ni wɛ́ɛ́-yisɛ. Kɛ́ɛ' nuu kpɔ́yèa mɛ̂ɛbò' àng bhà láà, Izalae kwììlé-yɛ̀ɛ̀ tó ni pe gi-mɛ̀ɛ̀bò ké nuu bhi.
5
Zuda-kwìle mɛ̀ɛ̀bò ké nuu wáá buu-ni-wɛ́ɛ́-piilɛ, Lubɛn-kwìle-mɛ̀ɛ̀bò wáá buu-ni-wɛ́ɛ́-piilɛ, Gadi-kwìle-mɛ̀ɛ̀bò wáá buu-ni-wɛ́ɛ́-piilɛ,
6
Asɛli-kwìle-mɛ̀ɛ̀bò wáá buu-ni-wɛ́ɛ́-piilɛ, Nefutali-kwìle-mɛ̀ɛ̀bò wáá buu-ni-wɛ́ɛ́-piilɛ, Manase-kwìle-mɛ̀ɛ̀bò wáá buu-ni-wɛ́ɛ́-piilɛ,
7
Simeon-kwìle-mɛ̀ɛ̀bò wáá buu-ni-wɛ́ɛ́-piilɛ, Levi-kwìle-mɛ̀ɛ̀bò wáá buu-ni-wɛ́ɛ́-piilɛ, Isakala-kwìle-mɛ̀ɛ̀bò wáá buu-ni-wɛ́ɛ́-piilɛ,
8
Zabulon-kwìle-mɛ̀ɛ̀bò wáá buu-ni-wɛ́ɛ́-piilɛ, Zozɛfu-kwìle mɛ̀ɛ̀bò wáá buu-ni-wɛ́ɛ́-piilɛ, le Bɛnzamɛn-kwìle-mɛ̀ɛ̀bò wáá buu-ni-wɛ́ɛ́-piilɛ. Bhaamɛ̀ɛ̀ kpulu kpáalàkpàà' wó dɔɔ Aatana zué
9
É go' àle gi, máà zí lɛgaa ke bhaamɛ̀ɛ̀ kpulu kpáalàkpàà' núnú àa à bhà, wo banyèa ké tà gbòlò kpáè tà-mɛ̀ɛ̀ ni Bháánɛ́ láà àng zué. Lùu tó páipái gi-mɛ̀ɛ̀bò ké nuu bhi. Sííya tó páipái ni bhaamɛ̀ɛ̀ suu tó páipái ké nuu bhi, le bhaamɛ̀ɛ̀bò- wʋʋ páipái' à pe lúyáán tà à tó-mɛ̀ɛ̀bò' nuu zí bhi pɛipɛi le. Fɛ́nggbɛ púú tɔ̀yang ké nuu àng tó bhà, le paa' nuu àng tó kɔlé le.
10
Wo nuu gbáláà kpókpóá, le wò wɩɩ wo: N nɛ Aatana' é yaa gbòlò kpáè tà ni Bháánɛ́ láà, mɛ̂ɛ layè-le- àngle gɔ̀n le.
11
É kɛɛii kwɛi láà, ke Aatana-à kɩ́ɩ́labò tó páipái ké kɔnɔyèa gbòlò kpáè tà-mɛ̀ɛ̀ ni mɔaabò ni pɔɔn yáányè kpákpaabò yisɛ láà àng zì. Máà káá' wo ke wa bhuolá gbòlò láà à gɛnpé,
12
ke wo wɩ́ɩ́ii wo: N nɛ Aatana, ile í bhe le. Kó i nɛ̀ sáalé. A-lèè ké à bhà ke mɛnó- i-wùn sɛ̀ pe, ke wò i tɔ́ bhɔ, ke wò i wánglegó, ke wò bhɛɛ yaa i bhà lɛ́ile. Atoosiwo wò à pè' wo wúndɔnyè, ke wò ile i pe le. Wò zí à pè' wo kpókpónɛ̀, ni bháa, ke wò ile i pe kweetókwèètóá le. Amiina.
13
É go' bhi, le mɔaabò láà àng do ke' n bhàgilawo' ye: È i gi lɔ? Tɔ̀yang púú-mɛ̀ɛ̀bò é la ò, wáa àng gá le? Le wò zí gò mɛ́ɛ́' wo le?
14
É à pe' kwɛi, le án à yoobɔ' à gɔ̀n ma: N nɛ, àle- tò ile i yàànlé la wà! Le ye: Wɛ̀i-wùn miniminiyè' kɛɛ' lúyáán tà láà, mɛ̂ɛ' wó gie' à-yì wɛ́ɛ́, àngle wó lɛ́ɛ. Wo woà tɔ̀yangbò bhí' wo' Bháánɛ́ láà à yuɛn-á, le ya félé púúá le.
15
Ale kɛɛ le wó dɔyèa Aatana' é yaayèa ebhà mɛ̂ɛnɛ̀-gbòlò tà láà à zué, le wò golo tɔ́ ban-à à bhà yáán gi ni gbɛi gi tó bhà à lɔ̀ɔ̀kɛ̀ɛ̀i-kwìle le. Wò tóà gbòlò kpáè tà-mɛ̀ɛ̀ láà à loo gi bhi' wo, le à yáán- to àng bhà lɛ́ile le.
16
À kɛ̀ɛ̀ kwɛiyè láà à gi, vɔ́n àa àng góii, sée yí lɔ̀ɔ̀ àa àng kɛɛii koo. È gò' àle gi, yáán àa yúáii àng bhà, sée pai àa dɔii àng gá gbonggbongle koo.
17
Atoosiwo Bháánɛ́' é yaayèa gbòlò kpáè tà-mɛ̀ɛ̀ zué láà, àle àng légbaà, le è lo àng dɔi yí' è sii' àa yɛn à daa mɛ̂ɛ gi à gulu bhà, le Aatana lekini- kɔɔ gie àng yánlé le.